ਕੈਨੇਡੀਅਨ ਸੰਸਦ ਵਿਚ ਟਰੂਡੋ ਦੀ ਸਰਕਾਰ ਖਿਲਾਫ ਕੰਜ਼ਰਵੇਟਿਵ ਪਾਰਟੀ ਦੇ ਅਵਿਸ਼ਵਾਸ ਮਤੇ 'ਤੇ ਬਹਿਸ ਜਾਰੀ

ਕੈਨੇਡੀਅਨ ਸੰਸਦ ਵਿਚ ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਖਿਲਾਫ ਕੰਜ਼ਰਵੇਟਿਵ ਪਾਰਟੀ ਦੇ ਅਵਿਸ਼ਵਾਸ ਪ੍ਰਸਤਾਵ'ਤੇ ਬਹਿਸ ਹੋ ਰਹੀ ਹੈ। ਐਨ.ਡੀ.ਪੀ.ਵਲੋਂ ਸਮਝੌਤਾ ਸਮਾਪਤ ਕੀਤੇ ਜਾਣ ਮਗਰੋਂ ਲਿਬਰਲਸ ਦੀ ਘੱਟ ਗਿਣਤੀ ਸਰਕਾਰ ਲਈ ਇਹ ਪਹਿਲੀ ਪ੍ਰੀਖਿਆ ਹੈ। ਹਾਲਾਂਕਿ,ਬਲਾਕ ਕਿਊਬੇਕੋਇਸ ਅਤੇ ਐਨ.ਡੀ.ਪੀ.ਇਹ ਪਹਿਲਾਂ ਹੀ ਕਹਿ ਚੁੱਕੇ ਹਨ ਕਿ ਉਹ ਕੰਜ਼ਰਵੇਟਿਵ ਦੇ ਪ੍ਰਸਤਾਵ ਦਾ ਸਮਰਥਨ ਨਹੀਂ ਕਰਨਗੇ, ਜਿਸ ਦੇ ਚੱਲਦੇ ਹਾਊਸ ਆਫ ਕਾਮਨਜ਼ ਦੀ ਕਾਰਵਾਈ ਹੰਗਾਮੇਦਾਰ ਰਹਿਣ ਦੇ ਆਸਾਰ ਹਨ।

ਮੁੱਖ ਵਿਰੋਧੀ ਧਿਰ ਦੇ ਇਸ ਅਵਿਸ਼ਵਾਸ ਪ੍ਰਸਤਾਵ 'ਤੇ ਬੁੱਧਵਾਰ ਨੂੰ ਵੋਟਿੰਗ ਹੋਵੇਗੀ। ਉਥੇ ਹੀ, ਲਿਬਰਲਸ ਨਾਲ ਸਮਝੌਤਾ ਤੋੜਨ ਤੋਂ ਬਾਅਦ ਵੀ ਟਰੂਡੋ ਦੀ ਘੱਟ ਗਿਣਤੀ ਸਰਕਾਰ ਨੂੰ ਸੰਸਦ ਵਿਚ ਸਮਰਥਨ ਦੇਣ ਦੀ ਗੱਲ ਆਖ ਚੁੱਕੇ ਜਗਮੀਤ ਸਿੰਘ ਲਗਾਤਾਰ ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਦੇ ਨਿਸ਼ਾਨੇ 'ਤੇ ਹਨ।

ਹਾਲਾਂਕਿ, ਇਸ ਵਾਰ ਦੀ ਵੋਟਿੰਗ ਵਿਚ ਲਿਬਰਲਸ ਸਰਕਾਰ ਦੇ ਡਿੱਗਣ ਦਾ ਖ਼ਤਰਾ ਨਹੀਂ ਹੈ ਪਰ ਕੰਜ਼ਰਵੇਟਿਵ ਕੋਲ ਵੀਰਵਾਰ ਨੂੰ ਅਵਿਸ਼ਵਾਸ ਪ੍ਰਸਤਾਵ ਪੇਸ਼ ਕਰਨ ਦਾ ਇੱਕ ਹੋਰ ਮੌਕਾ ਹੋਵੇਗਾ। ਪੋਲੀਵਰੇ ਦਾ ਇਲਜ਼ਾਮ ਹੈ ਕਿ ਜਗਮੀਤ ਸਿੰਘ ਨੇ ਵਿਨੀਪੈਗ ਦੀ ਜ਼ਿਮਨੀ ਚੋਣ ਤੋਂ ਐਨ ਪਹਿਲਾਂ ਲਿਬਰਲਸ ਨਾਲੋਂ ਸਮਝੌਤਾ ਤੋੜਨ ਦਾ ਸਿਰਫ ਸਟੰਟ ਕੀਤਾ ਸੀ।