12.43C Vancouver 12.43C VancouverJan 22, 2025 5:45 PM - Connect Newsroom
ਵੈਨਕੂਵਰ ਸਾਊਥ ਤੋਂ ਐਮਪੀ ਅਤੇ ਟਰੂਡੋ ਸਰਕਾਰ ਵਿਚ ਲੰਮੇ ਸਮੇਂ ਤੋਂ ਮੰਤਰੀ ਹਰਜੀਤ ਸਿੰਘ ਸੱਜਣ ਸਿਆਸਤ ਨੂੰ ਅਲਵਿਦਾ ਆਖ ਰਹੇ ਹਨ। ਉਨ੍ਹਾਂ ਅਗਲੀਆਂ ਫੈਡਰਲ ਚੋਣਾਂ ਨਾ ਲੜਨ ਦੀ ਘੋਸ਼ਣਾ ਕੀਤੀ ਹੈ।
ਸੱਜਣ ਨੇ ਕਿਹਾ ਕਿ ਉਹ ਵੈਨਕੂਵਰ ਸਾਊਥ ਦੇ ਲੋਕਾਂ ਦੀ ਆਵਾਜ਼ ਬਣਨ ਦੀ ਇੱਛਾ ਨਾਲ ਸਿਆਸਤ ਵਿਚ ਆਏ ਸਨ ਤਾਂ ਜੋ ਉਨ੍ਹਾਂ ਦੀਆਂ ਚਿੰਤਾਵਾਂ ਅਤੇ ਜ਼ਰੂਰਤਾਂ ਨੂੰ ਔਟਵਾ ਵਿਚ ਸੁਣਿਆ ਜਾ ਸਕੇ, ਸੱਜਣ ਨੇ ਕਿਹਾ ਕਿ ਉਨ੍ਹਾਂ ਦਾ ਇਹ ਮੰਤਵ ਪੂਰਾ ਹੋਇਆ ਹੈ ਅਤੇ ਲਗਭਗ ਇੱਕ ਦਹਾਕੇ ਤੋਂ ਸਿਆਸਤ ਵਿਚ ਰਹਿਣ ਤੋਂ ਬਾਅਦ ਹੁਣ ਉਨ੍ਹਾਂ ਚੋਣਾਂ ਨਾ ਲੜਨ ਦਾ ਫੈਸਲਾ ਕੀਤਾ ਹੈ।
ਇਸ ਦੇ ਨਾਲ ਹੀ ਉਨ੍ਹਾਂ ਆਪਣੇ ਹਲਕੇ ਦੇ ਲੋਕਾਂ ਅਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਧੰਨਵਾਦ ਕੀਤਾ। ਗੌਰਤਲਬ ਹੈ ਕਿ ਹਰਜੀਤ ਸਿੰਘ ਸੱਜਣ ਪਹਿਲੀ ਵਾਰ 2015 ਵਿਚ ਵੈਨਕੂਵਰ ਸਾਊਥ ਤੋਂ ਚੋਣ ਜਿੱਤੇ ਸਨ। ਟਰੂਡੋ ਸਰਕਾਰ ਵਿਚ ਉਨ੍ਹਾਂ ਡਿਫੈਂਸ ਮਿਨਿਸਟਰ ਵਜੋਂ ਵੀ ਕੰਮ ਕੀਤਾ ਅਤੇ ਇਸ ਸਮੇਂ ਐਮਰਜੈਂਸੀ ਪ੍ਰੀਪੇਏਡਨੈੱਸ ਮਿਨਿਸਟਰ ਹਨ।
ਦੱਸ ਦੇਈਏ ਕਿ ਟਰਾਂਸਪੋਰਟ ਮੰਤਰੀ ਅਨੀਤਾ ਆਨੰਦ ਅਤੇ ਇੱਥੋਂ ਤੱਕ ਕਿ ਪੀਐੱਮ ਟਰੂਡੋ ਵੀ ਚੋਣਾ ਨਾ ਲੜਨ ਦੀ ਘੋਸ਼ਣਾ ਕਰ ਚੁੱਕੇ ਹਨ।
