15.56C Vancouver 15.56C VancouverJun 28, 2021 3:36 PM -
ਐਨਵਾਇਰਨਮੈਂਟ ਕੈਨੇਡਾ ਵਲੋਂ ਪੱਛਮੀ ਕੈਨੇਡਾ ’ਤੇ ਛਾਈ ਗਰਮ ਲਹਿਰ ਬਾਰੇ ਚੇਤਾਵਨੀ ਜਾਰੀ ਕੀਤੀ ਗਈ ਹੈ।
ਵਿਭਾਗ ਮੁਤਾਬਕ ਇਹ ਸਿਲਸਿਲਾ ਕਈ ਹਿੱਸਿਆਂ ਵਿੱਚ ਕੁਝ ਦਿਨ ਜਾਰੀ ਰਹੇਗਾ, ਹਾਲਾਂਕਿ ਬ੍ਰਿਟਿਸ਼ ਕੋਲੰਬੀਆ ਅਤੇ ਯੂਕੌਨ ਦੇ ਕੁਝ ਹਿੱਸਿਆਂ ਵਿੱਚ ਜਲਦੀ ਥੋੜੀ ਰਾਹਤ ਮਿਲ ਸਕਦੀ ਹੈ।
ਗਰਮੀ ਦੀਆਂ ਚੇਤਾਵਨੀਆਂ ਬੀ.ਸੀ. ਭਰ ਵਿੱਚ ਤਾਇਨਾਤ ਹਨ ਅਤੇ ਐਲਬਰਟਾ, ਸਸਕੈਚਵਨ, ਨੌਰਥ ਵੈਸਟ ਟੈਰੀਟੋਰੀਜ਼ ਅਤੇ ਯੂਕੌਨ ਦੇ ਜ਼ਿਆਦਾਤਰ ਇਲਾਕਿਆਂ ਵਿੱਚ ਤਾਪਮਾਨ 40 ਡਿਗਰੀ ਤਕ ਪਹੁੰਚਣ ਦਾ ਅਨੁਮਾਨ ਹੈ।
ਤਾਪਮਾਨ ਦੇ 60 ਰਿਕਾਰਡ ਐਤਵਾਰ ਨੂੰ ਬੀ.ਸੀ. ਵਿੱਚ ਸਥਾਪਤ ਕੀਤੇ ਗਏ ਸਨ, ਜਿਸ ਵਿੱਚ ਲਿਟਨ ਨਾਂ ਦਾ ਪਿੰਡ ਵੀ ਸ਼ਾਮਲ ਹੈ, ਜਿੱਥੇ ਪਾਰਾ 46.6 ਸੈਲਸੀਅਸ ਤੱਕ ਪਹੁੰਚ ਗਿਆ।
ਇਸ ਤੋਂ ਪਹਿਲਾਂ ਕੈਨੇਡਾ ਵਿੱਚ ਸਭ ਤੋਂ ਉੱਚ ਤਾਪਮਾਨ ਦਾ ਰਿਕਾਰਡ 45 ਡਿਗਰੀ ਸੈਲਸੀਅਸ ਸੀ ਜੋ ਕਿ 1937 ਵਿੱਚ ਸਸਕੈਚਵਨ ਵਿੱਚ ਸਥਾਪਤ ਕੀਤਾ ਗਿਆ ਸੀ।
ਐਨਵਾਇਰਨਮੈਂਟ ਕੈਨੇਡਾ ਨੇ ਚੇਤਾਵਨੀ ਦਿੱਤੀ ਹੈ ਕਿ "ਲੰਬੀ, ਖਤਰਨਾਕ ਅਤੇ ਇਤਿਹਾਸਕ ਗਰਮੀ ਦੀ ਲਹਿਰ" ਬੀ.ਸੀ. ਦੇ ਦੱਖਣੀ ਤੱਟ ਅਤੇ ਯੂਕੌਨ ਵਿੱਚ ਮੰਗਲਵਾਰ ਦੇ ਅਖੀਰ ਵਿੱਚ ਘੱਟ ਹੋ ਸਕਦੀ ਹੈ।
ਮਾਹਰਾਂ ਅਨੁਸਾਰ ਮੌਸਮ ਵਿੱਚ ਨਮੀ ਕਾਰਣ ਫਰੇਜ਼ਰ ਵੈਲੀ ਵਿੱਚ ਤਾਪਮਾਨ 50 ਡਿਗਰੀ ਸੈਲਸੀਅਸ ਪ੍ਰਤੀਤ ਹੋਵੇਗਾ ਅਤੇ ਇਲਾਕੇ ਦੇ ਰਾਸਬੇਰੀ ਦੇ ਉਤਪਾਦਕਾਂ ਮੁਤਾਬਕ ਇਸ ਗਰਮੀ ਦਾ ਫ਼ਸਲ ਉੱਤੇ ਮਾੜਾ ਪ੍ਰਭਾਵ ਪਵੇਗਾ।
ਸੂਬੇ ਦੇ ਇੱਕ ਦਰਜਨ ਤੋਂ ਵੱਧ ਸਕੂਲ ਜ਼ਿਲ੍ਹਿਆਂ ਨੇ ਕਲਾਸਾਂ ਰੱਦ ਕਰ ਦਿੱਤੀਆਂ ਹਨ, ਅਤੇ ਫਰੇਜ਼ਰ ਹੈਲਥ ਦਾ ਕਹਿਣਾ ਹੈ ਕਿ ਗਰਮੀ ਨਾਲ ਸਬੰਧਤ ਬਿਮਾਰੀਆਂ ਦੀ ਸੰਭਾਵਨਾ ਨੂੰ ਘਟਾਉਣ ਲਈ ਅਸਥਾਈ ਤੌਰ ’ਤੇ ਕਈ ਕੋਵਿਡ -19 ਟੀਕਾਕਰਣ ਕਲੀਨਿਕ ਵਿੱਚ ਅਪੋਇੰਟਮੈਂਟਸ ਵਿੱਚ ਤਬਦੀਲੀਆਂ ਕੀਤੀਆਂ ਜਾ ਰਹੀਆਂ ਹਨ।
