13.79C Vancouver 13.79C VancouverSep 20, 2023 7:40 PM - The Canadian Press
ਰਿਟੇਲ ਰਿਪੋਰਟ ਵਿੱਚ ਸਾਹਮਣੇ ਆਇਆ ਹੈ ਕਿ ਗੈਰ-ਕਾਨੂੰਨੀ ਤੰਬਾਕੂ ਦੀ ਵਿਕਰੀ ਕਾਰਨ ਚਾਰ ਸਾਲਾਂ ਵਿੱਚ ਬ੍ਰਿਟਿਸ਼ ਕੋਲੰਬੀਆ, ਓਨਟੇਰੀਓ ਅਤੇ ਨਿਊਫ਼ਿਨਲੈਂਡ ਅਤੇ ਲੈਬਰਾਡੋਰ ਦੀਆਂ ਸਰਕਾਰਾਂ ਨੂੰ ਟੈਕਸ ਮਾਲੀਏ ਵਿੱਚ $2.47 ਬਿਲੀਅਨ ਤੱਕ ਦਾ ਨੁਕਸਾਨ ਹੋਇਆ ਹੈ।
ਕਨਵੀਨੀਐਂਸ ਇੰਡਸਟਰੀ ਕਾਉਂਸਿਲ ਆਫ਼ ਕੈਨੇਡਾ ਨੇ ਬੁੱਧਵਾਰ ਨੂੰ ਜਾਰੀ ਕੀਤੀ ਰਿਪੋਰਟ ਵਿੱਚ 2019 ਤੋਂ ਕਾਨੂੰਨੀ ਤੰਬਾਕੂ ਦੀ ਵਿਕਰੀ ਵਿੱਚ ਗਿਰਾਵਟ ਦੀ ਜਾਂਚ ਤਿੰਨ ਸੂਬਿਆਂ ਵਿੱਚ ਕੀਤੀ ਗਈ ਹੈ।
72 ਪੰਨਿਆਂ ਦੀ ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਇਹ ਸਿਗਰਟਾਂ ਗੈਰ-ਕਾਨੂੰਨੀ ਤੌਰ 'ਤੇ ਵੇਚੀਆਂ ਜਾਂਦੀਆਂ ਹਨ।
ਇਨ੍ਹਾਂ ਨੂੰ ਟੈਕਸ ਅਤੇ ਡਿਊਟੀ ਮੁਕਤ, ਬਿਨਾਂ ਕਿਸੇ ਹੈਲਥ ਕੈਨੇਡਾ ਦੇ ਨਿਯਮਾਂ ਜਾਂ ਕਿਸੇ ਜਾਂਚ ਦੇ ਕਾਨੂੰਨੀ ਤੰਬਾਕੂ ਦੀਆਂ ਕੀਮਤਾਂ ਦੇ ਇੱਕ ਹਿੱਸੇ ਲਈ ਰਿਟੇਲ ਵਿੱਚ ਵੇਚਿਆ ਜਾਂਦਾ ਹੈ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਗੈਰ-ਕਾਨੂੰਨੀ ਡਰੱਗ ਨਾਲੋਂ ਗੈਰ-ਕਾਨੂੰਨੀ ਸਿਗਰਟ ਵੇਚਣ 'ਚ ਜ਼ਿਆਦਾ ਮੁਨਾਫਾ ਹੁੰਦਾ ਹੈ ਅਤੇ ਸਿਗਰਟ ਨਾਲ ਫੜੇ ਜਾਣ 'ਤੇ ਸਜ਼ਾ ਘੱਟ ਹੁੰਦੀ ਹੈ।
ਇਸ ਅੰਦਾਜ਼ੇ ਮੁਤਾਬਿਕ ਬੀ.ਸੀ. ਨੂੰ 2019 ਅਤੇ 2022 ਦਰਮਿਆਨ ਗੈਰ-ਕਾਨੂੰਨੀ ਵਿਕਰੀ ਕਾਰਨ ਤੰਬਾਕੂ ਟੈਕਸ ਮਾਲੀਏ ਵਿੱਚ $215 ਮਿਲੀਅਨ ਤੋਂ $591 ਮਿਲੀਅਨ ਦਾ ਨੁਕਸਾਨ ਹੋਇਆ ਹੈ।
ਓਨਟੇਰੀਓ ਦਾ ਨੁਕਸਾਨ $990 ਮਿਲੀਅਨ ਅਤੇ $1.8 ਬਿਲੀਅਨ ਦੇ ਵਿਚਕਾਰ ਸੀ ਤੇ ਨਿਊਫ਼ਿਨਲੈਂਡ ਵਿੱਚ $25 ਮਿਲੀਅਨ ਅਤੇ $81 ਮਿਲੀਅਨ ਦੇ ਵਿਚਕਾਰ ਹੋਇਆ ਹੈ।
ਗੈਰ-ਕਾਨੂੰਨੀ ਸਿਗਰੇਟ ਦੀ ਵਿਕਰੀ ਓਨਟੇਰੀਓ ਦੀ ਮਾਰਕੀਟ ਦਾ 67 ਪ੍ਰਤੀਸ਼ਤ, ਬੀ ਸੀ ਵਿੱਚ 45 ਪ੍ਰਤੀਸ਼ਤ ,ਨਿਊਫ਼ਿਨਲੈਂਡ ਵਿੱਚ 44 ਫੀਸਦੀ ਹੈ। ਕਨਵੀਨੀਐਂਸ ਇੰਡਸਟਰੀ ਕਾਉਂਸਿਲ ਦੀ ਰਿਪੋਰਟ ਵਿੱਚ ਪੰਜ ਸਿਫ਼ਾਰਸ਼ਾਂ ਕੀਤੀਆਂ ਗਈਆਂ ਹਨ।
ਜਿਸ ਵਿੱਚ ਗੈਰ-ਕਾਨੂੰਨੀ ਤੰਬਾਕੂ ਦੀ ਤਸਕਰੀ ਲਈ ਜੁਰਮਾਨੇ ਦੀ ਮੰਗ ਕਰਨਾ, ਤੰਬਾਕੂ ਦੀ ਗੈਰ ਕਾਨੂੰਨੀ ਵਿਕਰੀ ਦਾ ਮੁਕਾਬਲਾ ਕਰਨ ਲਈ ਪੁਲਿਸ ਸਰੋਤਾਂ ਨੂੰ ਵਧਾਉਣਾ, ਇਸ ਮੁੱਦੇ ਨੂੰ ਸੰਘੀ ਅਤੇ ਸੂਬਾਈ ਨਿਆਂ ਅਧਿਕਾਰੀਆਂ ਦੀ ਪ੍ਰਮੁੱਖ ਤਰਜੀਹ ਬਣਾਉਣਾ ਸ਼ਾਮਲ ਹੈ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਸਿਗਰਟਨੋਸ਼ੀ ਦੀਆਂ ਦਰਾਂ ਨੂੰ ਘਟਾਉਣ ਦੀ ਕੋਸ਼ਿਸ਼ ਵਿੱਚ ਸੰਘੀ ਅਤੇ ਸੂਬਾਈ ਸਰਕਾਰਾਂ ਨੇ ਕਾਨੂੰਨੀ ਤੰਬਾਕੂ ਪ੍ਰੋਡਕਸ 'ਤੇ ਟੈਕਸ ਵਧਾ ਦਿੱਤਾ ਹੈ।
ਜਿਸ ਤੋਂ ਬਾਅਦ ਸਿਗਰਟ ਪੀਣ ਵਾਲਿਆਂ ਨੇ ਗੈਰ ਕਾਨੂੰਨੀ ਮਾਰਕੀਟ ਵੱਲ ਰੁੱਖ ਕੀਤਾ ਹੈ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਬੀ ਸੀ ਵਿੱਚ 200 ਸਿਗਰਟਾਂ ਦੇ ਇੱਕ ਕਾਨੂੰਨੀ ਡੱਬੇ ਦੀ $155 ਦੀ ਕੀਮਤ ਹੈ ਪਰ ਉਸੇ ਮਾਤਰਾ ਵਿੱਚ ਗੈਰ ਕਾਨੂੰਨੀ ਤੌਰ 'ਤੇ ਤੰਬਾਕੂ ਦੀ ਕੀਮਤ $30 ਅਤੇ $50 ਦੇ ਵਿਚਕਾਰ ਹੈ।
ਬੀ ਸੀ ਵਿੱਚ 20 ਕਾਨੂੰਨੀ ਸਿਗਰਟਾਂ ਦੇ ਪੈਕੇਜ ਨੂੰ $15 ਅਤੇ $21 ਦੇ ਵਿਚਕਾਰ ਵੇਚਿਆ ਜਾਂਦਾ ਹੈ।
ਪਰ ਗੈਰ ਕਾਨੂੰਨੀ ਤੌਰ 'ਤੇ $5 ਅਤੇ $7 ਦੇ ਵਿਚਕਾਰ ਵੇਚੀ ਜਾਂਦੀ ਹੈ।
