ਮਿਡਲ ਕਲਾਸ ਲਈ ਇਨਕਮ ਟੈਕਸ ਵਿਚ ਕਟੌਤੀ ਭਲਕੇ ਤੋਂ ਹੋਵੇਗੀ ਲਾਗੂ: ਮਾਰਕ ਕਾਰਨੀ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਮਿਡਲ ਕਲਾਸ ਲਈ ਇਨਕਮ ਟੈਕਸ ਵਿਚ ਕਟੌਤੀ ਭਲਕੇ ਤੋਂ ਲਾਗੂ ਹੋਣ ਦਾ ਐਲਾਨ ਕੀਤਾ ਹੈ। ਸਰਕਾਰ ਵਲੋਂ ਸਭ ਤੋਂ ਘੱਟ ਨਿੱਜੀ ਆਮਦਨ ਟੈਕਸ ਦਰ ਨੂੰ 15 ਤੋਂ ਘਟਾ ਕੇ 14 ਫੀਸਦੀ ਕੀਤਾ ਗਿਆ ਹੈ। ਕਾਰਨੀ ਸਰਕਾਰ ਦੇ ਅਨੁਮਾਨ ਮੁਤਾਬਕ, 22 ਮਿਲੀਅਨ ਕੈਨੇਡੀਅਨਾਂ ਨੂੰ ਇਸ ਦਾ ਫਾਇਦਾ ਹੋਵੇਗਾ।

ਪੀ. ਐੱਮ. ਕਾਰਨੀ ਨੇ ਇਲੈਕਸ਼ਨ ਕੰਪੇਨ ਦੌਰਾਨ ਇਸ ਦਾ ਵਾਅਦਾ ਕੀਤਾ ਸੀ ਅਤੇ ਉਨ੍ਹਾਂ ਚੋਣਾਂ ਤੋਂ ਬਾਅਦ ਕਿਹਾ ਸੀ ਕਿ ਇਹ ਕਟੌਤੀ ਕੈਨੇਡਾ ਡੇਅ ਤੋਂ ਲਾਗੂ ਕਰ ਦਿੱਤੀ ਜਾਵੇਗੀ। ਇਹ ਟੈਕਸ ਕਟੌਤੀ ਦੋ ਸਭ ਤੋਂ ਘੱਟ ਟੈਕਸ ਬਰੈਕਟ 'ਤੇ ਲਾਗੂ ਹੋਵੇਗੀ, ਪਹਿਲਾ ਜਿਨ੍ਹਾਂ ਦੀ 2025 ਵਿਚ ਟੈਕਸਯੋਗ ਆਮਦਨ $114,750 ਤੱਕ ਹੈ ਅਤੇ ਦੂਜਾ ਜਿਨ੍ਹਾਂ ਦੀ ਇਨਕਮ ਪਹਿਲੀ ਬਰੈਕਟ ਵਿਚ $57,375 ਤੱਕ ਹੋਵੇਗੀ।

ਸਰਕਾਰ ਮੁਤਾਬਕ, 2026 ਵਿਚ ਰਿਟਰਨ ਦਾਖ਼ਲ ਕਰਦੇ ਸਮੇਂ ਪ੍ਰਤੀ ਵਿਅਕਤੀ ਨੂੰ ਵੱਧ ਤੋਂ ਵੱਧ $420 ਅਤੇ ਪ੍ਰਤੀ ਕਪਲ ਨੂੰ $840 ਦੀ ਬਚਤ ਹੋਵੇਗੀ। ਇਸ ਕਟੌਤੀ ਨਾਲ 2025-26 ਦੇ ਫਿਸਕਲ ਸਾਲ ਤੋਂ 5 ਸਾਲਾਂ ਵਿਚ ਸਰਕਾਰ ਨੂੰ ਨਿੱਜੀ ਆਮਦਨ ਟੈਕਸ ਰੈਵੇਨਿਊ ਵਿਚ $27 ਬਿਲੀਅਨ ਦਾ ਨੁਕਸਾਨ ਹੋਵੇਗਾ।