ਕੈਨੇਡਾ ਭਰ ਦੇ ਹਸਪਤਾਲ ਮਰੀਜ਼ਾਂ ਨਾਲ ਭਰੇ, ਸਿਹਤ ਪੇਸ਼ੇਵਾਰਾਂ ਨੇ ਕੀਤੀ ਸੁਧਾਰ ਦੀ ਮੰਗ

ਕੈਨੇਡਾ ਭਰ ਵਿਚ ਹਸਪਤਾਲਾਂ ਦੇ ਕਮਰੇ ਭਰੇ ਹੋਣ ਕਰਕੇ ਸੰਕਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕੈਨੇਡੀਅਨ ਮੈਡੀਕਲ ਐਸੋਸੀਏਸ਼ਨ ਮੁਤਾਬਕ, ਡਾਕਟਰ, ਨਰਸ ਅਤੇ ਹੋਰ ਪ੍ਰੋਵਾਈਡਰ ਦੇ ਅਣਥੱਕ ਯਤਨਾਂ ਦੇ ਬਾਵਜੂਦ ਕੁਝ ਇਲਾਕਿਆਂ ਵਿਚ ਮਰੀਜ਼ਾਂ ਨੂੰ ਇਲਾਜ ਲਈ 20 ਘੰਟੇ ਜਾਂ ਇਸ ਤੋਂ ਵੱਧ ਸਮਾਂ ਉਡੀਕ ਕਰਨੀ ਪੈ ਰਹੀ ਹੈ।

ਐਸੋਸੀਏਸ਼ਨ ਵਲੋਂ ਸੂਬਾ ਸਰਕਾਰਾਂ ਨੂੰ ਸਥਿਤੀ ਨਾਲ ਨਜਿੱਠਣ ਲਈ ਮਦਦ ਦੀ ਗੁਹਾਰ ਲਗਾਈ ਗਈ ਹੈ। ਮੈਡੀਕਲ ਐਸੋਸੀਏਸ਼ਨ ਦੀ ਪ੍ਰਧਾਨ ਕੈਥਲੀਨ ਰੌਸ ਨੇ ਕਿਹਾ ਕਿ ਇਨਫਲੂਐਨਜ਼ਾ, ਕੋਵਿਡ ਅਤੇ ਸਾਹ ਸੰਬੰਧੀ ਵਾਇਰਸ ਵਾਲੇ ਮਰੀਜ਼ ਵੱਧ ਰਹੇ ਹਨ, ਦੂਜੇ ਪਾਸੇ ਉੱਚ-ਗੁਣਵੱਤਾ ਪ੍ਰਾਇਮਰੀ ਦੇਖਭਾਲ ਤੱਕ ਲੋਕਾਂ ਦੀ ਪਹੁੰਚ ਘੱਟ ਹੈ ਅਤੇ ਸਟਾਫ ਦੀ ਕਮੀ ਕਾਰਨ ਹਸਪਤਾਲਾਂ ਦੇ ਐਮਰਜੈਂਸੀ ਰੂਮ ਵਿਚ ਭੀੜ-ਭੜੱਕਾ ਵੱਧ ਰਿਹਾ ਹੈ।

ਬੀ. ਸੀ. ਨੇ ਬੁੱਧਵਾਰ ਤੱਕ ਰਿਕਾਰਡ 10 ਹਜ਼ਾਰ ਮਰੀਜ਼ ਸਿਹਤ ਸੰਭਾਲ ਪੇਸ਼ੇਵਰ ਹਸਪਤਾਲਾਂ ਵਿਚ ਦਰਜ ਕੀਤੇ ਹਨ। ਮੈਡੀਕਲ ਐਸੋਸੀਏਸ਼ਨ ਨੇ ਸਰਕਾਰ ਨੂੰ ਟੀਮ ਆਧਾਰਿਤ ਪ੍ਰਾਇਮਰੀ ਦੇਖਭਾਲ ’ਤੇ ਜ਼ੋਰ ਦੇਣ ਦੀ ਸਲਾਹ ਦਿੱਤੀ ਹੈ ਅਤੇ ਕਿਹਾ ਕਿ ਐਮ.ਪੀ.ਐੱਸ. ਨੂੰ ਵਿੰਟਰ ਸੈਸ਼ਨ ਦੌਰਾਨ ਇਸ ਸਬੰਧੀ ਤਬਦੀਲੀ ਕਰਨੀ ਚਾਹੀਦੀ ਹੈ ਤਾਂ ਜੋ ਮੈਡੀਕਲ ਜ਼ਰੂਰਤ ਦੇ ਆਧਾਰ ’ਤੇ ਮਰੀਜ਼ਾਂ ਨੂੰ ਦੂਜੇ ਮਾਹਰ ਕੋਲ ਤੁਰੰਤ ਰੈਫਰ ਕਰ ਸਕਣ।

ਇਹ ਮਾਡਲ ਇਸ ਸਮੇਂ ਕੁਝ ਹੀ ਥਾਵਾਂ ’ਤੇ ਲਾਗੂ ਹੈ। ਐਸੋਸੀਏਸ਼ਨ ਨੇ ਕਿਹਾ ਕਿ ਕੋਈ ਨਹੀਂ ਚਾਹੁੰਦਾ ਕਿ ਉਸ ਨੂੰ ਜਾਂ ਉਸ ਦੇ ਕਿਸੇ ਸਨੇਹੀ ਨੂੰ ਇਲਾਜ ਲਈ 20 ਘੰਟੇ ਉਡੀਕ ਕਰਨੀ ਪਵੇ।

ਰਿਪੋਰਟ ਵਿਚ ਜ਼ੋਰ ਦੇ ਕੇ ਕਿਹਾ ਗਿਆ ਹੈ ਕਿ ਪ੍ਰਾਇਮਰੀ ਕੇਅਰ ਵਿਕਲਪ ਦੀ ਘਾਟ ਕਾਰਨ ਐਮਰਜੈਂਸੀ ਰੂਮ ’ਤੇ ਵਧੇਰੇ ਦਬਾਅ ਪੈ ਰਿਹਾ ਹੈ।