16.78C Vancouver 16.78C VancouverApr 16, 2021 10:46 AM -
ਕੇਂਦਰੀ ਸਿਹਤ ਮੰਤਰੀ ਡਾ. ਹਰਸ਼ ਵਰਧਨ ਨੇ ਅੱਜ ਸ਼ੁੱਕਰਵਾਰ ਨੂੰ ਆਖਿਆ ਕਿ ਉਹ ਸ਼ਨੀਵਾਰ ਨੂੰ ਵੱਖੋ-ਵੱਖ ਸੂਬਿਆਂ ਦੇ ਸਿਹਤ ਮੰਤਰੀਆਂ ਨਾਲ ਬੈਠਕ ਕਰਨਗੇ ਅਤੇ ਸੋਮਵਾਰ ਨੂੰ ਉਹ ਕੋਵਿਡ ਸਹੂਲਤਾਂ ਨੂੰ ਵਧਾਉਣ ਨੂੰ ਲੈਕੇ ਪੂਰੇ ਮੁਲਕ ਦੇ ਸਾਰੇ ਏਮਸ ਹਸਪਤਾਲਾਂ ਨਾਲ ਵੀ ਵਰਚੁਅਲ ਬੈਠਕ ਕਰਨਗੇ।
ਉਨ੍ਹਾਂ ਦਿੱਲੀ ਵਿੱਚ ਆਖਿਆ,"ਮੈਂ ਕੱਲ ਮੁਲਕ ਵਿੱਚ ਵਧਦੇ ਕੋਵਿਡ-19 ਮਾਮਲਿਆਂ ਬਾਰੇ ਸੂਬਿਆਂ ਦੇ ਸਿਹਤ ਮੰਤਰੀਆਂ ਨਾਲ ਬੈਠਕ ਕਰਾਂਗਾ। ਸੋਮਵਾਰ ਨੂੰ ਅਸੀਂ ਪੂਰੇ ਮੁਲਕ ਦੇ ਆਲ ਇੰਡੀਆ ਇੰਸਟੀਟਿਊਸ਼ਨ ਆਫ਼ ਮੈਡੀਕਲ ਸਾਇੰਸਿਜ਼ (ਏਮਸ) ਹਸਪਤਾਲਾਂ ਨਾਲ ਸੁਵਿਧਾਵਾਂ ਨੂੰ ਵਧਾਉਣ ਬਾਰੇ ਇੱਕ ਵਰਚੁਅਲ ਬੈਠਕ ਕਰਾਂਗੇ।"
ਉਹਨਾਂ ਇਹ ਵੀ ਆਖਿਆ ਕਿ ਤਾਜ਼ਾ ਅੰਕੜਿਆਂ ਮੁਤਾਬਕ, ਮੁਲਕ ਦੇ 54 ਜ਼ਿਲੇ ਅਤੇ 44 ਜ਼ਿਲਿਆਂ ਵੱਲੋਂ ਕ੍ਰਮਵਾਰ ਬੀਤੇ 7 ਦਿਨਾਂ ਅਤੇ ਬੀਤੇ 28 ਦਿਨਾਂ ਵਿੱਚ ਕੋਰੋਨਾ ਵਾਇਰਸ ਦੇ ਨਵੇਂ ਮਾਮਲੇ ਰਿਪੋਰਟ ਨਹੀਂ ਕੀਤੇ ਗਏ।
ਕੇਂਦਰੀ ਮੰਤਰੀ ਨੇ ਕਿਹਾ,"ਅਸੀਂ ਏਮਸ ਟ੍ਰਾਮਾ ਸੈਂਟਰ ਵਿੱਚ 70 ਹੋਰ ਬੈਡ ਅਤੇ ਝੱਜਰ ਦੇ ਕੌਮੀ ਕੈਂਸਰ ਇੰਸਟੀਟਿਊਟ ਵਿੱਚ 100 ਹੋਰ ਬੈਡ ਸ਼ਾਮਲ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਮੈਨੂੰ ਯਕੀਨ ਹੈ ਕਿ ਕੋਵਿਡ-19 ਦੇ ਵਧਦੇ ਮਾਮਲਿਆਂ ਕਰਕੇ ਸਾਡੇ ਦਰਪੇਸ਼ ਆਈਆਂ ਮੁਸ਼ਕਿਲਾਂ 'ਤੇ ਅਸੀਂ ਕਾਬੂ ਪਾਉਣ 'ਚ ਸਫ਼ਲ ਹੋਵਾਂਗੇ।"
ਉਨ੍ਹਾਂ ਨੇ ਰੈਮਡੀਸੀਵਰ ਦਵਾਈ ਦੀ ਕਾਲਾ ਬਜ਼ਾਰੀ ਅਤੇ ਹੋਰ ਗ਼ਲਤ ਕੰਮ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨ ਦਾ ਭਰੋਸਾ ਵੀ ਦਿਵਾਇਆ।
"ਕੋਰੋਨਾਵਾਇਰਸ ਦੀ ਦਵਾਈ ਰੈਮਡੀਸੀਵਰ ਬਣਾਉਣ ਵਾਲਿਆਂ ਨੂੰ ਇਸਦੇ ਉਤਪਾਦਨ ਨੂੰ ਹੋਰ ਤੇਜ਼ ਕਰਨ ਲਈ ਆਖ ਦਿੱਤਾ ਗਿਆ ਹੈ| ਮੈਂ ਤੁਹਾਨੂੰ ਯਕੀਨ ਦਿਵਾਉਂਦਾ ਹਾਂ ਕਿ ਦਵਾਈ ਦੀ ਕਾਲਾ ਬਜ਼ਾਰੀ ਅਤੇ ਗ਼ਲਤ ਕੰਮ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ,"ਉਨ੍ਹਾਂ ਅੱਗੇ ਆਖਿਆ।
ਦੱਸਣਯੋਗ ਹੈ ਕਿ ਕੇਂਦਰੀ ਮੰਤਰੀ ਅੱਜ ਸ਼ੁੱਕਰਵਾਰ ਨੂੰ ਆਲ ਇੰਡੀਆ ਇੰਸਟੀਟਿਊਸ਼ਨ ਆਫ਼ ਮੈਡੀਕਲ ਸਾਇੰਸਿਜ਼ (ਏਮਸ) ਵਿਖੇ ਪੁੱਜੇ ਸਨ, ਜਿੱਥੇ ਏਮਸ ਦੇ ਨਿਰਦੇਸ਼ਕ ਡਾ. ਰਣਦੀਪ ਗੁਲੇਰੀਆ ਅਤੇ ਹਸਪਤਾਲ ਦੇ ਹੋਰ ਡਾਕਟਰ ਇਸ ਵੇਲੇ ਮੌਜੂਦ ਸਨ।
