ਹਡਸਨ ਬੇਅ 1 ਜੂਨ ਤੱਕ 8,000 ਕਰਮਚਾਰੀਆਂ ਨੂੰ ਕੱਢੇਗਾ, ਸਾਰੇ ਸਟੋਰ ਕਰੇਗਾ ਬੰਦ

ਕੈਨੇਡਾ ਵਿਚ ਵੱਡੀ ਗਿਣਤੀ ਵਿਚ ਲੋਕਾਂ ਦੀ ਨੌਕਰੀਆਂ ਜਾਣ ਵਾਲੀਆਂ ਹਨ, ਦੇਸ਼ ਦੀ ਸਭ ਤੋਂ ਪੁਰਾਣੀ ਕੰਪਨੀ ਹਡਸਨ ਬੇਅ ਨੇ ਐਤਵਾਰ ਤੱਕ ਸਾਰੇ ਸਟੋਰ ਬੰਦ ਕਰਨ ਦੀ ਘੋਸ਼ਣਾ ਕੀਤੀ ਹੈ, ਜਿਸ ਨਾਲ ਇਸ ਦੇ 8,000 ਤੋਂ ਵੱਧ ਕਰਮਚਾਰੀ ਬੇਰੁਜ਼ਗਾਰ ਹੋ ਜਾਣਗੇ।

ਹਡਸਨ ਬੇਅ ਨੇ ਕਿਹਾ ਹੈ ਕਿ ਉਹ 1 ਜੂਨ ਤੱਕ ਆਪਣੇ 8,347 ਜਾਂ 89 ਫੀਸਦੀ ਕਰਮਚਾਰੀਆਂ ਨੂੰ ਨੌਕਰੀਓਂ ਕੱਢ ਦੇਵੇਗੀ। ਉਥੇ ਹੀ, ਬਾਕੀ ਰਹਿੰਦੇ ਕਰਮਚਾਰੀਆਂ ਵਿਚੋਂ ਕਰੀਬ 899 ਨੂੰ 15 ਜੂਨ ਦੇ ਆਸਪਾਸ ਟਰਮੀਨੇਟ ਕਰ ਦਿੱਤਾ ਜਾਵੇਗਾ।

ਗੌਰਤਲਬ ਹੈ ਕਿ ਹਡਸਨ ਬੇਅ 355 ਸਾਲ ਪੁਰਾਣੀ ਕੰਪਨੀ ਹੈ, ਇਸ ਨੇ ਪੈਨਡੇਮਿਕ ਘਾਟੇ ਤੋਂ ਹੌਲੀ ਰਿਕਵਰੀ, ਘੱਟ ਟ੍ਰੈਫਿਕ ਅਤੇ ਅਮਰੀਕਾ ਨਾਲ ਟੈਰਿਫ ਵਾਰ ਦਾ ਹਵਾਲਾ ਦਿੰਦੇ ਹੋਏ ਮਾਰਚ ਵਿਚ ਲੈਣਦਾਰ ਦੀ ਸੁਰੱਖਿਆ ਲਈ ਫਾਇਲ ਕੀਤਾ ਸੀ।

ਹਡਸਨ ਬੇਅ ਦੇ ਕੈਨੇਡਾ ਭਰ ਵਿਚ 80 ਸਟੋਰ ਹਨ ਜਿਨ੍ਹਾਂ ਨੂੰ ਕੰਪਨੀ ਬੰਦ ਕਰ ਰਹੀ ਹੈ। ਇਸ ਦਾ ਕਹਿਣਾ ਹੈ ਕਿ ਉਹ ਇਨ੍ਹਾਂ ਸਟੋਰਾਂ ਨੂੰ ਚਲਾਉਣ ਲਈ ਲੋੜੀਂਦਾ ਫੰਡ ਜੁਟਾਉਣ ਵਿਚ ਅਸਫਲ ਰਹੀ।