ਕਿਊੂਬੈਕ ਦੇ ਕਈ ਖ਼ੇਤਰਾਂ ਦੀ ਆਬਾਦੀ ’ਚ ਹੋਇਆ ਰਿਕਾਰਡ ਵਾਧਾ

ਕਿਊਬੈਕ ਦੇ ਸਟੈਟੇਟਿਕਸ ਇੰਸਟੀਚਿਊਟ ਦੀ ਇੱਕ ਨਵੀਂ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਸੂਬੇ ਦੇ ਬਹੁਤ ਸਾਰੇ ਖੇਤਰਾਂ ਵਿਚ 2023 ਅਤੇ 2024 ਵਿਚਕਾਰ ਇਮੀਗ੍ਰੇਸ਼ਨ ਕਾਰਨ ਆਬਾਦੀ ਵਿਚ ਰਿਕਾਰਡ ਵਾਧਾ ਦਰਜ ਕੀਤਾ ਗਿਆ ਹੈ। ਮਾਂਟਰੀਅਲ ਇਸ ਮਾਮਲੇ ਵਿਚ ਸਭ ਤੋਂ ਅੱਗੇ ਰਿਹਾ, ਜਿੱਥੇ ਜੁਲਾਈ 2023 ਅਤੇ ਜੁਲਾਈ 2024 ਵਿਚਕਾਰ 91,000 ਤੋਂ ਵੱਧ ਲੋਕ ਆਬਾਦੀ ਵਿਚ ਸ਼ਾਮਲ ਹੋਏ, ਜੋ ਕਿ ਕਿਊਬੈਕ ਦੇ ਕਿਸੇ ਵੀ ਖੇਤਰ ਵਿਚ ਦਰਜ ਕੀਤਾ ਗਿਆ ਹੁਣ ਤੱਕ ਦਾ ਸਭ ਤੋਂ ਵੱਡਾ ਵਾਧਾ ਹੈ।

ਉਥੇ ਹੀ, ਕਿਊਬੈਕ ਸਿਟੀ ਨੇ 2.4 ਫੀਸਦੀ ਦੀ ਆਬਾਦੀ ਦੇ ਵਾਧੇ ਨਾਲ ਨਵਾਂ ਰਿਕਾਰਡ ਕਾਇਮ ਕੀਤਾ। ਕਿਊਬੈਕ ਦੇ ਸਟੈਟੇਟਿਕਸ ਇੰਸਟੀਚਿਊਟ ਦਾ ਕਹਿਣਾ ਹੈ ਕਿ ਇਹ ਵਾਧਾ ਜ਼ਿਆਦਾਤਰ ਇਮੀਗ੍ਰੇਸ਼ਨ ਅਤੇ ਖਾਸ ਕਰਕੇ ਅਸਥਾਈ ਇਮੀਗ੍ਰੇਸ਼ਨ ਕਾਰਨ ਹੈ।

ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਅਸਥਾਈ ਕਾਮੇ, ਅੰਤਰਰਾਸ਼ਟਰੀ ਵਿਦਿਆਰਥੀ ਅਤੇ ਪਨਾਹ ਮੰਗਣ ਵਾਲੇ ਵਰਗੇ ਗੈਰ-ਸਥਾਈ ਨਿਵਾਸੀਆਂ ਦੀ ਗਿਣਤੀ ਸਾਰੇ ਖੇਤਰਾਂ ਵਿਚ ਨਵੇਂ ਸਥਾਈ ਨਿਵਾਸੀਆਂ ਤੋਂ ਵੱਧ ਪਾਈ ਗਈ ਅਤੇ ਆਬਾਦੀ ਦੇ ਵਾਧੇ ਵਿਚ ਵੀ ਇਨ੍ਹਾਂ ਦਾ ਹੀ ਸਭ ਤੋਂ ਵੱਡਾ ਯੋਗਦਾਨ ਹੈ।