ਕੈਨੇਡੀਅਨ ਸੰਸਦ ਦੇ ਨਵੇਂ ਸਪੀਕਰ ਦੀ ਅਗਵਾਈ 'ਚ ਹਾਊਸ ਦਾ ਰੈਗੂਲਰ ਸੈਸ਼ਨ ਅੱਜ ਤੋਂ ਸ਼ੁਰੂ

ਕੈਨੇਡੀਅਨ ਸੰਸਦ ਦੇ ਨਵੇਂ ਸਪੀਕਰ ਫਰਾਂਸਿਸ ਸਕਾਰਪੋਲੇਜਿਆ ਦੀ ਅਗਵਾਈ ਵਿਚ ਹਾਊਸ ਦਾ ਰੈਗੂਲਰ ਸੈਸ਼ਨ ਬੁੱਧਵਾਰ ਤੋਂ ਸ਼ੁਰੂ ਹੋ ਗਿਆ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅੱਜ ਆਪਣੇ ਪਹਿਲੇ ਪ੍ਰਸ਼ਨ ਕਾਲ ਦਾ ਸਾਹਮਣਾ ਕਰਨਗੇ। ਇਸ ਦੇ ਨਾਲ ਹੀ ਸਪੀਕਰ ਸਕਾਰਪੋਲੇਜਿਆ ਦੇ ਦਫ਼ਤਰ ਨੇ ਇਹ ਪੁਸ਼ਟੀ ਕੀਤੀ ਹੈ ਕਿ ਹਾਊਸ ਔਫ ਕੌਮਨਜ਼ ਦੇ ਸਾਰੇ 343 ਮੈਂਬਰ ਪਾਰਲੀਮੈਂਟ ਵਲੋਂ ਸਹੁੰ ਚੁੱਕੀ ਜਾ ਚੁੱਕੀ ਹੈ।

ਉਥੇ ਹੀ, ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਜੋ ਆਪਣੀ ਸੀਟ ਹਾਰ ਗਏ ਸਨ, ਉਹ ਦੋ ਦਹਾਕਿਆਂ ਵਿਚ ਪਹਿਲੀ ਵਾਰ ਹਾਊਸ ਆਫ਼ ਕਾਮਨਜ਼ ਤੋਂ ਗੈਰਹਾਜ਼ਰ ਰਹਿਣਗੇ। ਉਹਨਾਂ ਦੀ ਵਾਪਸੀ ਤੱਕ ਪਾਰਟੀ ਦੀ ਹਾਊਸ ਵਿਚ ਕਮਾਨ ਐਂਡਰਿਊ ਸ਼ੀਰ ਸੰਭਾਲਣਗੇ, ਜੋ ਕੰਜ਼ਰਵੇਟਿਵ ਦੇ ਸਾਬਕਾ ਪ੍ਰਧਾਨ ਵੀ ਹਨ। ਸੰਸਦ ਦੇ ਮੌਜੂਦਾ ਸੈਸ਼ਨ ਵਿਚ ਮਿਡਲ ਕਲਾਸ ਲਈ ਇਨਕਮ ਟੈਕਸ ਦਰ ਵਿਚ ਕਟੌਤੀ ਨਾਲ ਸਬੰਧਤ ਬਿੱਲ ਜਲਦ ਪਾਸ ਕੀਤੇ ਜਾਣ ਦੀ ਉਮੀਦ ਹੈ।

ਕਾਰਨੀ ਨੇ ਚੋਣ ਕੰਪੇਨ ਦੌਰਾਨ ਸਭ ਤੋਂ ਘੱਟ ਨਿੱਜੀ ਇਨਕਮ ਟੈਕਸ ਦਰ ਨੂੰ 15 ਤੋਂ ਘਟਾ ਕੇ 14 ਫੀਸਦੀ ਕਰਨ ਦਾ ਵਾਅਦਾ ਕੀਤਾ ਸੀ ਅਤੇ ਇਸ ਨੂੰ ਜਲਦ ਪਾਸ ਕੀਤੇ ਜਾਣ ਦਾ ਜ਼ਿਕਰ ਕਿੰਗ ਚਾਰਲਸ ਵਲੋਂ ਸਿੰਘਸਣੀ ਭਾਸ਼ਣ (throne speech) ਵਿਚ ਵੀ ਕੀਤਾ ਗਿਆ ਸੀ। ਕਾਰਨੀ ਨੇ ਇਸ ਮਹੀਨੇ ਦੇ ਸ਼ੁਰੂ ਵਿਚ ਕਿਹਾ ਸੀ ਕਿ ਮਿਡਲ ਕਲਾਸ ਲਈ ਟੈਕਸ ਵਿਚ ਕਟੌਤੀ ਕੈਨੇਡਾ ਡੇਅ ਯਾਨੀ 1 ਜੁਲਾਈ ਤੋਂ ਲਾਗੂ ਕੀਤੀ ਜਾਵੇਗੀ।