ਪੱਛਮੀ ਕੈਨੇਡਾ ਵਿਚ ਜੰਗਲ ਦੀ ਅੱਗ ਦੇ ਵੱਧ ਰਹੇ ਖ਼ਤਰੇ ਕਾਰਨ ਹਜ਼ਾਰਾਂ ਲੋਕ ਘਰ ਛੱਡਣ ਨੂੰ ਹੋਏ ਮਜ਼ਬੂਰ

ਪੱਛਮੀ ਕੈਨੇਡਾ ਵਿਚ ਜੰਗਲ ਦੀ ਅੱਗ ਦੇ ਵੱਧ ਰਹੇ ਖ਼ਤਰੇ ਕਾਰਨ ਹਜ਼ਾਰਾਂ ਲੋਕਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜ਼ਬੂਰ ਹੋਣਾ ਪੈ ਰਿਹਾ ਹੈ। ਬਿ੍ਰਟਿਸ਼ ਕੋਲੰਬੀਆ ਅਤੇ ਐਲਬਰਟਾ ਦੇ ਕਈ ਇਲਾਕੇ ਇਸ ਨਾਲ ਜੂਝ ਰਹੇ ਹਨ। ਬਹੁਤ ਸਾਰੇ ਲੋਕ ਚਿੰਤਤ ਹਨ ਕਿ ਸ਼ਾਇਦ ਵਾਪਸੀ ਸਮੇਂ ਉਨ੍ਹਾਂ ਦਾ ਘਰ ਨਹੀਂ ਹੋਵੇਗਾ ਕਿਉਂਕਿ ਜੰਗਲ ਦੀ ਅੱਗ ਨਾਲ ਉਨ੍ਹਾਂ ਦੀਆਂ ਕਮਿਊਨਿਟੀਆਂ ਨੂੰ ਖਤਰਾ ਹੈ।

ਬੀ. ਸੀ. ਵਿਚ ਫੋਰਟ ਨੈਲਸੇਨ ਦੇ ਉੱਤਰ ਪੂਰਬੀ ਕਮਿਊਨਿਟੀਆਂ ਨੂੰ ਖਾਲੀ ਕਰਵਾਇਆ ਜਾ ਰਿਹਾ ਹੈ, ਜਿਸ ਦੇ ਨਜ਼ਦੀਕ ਪਾਰਕਰ ਝੀਲ ਜੰਗਲ ਦੀ ਅੱਗ ਤੇ ਉੱਤਰ ਪੱਛਮ ਵਿਚ ਪੈਟਰੀ ਕ੍ਰੀਕ ਜੰਗਲ ਦੀ ਅੱਗ ਭੜਕ ਰਹੀ ਹੈ। ਪਾਰਕਰ ਝੀਲ ਜੰਗਲ ਦੀ ਅੱਗ ਦਾ ਆਕਾਰ 84 ਵਰਗ ਕਿਲੋਮੀਟਰ ਹੈ ਅਤੇ ਪੈਟਰੀ ਕ੍ਰੀਕ ਵਿਚ ਜੰਗਲੀ ਅੱਗ 464 ਵਰਗ ਕਿਲੋਮੀਟਰ ਤੱਕ ਫੈਲੀ ਹੋਈ ਹੈ।

ਐਲਬਰਟਾ ਦੇ ਫੋਰਟ ਮੈਕਮਰੇ ਵਿਚ 209-ਵਰਗ ਕਿਲੋਮੀਟਰ ਦੀ ਅੱਗ ਨੇ 6,600 ਤੋਂ ਵੱਧ ਲੋਕਾਂ ਨੂੰ ਘਰ ਛੱਡਣ ਲਈ ਮਜਬੂਰ ਕੀਤਾ ਹੈ। 2016 ਵਿਚ ਇਸੇ ਤਰ੍ਹਾਂ ਦੀ ਜੰਗਲੀ ਅੱਗ ਨੇ ਇਸ ਤੇਲ-ਸੈਂਡਸ ਭਾਈਚਾਰੇ ਦੇ ਬਹੁਤ ਸਾਰੇ ਹਿੱਸੇ ਨੂੰ ਤਬਾਹ ਕਰ ਦਿੱਤਾ ਸੀ ਅਤੇ ਇਸ ਦੀ ਰਿਕਵਰੀ ਵਿਚ ਕਈ ਸਾਲ ਲੱਗੇ ਸਨ। ਖੁਸ਼ਕ ਹਾਲਾਤ ਅਤੇ ਤੇਜ਼ ਹਵਾਵਾਂ ਕਾਰਨ ਲੱਗੀ ਅੱਗ ਸ਼ਹਿਰ ਵੱਲ ਵਧ ਰਹੀ ਹੈ। 8 ਸਾਲ ਪਹਿਲਾਂ ਫੋਰਟ ਮੈਕਮਰੇ ਵਿਚ ਵੱਡੀ ਜੰਗਲੀ ਅੱਗ ਨੇ 90,000 ਲੋਕਾਂ ਬੇਘਰ ਕੀਤਾ ਸੀ ਅਤੇ ਰੋਜ਼ਾਨਾ 10 ਲੱਖ ਬੈਰਲ ਤੋਂ ਵੱਧ ਹੋਣ ਵਾਲੀ ਤੇਲ ਦੀ ਆਊਟਪੁੱਟ ਠੱਪ ਹੋ ਗਈ ਸੀ।