ਭਾਰਤ ਨੇ 2030 ਤੱਕ ਵਾਧੂ 2 ਅਰਬ ਟਨ ਕਾਰਬਨ ਜ਼ਬਤੀ ਦਾ ਟੀਚਾ ਮਿਥਿਆ, ਜਾਵਡੇਕਰ ਨੇ ਆਖਿਆ

ਵਾਤਾਵਰਣ, ਜੰਗਲਾਤ ਅਤੇ ਮੌਸਮ ਤਬਦੀਲੀ ਕੇਂਦਰੀ ਮੰਤਰੀ ਪ੍ਰਕਾਸ਼ ਜਾਵਡੇਕਰ ਨੇ ਅੱਜ ਵੀਰਵਾਰ ਨੂੰ, 2030 ਤੱਕ 2 ਅਰਬ ਵਾਧੂ ਕਾਰਬਨ ਜ਼ਬਤੀ ਕਰਨ ਦਾ ਟੀਚਾ ਮਿਥਿਆ ਹੈ।

ਮੀਡੀਆ ਨਾਲ ਗੱਲ ਕਰਦਿਆਂ, ਜਾਵਡੇਕਰ ਨੇ ਆਖਿਆ,"ਭਾਰਤ ਨੇ 2030 ਤੱਕ ਵਾਧੂ 2 ਅਰਬ ਟਨ ਕਾਰਬਨ ਜ਼ਬਤੀ ਦਾ ਟੀਚਾ ਮਿਥਿਆ ਹੈ। ਨਰੇਂਦਰ ਮੋਦੀ ਦੀ ਸਰਕਾਰ ਦੇ ਬੀਤੇ 7 ਸਾਲਾਂ ਵਿੱਚ, ਦਰਖ਼ਤਾਂ ਨਾਲ ਜੰਗਲਾਤ ਅਤੇ ਜੰਗਲਾਤ ਤੋਂ ਬਾਹਰ 15,000 ਸਕਿ. ਕਿਮੀ. ਦਾ ਖੇਤਰ ਵਾਧਾ ਕੀਤਾ ਹੈ।"

ਉਹਨਾਂ ਆਖਿਆ,"ਮੈਨੂੰ ਯਕੀਨ ਹੈ ਕਿ ਅਸੀਂ ਨਾ-ਵਰਤਨਯੋਗ ਜ਼ਮੀਨ ਦਾ 26 ਅਰਬ ਹੈਕਟੇਅਰ ਖੇਤਰ ਮੁੜ ਰੀਸਟੋਰ ਕਰਾਂਗੇ, ਜੋ ਕਾਰਬਨ ਜ਼ਬਤੀ 'ਚ ਯੋਗਦਾਨ ਪਾਵੇਗਾ। ਅਸੀਂ ਅਜਿਹੀ ਜ਼ਮੀਨ ਨੂੰ ਕਈ ਤਰਾਂ ਰੀਸਟੋਰ ਕਰਾਂਗੇ, ਜਿਵੇਂ ਕਿ ਉੱਥੇ ਬੂਟੇ ਲਾ ਕੇ ਉਨ੍ਹਾਂ ਦਾ ਖ਼ਿਆਲ ਰੱਖ ਕੇ। ਇਹ ਅਸੀਂ ਆਉਣ ਵਾਲੇ 10 ਸਾਲਾਂ ਦਾ ਸੁਪਨਾ ਵੇਖਿਆ ਹੈ ਅਤੇ ਮੈਂ ਸਮਝਦਾ ਹਾਂ ਕਿ ਅਸੀਂ ਆਪਣਾ ਟੀਚਾ ਪੂਰਾ ਕਰ ਲਵਾਂਗੇ।"

ਅੱਜ ਵਣ ਮਹਾਉਤਸਵ ਦੇ ਮੌਕੇ, ਆਪਣੇ ਘਰ ਵਿੱਚ ਮੰਤਰੀ ਨੇ 'ਪਾਰਿਜਾਤ' ਦਾ ਬੂਟਾ ਲਾਇਆ ਅਤੇ ਕਿਹਾ,"ਅੱਜ ਭਾਰਤ ਵਿੱਚ ਵਣ ਮਹਾਉਤਸਵ ਦੀ ਸ਼ੁਰੂਆਤ ਹੋਈ ਹੈ। ਇਹ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਬੂਟੇ ਲਾਉਣ ਅਤੇ ਉਨ੍ਹਾਂ ਦੇ ਵਧਣ ਦਾ ਇਹ ਸਹੀ ਮੌਸਮ ਹੈ।"

ਸਿਰਫ਼ ਬੂਟੇ ਲਾਉਣ ਨਾਲ ਹੀ ਇਹ ਮੁੱਦਾ ਖ਼ਤਮ ਨਹੀਂ ਹੋ ਜਾਂਦਾ, ਇਹ ਕਹਿੰਦਿਆਂ ਉਨ੍ਹਾਂ ਆਖਿਆ,"ਹੁਣ ਸਿਰਫ਼ ਬੂਟੇ ਲਾਉਣਾ ਹੀ ਜ਼ਰੂਰੀ ਨਹੀਂ ਹੈ; ਬੂਟੇ ਲਾ ਕੇ 3 ਸਾਲਾਂ ਤੱਕ ਉਹਨਾਂ ਦੇ ਵਾਧੇ ਦਾ ਖ਼ਿਆਲ ਵੀ ਰੱਖਣਾ ਪੈਣਾ ਹੈ, ਜਦੋਂ ਤੱਕ ਕਿ ਉਹ ਆਪਣੀਆਂ ਲੋੜਾਂ ਆਪ ਪੂਰੀਆਂ ਕਰਨ ਯੋਗ ਨਹੀਂ ਹੋ ਜਾਂਦੇ, ਇਹ ਅਹਿਮ ਹੈ।"

ਉਹਨਾਂ ਅੱਗੇ ਆਖਿਆ,"ਜੰਗਲਾਤ ਵਿਓਂਤ ਵਿੱਚ ਹੁਣ ਰਵਾਇਤੀ ਦਰਖ਼ਤ, ਲੱਕੜ ਦੇਣ ਵਾਲੇ ਦਰਖ਼ਤ,ਉੱਚੇ ਦਰਖ਼ਤ ਅਤੇ ਹੋਰ ਕਈ ਤਰਾਂ ਦੇ ਦਰਖ਼ਤ ਸ਼ਾਮਲ ਹਨ। ਸਾਡੇ ਕੋਲ ਪਹਿਲਾਂ ਹੀ ਕਾਫ਼ੀ ਕੁਝ ਰਲਿਆ-ਮਿਲਿਆ ਹੈ, ਪਰ ਹੁਣ ਅਸੀਂ ਇਸ 'ਤੇ ਖ਼ਾਸ ਧਿਆਨ ਦੇਵਾਂਗੇ।"

ਦੱਸਣਯੋਗ ਹੈ ਕਿ ਜੰਗਲ ਉਤਸਵ ਜਾਂ ਵਣ ਮਹਾਂਉਤਸਵ, ਭਾਰਤ ਵਿੱਚ ਬੂਟੇ ਲਾਉਣ ਦਾ ਸਲਾਨਾ ਜਸ਼ਨ ਹੈ|

ਇਹ ਜੁਲਾਈ ਦੇ ਪਹਿਲੇ ਹਫ਼ਤੇ ਮਨਾਇਆ ਜਾਂਦਾ ਹੈ ਅਤੇ ਮੌਨਸੂਨ ਦੇ ਆਉਣ ਨਾਲ ਇਹ ਬੂਟੇ ਲਾਉਣ ਦਾ ਸਹੀ ਸਮਾਂ ਵੀ ਹੈ।

1950 ਵਿੱਚ ਇਸਨੂੰ ਕੌਮੀ ਤਿਉਹਾਰ ਦੇ ਤੌਰ 'ਤੇ ਮਨਾਇਆ ਜਾਣ ਲੱਗਾ।