12.06C Vancouver 12.06C VancouverJun 2, 2020 10:25 PM -
ਹਾਊਸ ਆਫ਼ ਕਾਮਨਜ਼ ਦੇ ਸਪੀਕਰ ਐਨਥਨੀ ਰੋਟਾ ਦਾ ਕਹਿਣਾ ਹੈ ਕਿ ਪਾਰਲੀਮੈਂਟ ਦੇ ਹਾਇਬ੍ਰਿਡ ਸੈਸ਼ਨ ਦੌਰਾਨ ਸੁਰੱਖਿਅਤ ਢੰਗ ਨਾਲ ਵੋਟਿੰਗ ਦੀ ਸਹੂਲਤ ਮੁਹੱਈਆ ਕਰਵਾਉਣ ਲਈ ਲੋੜੀਂਦੀ ਟੇਕਨੌਲੋਜੀ ਮੌਜੂਦ ਹੈ।
ਰੋਟਾ ਨੇ ਅੱਜ ਪ੍ਰੋਸੀਜਰ ਐਂਡ ਹਾਊਸ ਅਫ਼ੇਅਰਜ਼ ਕਮੇਟੀ (Procedure and House Affairs Committee) ਨੂੰ ਦੱਸਿਆ ਕਿ ਉਹਨਾਂ ਨੂੰ ਯਕੀਨ ਹੈ ਕਿ ਪਬਲਿਕ ਵੋਟਿੰਗ ਦੀ ਪ੍ਰਕਿਰਿਆ ਸੁਰੱਖਿਅਤ ਹੈ ਅਤੇ ਹੁਣ ਇਹ ਮੈਂਬਰਾਂ 'ਤੇ ਨਿਰਭਰ ਕਰਦਾ ਹੈ ਕਿ ਉਹ ਕਿਸ ਪ੍ਰਕਿਰਿਆ ਨੂੰ ਮਨਜ਼ੂਰੀ ਦਿੰਦੇ ਹਨ।
ਸੁਰੱਖਿਆ ਦੇ ਨਜ਼ਰੀਏ ਤੋਂ ਆਨਲਾਇਨ ਵੋਟਿੰਗ ਨੂੰ ਕਈ ਮੈਂਬਰਾਂ ਵੱਲੋਂ ਇੱਕ ਕਮਜ਼ੋਰ ਵਿਕਲਪ ਮੰਨਿਆ ਜਾ ਰਿਹਾ ਹੈ।
ਹਾਊਸ ਆਫ਼ ਕਾਮਨਜ਼ ਵੱਲੋਂ ਇਸੇ ਕਾਰਣ ਹਾਇਬ੍ਰਿਡ ਬੈਠਕਾਂ ਦਾ ਵਿਕਲਪ ਚੁਣਿਆ ਗਿਆ ਹੈ, ਜਿਸ ਵਿੱਚ ਕੁਝ ਮੈਂਬਰ ਹਾਊਸ ਵਿੱਚ ਮੌਜੂਦ ਹੁੰਦੇ ਹਨ ਅਤੇ ਬਾਕੀ ਆਨਲਾਇਨ ਵੀਡੀਓ-ਕਾਨਫਰੰਸ ਰਾਹੀਂ ਜੁੜਦੇ ਹਨ।
ਕੰਜ਼ਰਵੇਟਿਵ ਪਾਰਟੀ ਅਤੇ ਬਲੌਕ ਦੇ ਮੈਂਬਰ, ਹਾਊਸ ਆਫ਼ ਕਾਮਨਜ਼ ਦੀਆਂ ਬੈਠਕਾਂ ਪਹਿਲਾਂ ਵਾਂਗ ਕਰਵਾਉਣ ਦੇ ਹੱਕ ਵਿੱਚ ਹਨ। ਉਹਨਾਂ ਦਾ ਮੰਨਣਾ ਹੈ ਕਿ ਸਰੀਰਕ ਤੌਰ 'ਤੇ ਹਾਊਸ ਵਿੱਚ ਮੌਜੂਦ ਰਹਿ ਕੇ ਉਹ ਸਰਕਾਰ ਵੱਲੋਂ ਕੋਵਿਡ-19 ਦੌਰਾਨ ਮਦਦ ਵਜੋਂ ਜਾਰੀ ਕੀਤੀ ਗਈ ਕਈ ਬਿਲੀਅਨ ਡਾਲਰਾਂ ਦੀ ਰਾਸ਼ੀ ਬਾਰੇ ਲੋੜੀਂਦੇ ਸਵਾਲ ਪੁੱਛ ਸਕਦੇ ਹਨ।
ਰੋਟਾ ਦਾ ਕਹਿਣਾ ਹੈ ਕਿ ਕਿਸੇ ਵੀ ਈਲੈਕਟਰੋਨਿਕ ਵੋਟਿੰਗ ਸਿਸਟਮ ਨੂੰ ਹਰੀ ਝੰਡੀ ਦੇਣ ਤੋਂ ਪਹਿਲਾਂ ਇਹ ਸੁਨਿਸ਼ਚਿਤ ਕਰਨਾ ਜ਼ਰੂਰੀ ਹੈ ਕਿ ਉਸ ਸਿਸਟਮ ਅਧੀਨ ਮੈਂਬਰਾਂ ਨੂੰ ਇਹ ਜਾਣਕਾਰੀ ਹੋਵੇ ਕਿ ਉਹ ਕਿਸ ਮੁੱਦੇ 'ਤੇ ਵੋਟ ਕਰ ਰਹੇ ਹਨ, ਕਿ ਹਾਊਸ ਉਹਨਾਂ ਦੀ ਪਹਿਚਾਣ ਦੀ ਪੜਤਾਲ ਕਰ ਸਕੇ, ਅਤੇ ਮੈਂਬਰਾਂ ਕੋਲ ਵੋਟ ਕਰਨ ਦੀ ਪ੍ਰਕਿਰਿਆ ਵਿੱਚ ਸ਼ਾਮਿਲ ਹੋਣ ਲਈ ਲੋੜੀਂਦਾ ਸਮਾਂ ਹੋਵੇ।
