15.51C Vancouver 15.51C VancouverNov 6, 2024 5:47 PM - Connect Newsroom
ਪ੍ਰਧਾਨ ਮਤਰੀ ਜਸਟਿਨ ਟਰੂਡੋ ਸਰਕਾਰ ਵਿਚ ਡਿਫੈਂਸ ਮਿਨਿਸਟਰ ਰਹੇ ਹਰਜੀਤ ਸਿੰਘ ਸੱਜਣ ਮੰਗਲਵਾਰ ਅਫਗਾਨ ਸਿੱਖਾਂ ਨਾਲ ਜੁੜੇ ਵਿਵਾਦ ਵਿਚ ਸੰਸਦੀ ਕਮੇਟੀ ਸਾਹਮਣੇ ਪੇਸ਼ ਹੋਏ। ਉਨ੍ਹਾਂ ’ਤੇ ਦੋਸ਼ ਸਨ ਕਿ 2021 ਵਿਚ ਅਫਗਾਨਿਸਤਾਨ ਵਿਚ ਤਾਲਿਬਾਨ ਦੇ ਤਖ਼ਤਾਪਲਟ ਦੌਰਾਨ ਕੈਨੇਡਾ ਦੇ ਰੈਸਕਿਊ ਓਪਰੇਸ਼ਨ ਦੇ ਆਖਰੀ ਮੌਕੇ ਉਨ੍ਹਾਂ ਕੈਨੇਡੀਅਨ ਦੀ ਬਜਾਏ ਵਿਸ਼ੇਸ਼ ਫੋਰਸ ਨੂੰ ਅਫਗਾਨ ਸਿੱਖਾਂ ਨੂੰ ਪਹਿਲ ਦੇ ਆਧਾਰ ’ਤੇ ਕੱਢਣ ਦੇ ਹੁਕਮ ਦਿੱਤੇ ਸਨ।
ਸੱਜਣ ਜੋ ਕਿ ਮੌਜੂਦਾ ਸਮੇਂ ਐਮਰਜੈਂਸੀ ਮੰਤਰੀ ਹਨ, ਉਨ੍ਹਾਂ ਸੰਸਦੀ ਕਮੇਟੀ ਨੂੰ ਕਿਹਾ ਕਿ ਉਨ੍ਹਾਂ ਅਫਗਾਨ ਸਿੱਖਾਂ ਨੂੰ ਕੋਈ ਵਿਸ਼ੇਸ਼ ਇਲਾਜ ਨਹੀਂ ਦਿੱਤਾ ਸਗੋਂ ਇਨਸਾਨੀਅਤ ਦੇ ਤੌਰ ’ਤੇ ਅਜਿਹਾ ਕੀਤਾ।
ਸੱਜਣ ਨੇ ਕਿਹਾ ਕਿ ਅਫਗਾਨ ਸਿੱਖਾਂ ਨਾਲ ਜੁੜੀਆਂ ਚਿੰਤਾਵਾਂ ਸਬੰਧੀ ਉਨ੍ਹਾਂ ਦਾ ਧਿਆਨ ਕੈਲਗਰੀ ਸਥਿਤ ਮਨਮੀਤ ਸਿੰਘ ਭੁੱਲਰ ਫਾਊਂਡੇਸ਼ਨ ਨੇ ਦਿਵਾਇਆ ਸੀ। ਗੌਰਤਲਬ ਹੈ ਕਿ ਇਸ ਮਾਮਲੇ ਵਿਚ ਬਲਾਕ ਕਿਊਬੇਕੋਇਸ ਨੇ ਸੱਜਣ ਨੂੰ ਸੰਸਦੀ ਕਮੇਟੀ ਅੱਗੇ ਬੁਲਾਏ ਜਾਣ ਦੀ ਮੰਗ ਕੀਤੀ ਸੀ। ਜੂਨ ਵਿਚ ਰਿਪੋਰਟ ਆਈ ਸੀ ਕਿ ਉਨ੍ਹਾਂ ਨੇ ਮਿਲਟਰੀ ਨੂੰ ਲਗਭਗ 225 ਅਫਗਾਨ ਸਿੱਖਾਂ ਨੂੰ ਕੱਢਣ ਲਈ ਕਿਹਾ ਸੀ ਪਰ ਸੱਜਣ ਨੇ ਕਿਹਾ ਕਿ ਇਹ ਕੋਈ ਆਦੇਸ਼ ਨਹੀਂ ਸੀ।
ਹਾਲਾਂਕਿ, ਇਹ ਮਿਸ਼ਨ ਸਫਲ ਨਹੀਂ ਹੋਇਆ ਸੀ, ਕੈਨੇਡੀਅਨ ਫੋਰਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਅਫਗਾਨ ਸਿੱਖ ਮਿਲਣ ਵਾਲੀ ਥਾਂ ਛੱਡ ਗਏ ਸਨ। ਇਹ ਗਰੁੱਪ ਬਾਅਦ ਵਿਚ ਭਾਰਤ ਪਹੁੰਚਿਆਂ ਅਤੇ ਉਨ੍ਹਾਂ ਵਿਚੋਂ ਬਹੁਤ ਸਾਰੇ ਕੈਨੇਡਾ ਆ ਚੁੱਕੇ ਹਨ।
