ਅਸਥਾਈ ਵੀਜ਼ਿਆਂ ’ਚ ਕਟੌਤੀ ਨੂੰ ਲੈ ਕੇ ਮਾਂਟਰੀਅਲ ’ਚ ਮਿਲਣਗੇ ਇਮੀਗ੍ਰੇਸ਼ਨ ਮੰਤਰੀ

ਕੈਨੇਡਾ ਵਿਚ ਅਸਥਾਈ ਨਿਵਾਸੀ ਦੀ ਗਿਣਤੀ ਘਟਾਉਣ ਸਬੰਧੀ ਫੈਡਰਲ ਅਤੇ ਸੂਬਿਆਂ ਦੇ ਇਮੀਗ੍ਰੇਸ਼ਨ ਮਿਨਿਸਟਰਾਂ ਦੀ ਮੀਟਿੰਗ ਸ਼ੁੱਕਰਵਾਰ ਨੂੰ ਮਾਂਟਰੀਅਲ ਵਿਚ ਹੋ ਰਹੀ ਹੈ। ਫੈਡਰਲ ਸਰਕਾਰ ਦੇ ਮਿਨਿਸਟਰ ਮਾਰਕ ਮਿਲਰ ਦੀ ਸੂਬਾਈ ਅਤੇ ਖੇਤਰੀ ਇਮੀਗ੍ਰੇਸ਼ਨ ਮਿਨਿਸਟਰਸ ਨਾਲ ਇਹ ਪਹਿਲੀ ਆਹਮੋ-ਸਾਹਮਣੇ ਮੀਟਿੰਗ ਹੈ। ਸਰਕਾਰ ਦਾ ਉਦੇਸ਼ 2027 ਤੱਕ ਅਸਥਾਈ ਨਿਵਾਸੀ ਦੀ ਗਿਣਤੀ ਨੂੰ ਕੈਨੇਡਾ ਦੀ ਆਬਾਦੀ ਦੇ 5 ਫੀਸਦੀ ਤੱਕ ਲਿਆਉਣਾ ਹੈ, ਜੋ 2023 ਵਿਚ 6.2 ਫੀਸਦੀ ਤੱਕ ਨੂੰ ਛੂਹ ਚੁੱਕੀ ਹੈ। ਸਰਕਾਰ ਮੁਤਾਬਕ, 2018 ਵਿਚ 337,460 ਅਸਥਾਈ ਕੰਮ ਵੀਜ਼ਾ ਧਾਰਕ ਸਨ। 2022 ਤੱਕ ਇਹ ਗਿਣਤੀ ਵੱਧ ਕੇ 605,851 ਹੋ ਗਈ।

ਮਿਨਿਸਟਰਸ ਦਾ ਫੋਕਸ ਹੁਣ ਇਸ ’ਤੇ ਹੈ ਕਿ ਅਸਥਾਈ ਵੀਜ਼ੇ ਕਿਵੇਂ ਘੱਟ ਕੀਤੇ ਜਾਣ, ਜਿਸ ’ਤੇ ਰੁਜ਼ਗਾਰਦਾਤਾ ਹੁਣ ਤੱਕ ਨਿਰਭਰ ਕਰਦੇ ਆਏ ਹਨ। ਸੀ.ਆਈ.ਬੀ.ਸੀ. ਅਰਥ ਸ਼ਾਸਤਰ ਦੇ ਕਾਰਜਕਾਰੀ ਨਿਰਦੇਸ਼ਕ ਐਂਡਰਿਊ ਗ੍ਰਾਂਥਮ ਨੇ ਪਿਛਲੇ ਮਹੀਨੇ ਪ੍ਰਕਾਸ਼ਿਤ ਇੱਕ ਰਿਪੋਰਟ ਵਿਚ ਕਿਹਾ ਸੀ ਕਿ ਅਸਥਾਈ ਵੀਜ਼ੇ ਵਿਚ ਕਟੌਤੀ ਨਾਲ ਆਬਾਦੀ ਦੇ ਵਾਧੇ ਨੂੰ ਹੌਲੀ ਕਰਨ ਵਿਚ ਮਦਦ ਮਿਲੇਗੀ, ਜੋ ਹਾਊਸਿੰਗ ਦੀ ਲਾਗਤ ’ਤੇ ਕੁਝ ਦਬਾਅ ਘੱਟ ਕਰ ਸਕਦਾ ਹੈ ਪਰ ਇਸ ਦੇ ਨਤੀਜੇ ਵਜੋਂ ਲੇਬਰ ਦੀ ਘਾਟ ਵੀ ਹੋ ਸਕਦੀ ਹੈ।

ਉਥੇ ਹੀ, ਕੰਪਨੀਆਂ ਨੂੰ ਕਰਮਚਾਰੀ ਕਾਇਮ ਰੱਖਣ ਲਈ ਵੱਧ ਤਨਖ਼ਾਹ ਦੀ ਪੇਸ਼ਕਸ਼ ਕਰਨੀ ਪੈ ਸਕਦੀ ਹੈ ਅਤੇ ਉਨ੍ਹਾਂ ਫਰਮਾਂ ਲਈ ਮਾਰਕੀਟ ਵਿਚ ਬਣੇ ਰਹਿਣਾ ਮੁਸ਼ਕਲ ਹੋਵੇਗਾ ਜੋ ਲਾਭਦਾਇਕ ਨਹੀਂ ਹਨ ਅਤੇ ਘੱਟ ਤਨਖ਼ਾਹ ਵਾਲੇ ਵਿਦੇਸ਼ੀ ਕਾਮੇ ’ਤੇ ਡਿਪੈਂਡ ਹਨ। ਇਮੀਗ੍ਰੇਸ਼ਨ ਮਿਨਿਸਟਰਸ ਦੀ ਮੀਟਿੰਗ ਵਿਚ ਮੁੱਖ ਮੁੱਦਾ ਲੇਬਰ ਦਾ ਹੋਵੇਗਾ ਅਤੇ ਅਸਥਾਈ ਵੀਜ਼ੇ ਸਬੰਧੀ ਨਵੇਂ ਟੀਚੇ ਬਾਰੇ ਘੋਸ਼ਣਾ ਸਤੰਬਰ ਵਿਚ ਕੀਤੀ ਜਾਵੇਗੀ।