19.28C Vancouver 19.28C VancouverJan 19, 2023 1:42 AM - Connect News
ਬੀ.ਸੀ. 'ਚ ਪੋਰਟ ਮੂਡੀ ਦੇ ਇਲਾਕੇ ਦੀ ਟਰੀਨਾ ਹੰਟ ਦੇ ਕਤਲ ਮਾਮਲੇ 'ਚ ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ/ਆਈ.ਹਿਟ ਨੇ ਦੱਸਿਆ ਹੈ ਕਿ ਮਾਮਲੇ 'ਚ ਜਾਂਚ ਜਾਰੀ ਹੈ।
ਅੱਜ ਟਰੀਨਾ ਹੰਟ ਨੂੰ ਲਾਪਤਾ ਰਿਪੋਰਟ ਕੀਤਿਆਂ 2 ਸਾਲ ਹੋ ਚੁੱਕੇ ਹਨ।
18 ਜਨਵਰੀ 2021 ਨੂੰ 48 ਸਾਲਾ ਟਰੀਨਾ ਹੰਟ ਨੂੰ ਲਾਪਤਾ ਰਿਪੋਰਟ ਕੀਤਾ ਗਿਆ ਸੀ ਅਤੇ ਉਸੇ ਸਾਲ 29 ਮਾਰਚ ਨੂੰ ਜਾਂਚ ਅਧਿਕਾਰੀਆਂ ਨੂੰ ਹੋਪ ਦੇ ਕੋਲ ਸਿਲਵਰ ਕਰੀਕ ਦੇ ਕੋਲ ਟਰੀਨਾ ਹੰਟ ਦਾ ਮ੍ਰਿਤ ਸ਼ਰੀਰ ਮਿਲਿਆ।
ਟਰੀਨਾ ਹੰਟ ਦੇ ਪਰਿਵਾਰ ਨੇ ਉਸ ਦੇ ਲਾਪਤਾ ਹੋਇਆਂ 2 ਸਾਲ ਪੂਰੇ ਹੋਣ 'ਤੇ ਇੱਕ ਬਿਆਨ ਜਾਰੀ ਕੀਤਾ ਹੈ।
ਉਸ ਦੇ ਭਰਾ ਬਰੈਡ ਈਬੌਟ ਨੇ ਕਿਹਾ ਕਿ ਟਰੀਨਾ ਦੇ ਲਾਪਤਾ ਹੋਣ ਤੋਂ ਉਸ ਦਾ ਮ੍ਰਿਤ ਸ਼ਰੀਰ ਮਿਲਣ ਤੱਕ ਅਤੇ ਅੱਜ ਘਟਨਾ ਨੂੰ 2 ਸਾਲ ਹੋਣ ਤੱਕ ਦਾ ਸਫਰ ਬੇਹੱਦ ਮੁਸ਼ਕਿਲ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਇਸ ਮੁਸ਼ਕਿਲ ਸਮੇਂ ਦੌਰਾਨ ਜਿਸ ਢੰਗ ਨਾਲ ਲੋਕਾਂ ਨੇ ਉਨ੍ਹਾਂ ਦਾ ਸਾਥ ਦਿੱਤਾ ਹੈ, ਉਸ ਦੇ ਲਈ ਉਹ ਸਭ ਦਾ ਧੰਨਵਾਦ ਕਰਨਾ ਚਾਹੁੰਦੇ ਹਨ।
ਟਰੀਨਾ ਹੰਟ ਦੇ ਪਰਿਵਾਰ ਨੇ $50,000 ਦੇ ਇਨਾਮ ਦੀ ਜਾਣਕਾਰੀ ਵੀ ਮੁੜ ਦੋਹਰਾਈ ਕਿ ਮਾਮਲੇ 'ਚ ਨਵੀਂ ਅਤੇ ਪੁਖਤਾ ਜਾਣਕਾਰੀ ਦੇਣ ਵਾਲੇ ਨੂੰ ਇਹ ਰਾਸ਼ੀ ਪ੍ਰਦਾਨ ਕੀਤੀ ਜਾਵੇਗੀ।
ਪਰਿਵਾਰ ਨੇ ਇਨਾਮ ਸੰਬੰਧੀ ਫੇਸਬੁੱਕ 'ਤੇ ਸਾਂਝੀ ਕੀਤੀ ਜਾਣਕਾਰੀ 'ਚ ਦੱਸਿਆ ਕਿ ਟਰੀਨਾ ਹੰਟ ਦੇ ਪਤੀ ਈਅਨ ਹੰਟ ਨੇ ਇਸ ਇਨਾਮ 'ਚ ਕੋਈ ਯੋਗਦਾਨ ਨਹੀਂ ਪਾਇਆ ਹੈ।
ਮਾਮਲੇ 'ਚ ਫਿਲਹਾਲ ਕਿਸੇ ਵਿਅਕਤੀ 'ਤੇ ਕਤਲ ਸੰਬੰਧੀ ਦੋਸ਼ ਨਹੀਂ ਲੱਗੇ ਹਨ।
ਪੋਰਟ ਮੂਡੀ 'ਚ ਹੌਥੋਰਨ ਡਰਾਈਵ 'ਤੇ ਰਹਿਣ ਵਾਲੀ ਟਰੀਨਾ ਹੰਟ ਦੇ ਸਾਬਕਾ ਘਰ ਕੋਲ ਉਸ ਨੂੰ ਹੁਣ ਵੀ ਸ਼ਰਧਾਂਜਲੀ ਪੇਸ਼ ਕੀਤੀ ਜਾ ਰਹੀ ਹੈ।
ਮੌਕੇ 'ਤੇ 'ਜਸਟਿਸ ਫਾਰ ਟਰੀਨਾ' ਦੇ ਪੋਸਟਰ ਵੀ ਲਗਾਏ ਗਏ ਹਨ।
ਮੌਕੇ 'ਤੇ ਫੁੱਲਾਂ ਦੇ ਗੁਲਦਸਤੇ ਰੱਖ ਟਰੀਨਾ ਨੂੰ ਯਾਦ ਕੀਤਾ ਜਾ ਰਿਹਾ ਹੈ।
