21.35C Vancouver 21.35C VancouverJul 29, 2020 9:13 PM -
ਸੂਬੇ ਦੇ ਅਧਿਕਾਰੀਆਂ ਦੁਆਰਾ ਅੱਜ ਬੀ.ਸੀ. ਵਿਚ ਸਕੂਲਾਂ ਨੂੰ ਮੁੜ ਖੋਲ੍ਹਣ ਬਾਬਤ ਜਾਣਕਾਰੀ ਦਿੱਤੀ ਗਈ ਹੈ।
ਇਸ ਫੌਲ ਦੌਰਾਨ ਬੀ.ਸੀ. ਦੇ ਵਿਦਿਆਰਥੀ ਫ਼ੁੱਲ-ਟਾਇਮ ਸਕੂਲਿੰਗ 'ਤੇ ਮੁੜ ਜਾ ਸਕਣਗੇ।
ਐਜੂਕੇਸ਼ਨ ਮਿਨਿਸਟਰ ਰੌਬ ਫ਼ਲੈਮਿੰਗ ਦਾ ਕਹਿਣਾ ਹੈ ਕਿ K-12 ਗ੍ਰੇਡ ਦੇ ਵਿਦਿਆਰਥੀ 8 ਸਤੰਬਰ ਤੋਂ ਸਕੂਲ ਆਉਣਾ ਸ਼ੁਰੂ ਕਰਨਗੇ।
ਇਸ ਮੌਕੇ ਉਨ੍ਹਾਂ ਨੂੰ ਲਰਨਿੰਗ ਸਮੂਹਾਂ ਵਿਚ ਵੰਡਿਆ ਜਾਵੇਗਾ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਵਿਦਿਆਰਥੀ ਅਤੇ ਅਧਿਆਪਕਾਂ ਦੇ ਇਨ੍ਹਾਂ ਸਮੂਹਾਂ ਦੀ ਸਹਾਇਤਾ ਨਾਲ ਵਿਦਿਆਰਥੀਆਂ ਨੂੰ ਅੱਗੇ ਜ਼ਿਆਦਾ ਲੋਕਾਂ ਨਾਲ ਸੰਪਰਕ ਵਿਚ ਆਉਣ ਤੋਂ ਰੋਕਿਆ ਜਾ ਸਕੇਗਾ। ਇਸ ਦੇ ਨਾਲ ਹੀ ਕੋਵਿਡ-19 ਦੇ ਸੰਕਰਮਣ ਦਾ ਖਤਰਾ ਵੀ ਘਟੇਗਾ।
ਬੀ.ਸੀ. ਕੋਵਿਡ-19 ਐਕਸ਼ਨ ਪਲੈਨ ਹੇਠ, ਸਕੂਲਾਂ ਵਿਚ ਸੁਰੱਖਿਆ ਅਤੇ ਸਿਹਤ ਨੂੰ ਯਕੀਨੀ ਬਣਾਉਣ ਲਈ $45.6 ਮਿਲੀਅਨ ਦਾ ਸੂਬੇ ਵੱਲੋਂ ਨਿਵੇਸ਼ ਕੀਤਾ ਜਾ ਰਿਹਾ ਹੈ।
ਇਸ ਮੌਕੇ ਮਿਨਿਸਟਰ ਔਫ਼ ਐਜੂਕੇਸ਼ਨ ਰੌਬ ਫਲੈਮਿੰਗ ਨੇ ਕਿਹਾ ਕਿ, "ਬੱਚਿਆਂ ਦੇ ਸਰਬਪੱਖੀ ਵਿਕਾਸ ਲਈ ਕਲਾਸਰੂਮਜ਼ ਇੱਕ ਬਹੁਤ ਜ਼ਰੂਰੀ ਹਿੱਸਾ ਹਨ। ਇਸ ਲਈ ਅਸੀਂ ਪੂਰੀ ਕੋਸ਼ਿਸ਼ ਕਰ ਰਹੇ ਹਾਂ ਕਿ ਬੱਚੇ ਅਗਲਾ ਸਕੂਲੀ ਸਾਲ ਆਪਣੇ ਅਧਿਆਪਕਾ ਅਤੇ ਕਲਾਸਮੇਟਸ ਨਾਲ ਸੁਰੱਖਿਅਤ ਤਰੀਕੇ ਨਾਲ ਬਿਤਾ ਸਕਣ।"
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਹੈਲਥ ਔਫ਼ੀਸਰ ਡਾ. ਬੌਨੀ ਹੈਨਰੀ ਨੇ ਕਿਹਾ ਕਿ, "ਅਸੀਂ ਜਾਣਦੇ ਹਾਂ ਕਿ ਬੱਚਿਆਂ ਦਾ ਸਕੂਲ ਵਾਪਿਸ ਜਾਣਾ ਕਿੰਨਾ ਜ਼ਰੂਰੀ ਹੈ ਤਾਂ ਜੋ ਉਨ੍ਹਾਂ ਦੀ ਮਾਨਸਿਕ ਅਤੇ ਭਾਵਨਾਤਮਕ ਸਿਹਤ ਦਾ ਧਿਆਨ ਰੱਖਿਆ ਜਾ ਸਕੇ ਅਤੇ ਉਹ ਸਭ ਨਾਲ ਘੁੱਲ-ਮਿਲ ਸਕਣ। ਮਾਪਿਆਂ ਦੇ ਕੰਮ 'ਤੇ ਵਾਪਿਸ ਜਾਉਣ ਲਈ ਵੀ ਇਹ ਇੱਕ ਜ਼ਰੂਰੀ ਕਦਮ ਹੈ, ਪਰ ਇਹ ਸਭ ਇੱਕ ਸੁਰੱਖਿਅਤ ਤਰੀਕੇ ਨਾਲ ਕਰਨਾ ਕਾਫ਼ੀ ਮਹੱਤਵਪੂਰਨ ਹੈ।"
ਬੀ.ਸੀ. ਲਿਬਰਲਜ਼ ਦੇ ਔਫ਼ੀਸ਼ੀਅਲ ਕ੍ਰਿਟਿਕ ਫ਼ੌਰ ਐਜੂਕੇਸ਼ਨ ਡੈਨ ਡੇਵੀਸ ਨੇ ਬੀ.ਸੀ. ਸਰਕਾਰ ਦੀ 'ਬੈਕ ਟੂ ਸਕੂਲ' ਯੋਜਨਾ ਦੀ ਨਿਖੇਧੀ ਕਰਦਿਆਂ ਕਿਹਾ ਕਿ ਇਸ ਯੋਜਨਾ ਬਾਬਤ ਵੇਰਵਿਆਂ ਵਿਚ ਕਮੀ ਹੈ ਅਤੇ ਸਰਕਾਰ ਨੇ ਸਾਰੀ ਜ਼ਿੰਮੇਵਾਰੀ ਸਕੂਲ ਡਿਸਟ੍ਰਿਕਟਸ 'ਤੇ ਪਾ ਦਿੱਤੀ ਹੈ।
