12.36C Vancouver 12.36C VancouverOct 2, 2020 8:52 PM -
ਬੀ.ਸੀ. ਐਨ.ਡੀ.ਪੀ. ਲੀਡਰ ਜੌਨ ਹੌਰਗਨ ਨੇ ਅੱਜ ਸਕੁਆਮਿਸ਼ ਵਿੱਚ ਆਪਣੇ ਚੋਣ ਪ੍ਰਚਾਰ ਦੌਰਾਨ ਕਿਹਾ ਕਿ ਦੁਬਾਰਾ ਸੱਤਾ ਵਿਚ ਆਉਣ 'ਤੇ ਐਨ.ਡੀ.ਪੀ. ਸਰਕਾਰ ਕਲਾਈਮੇਟ ਚੇਂਜ ਨਾਲ ਨਜਿੱਠਣ ਦੀ ਕੋਸ਼ਿਸ਼ ਜਾਰੀ ਰੱਖਦਿਆਂ, 2050 ਤੱਕ ਬੀ.ਸੀ. ਵਿੱਚ ਨੈੱਟ ਜ਼ੀਰੋ ਐਮੀਸ਼ਨਜ਼ ਦੇ ਲਈ ਕੰਮ ਕਰੇਗੀ ਅਤੇ ਇਸ ਸੰਬੰਧੀ ਨਵਾਂ ਕਾਨੂੰਨ ਬਣਾਏਗੀ।
ਹੌਰਗਨ ਨੇ ਕਿਹਾ ਕਿ ਨੈੱਟ ਜ਼ੀਰੋ ਕਾਰਬਨ ਐਮੀਸ਼ਨਜ਼ ਦੇ ਅਹਿਮ ਟੀਚੇ ਨੂੰ ਪੂਰਾ ਕਰਨਾ, ਨਵੀਆਂ ਨੌਕਰੀਆਂ ਪੈਦਾ ਕਰਨ ਵਿੱਚ ਵੀ ਮਦਦ ਕਰੇਗਾ।
ਹਾਲਾਂਕਿ ਬੀ.ਸੀ. ਗ੍ਰੀਨਸ ਲੀਡਰ ਸੋਨੀਆ ਫਰਸਟੇਨਾਊ ਦਾ ਕਹਿਣਾ ਹੈ ਕਿ, ਹੌਰਗਨ ਦੇ ਪਲੈਨ ਦਾ ਕੋਈ ਰੋਡਮੈਪ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਜੇਕਰ ਕੀਟਿਮੈਟ 'ਚ ਐਲ.ਐਨ.ਜੀ. ਕੈਨੇਡਾ ਪ੍ਰੋਜੈਕਟ ਨੂੰ ਅੱਗੇ ਵਧਾਇਆ ਜਾਂਦਾ ਹੈ, ਤਾਂ ਇਸ ਦਾ ਕੋਈ ਆਸਾਰ ਨਹੀਂ ਹੈ ਕਿ, ਬੀ.ਸੀ. 'ਚ ਨੈੱਟ ਜ਼ੀਰੋ ਟਾਰਗੈਟ ਹਾਸਿਲ ਕੀਤੇ ਜਾ ਸਕਣ।
ਦੂਜੇ ਪਾਸੇ ਬੀ.ਸੀ. ਲਿਬਰਲ ਪਾਰਟੀ ਦੇ ਲੀਡਰ ਐਨਡਰਿਊ ਵਿਲਕਿਨਸਨ ਨੇ ਅੱਜ ਮੈਰਿਟ ਵਿੱਚ ਆਪਣੇ ਚੋਣ ਪ੍ਰਚਾਰ ਦੌਰਾਨ, ਫੌਰੈਸਟ੍ਰੀ ਦੀ ਸਹਾਇਤਾ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਜੇਕਰ ਉਨ੍ਹਾਂ ਦੀ ਪਾਰਟੀ ਸੱਤਾ ਵਿੱਚ ਆਉਂਦੀ ਹੈ ਤਾਂ ਪਹਿਲੇ ਸਾਲ ਵਿਚ ਹੀ ਸਟੰਮਪੇਜ ਫ਼ੀ ਸੰਬੰਧੀ ਕੀਮਤ ਪ੍ਰਣਾਲੀ ਵਿੱਚ ਬਦਲਾਅ ਕੀਤਾ ਜਾਵੇਗਾ ਅਤੇ ਟ੍ਰਾਂਸਮਾਉਨਟੇਨ ਜਿਹੇ ਪ੍ਰਵਾਨਿਤ ਪ੍ਰੋਜੈਕਟਸ ਨੂੰ ਕੁਝ ਵਿਰੋਧ ਪ੍ਰਦਰਸ਼ਨਕਾਰੀਆਂ ਕਰਕੇ ਨਹੀਂ ਰੋਕਿਆ ਜਾਵੇਗਾ।
ਵਿਲਕਿਨਸਨ ਨੇ ਕਿਹਾ ਕਿ ਹੌਰਗਨ ਬਹਿਸਾਂ ਵਿੱਚ ਚੰਗਾ ਪ੍ਰਦਰਸ਼ਨ ਨਹੀਂ ਕਰਦੇ ਅਤੇ ਤਾਂ ਹੀ ਉਨ੍ਹਾਂ ਨਾਲ ਟੀ.ਵੀ. ਡੀਬੇਟ ਕਰਨ 'ਤੇ ਸਹਿਮਤ ਨਹੀਂ ਹਨ।
