10.29C Vancouver 10.29C VancouverJun 3, 2021 3:17 PM -
ਭਾਰਤ ਦੇ ਵਿਦੇਸ਼ ਮਾਮਲਿਆਂ ਦੇ ਮਹਿਕਮੇ ਨੇ ਅੱਜ ਵੀਰਵਾਰ ਨੂੰ ਆਖਿਆ,"ਭਾਰਤ ਭਗੌੜੇ ਹੀਰਾ ਵਪਾਰੀ ਮੇਹੁਲ ਚੋਕਸੀ ਨੂੰ ਮੁਲਕ ਵਾਪਸ ਲਿਆਉਣ ਲਈ ਕੋਸ਼ਿਸ਼ਾਂ ਜਾਰੀ ਰੱਖੇਗਾ।"
ਐਮਈਏ ਦੇ ਬੁਲਾਰੇ ਅਰਿੰਦਮ ਬਾਗਚੀ ਨੇ ਕਿਹਾ,"ਭਾਰਤ ਭਗੌੜੇ ਨੂੰ ਵਾਪਸ ਲਿਆਉਣ ਦੀਆਂ ਕੋਸ਼ਿਸ਼ਾਂ ਵਿੱਚ ਦ੍ਰਿੜ੍ਹ ਹੈ। ਇਸ ਵੇਲੇ ਮੇਹੁਲ ਚੋਕਸੀ ਡੋਮੀਨੀਕਾ ਦੀ ਹਿਰਾਸਤ ਵਿੱਚ ਹੈ ਅਤੇ ਕੁਝ ਕਾਨੂੰਨੀ ਕਾਰਵਾਈ ਚੱਲ ਰਹੀ ਹੈ। ਅਸੀਂ ਇਹ ਸੁਨਿਸ਼ਚਿਤ ਕਰਨਾ ਜਾਰੀ ਰਖਾਂਗੇ ਕਿ ਉਸਨੂੰ ਬਹਾਤ ਵਾਪਸ ਲਿਆਇਆ ਜਾਵੇ।"
ਦੱਸਣਯੋਗ ਹੈ ਕਿ ਚੋਕਸੀ 23 ਮਈ ਨੂੰ ਡਿਨਰ ਲਈ ਨਿਕਲਿਆ ਸੀ ਅਤੇ ਐਂਟੀਗੁਆ ਤੋਂ ਲਾਪਤਾ ਹੋ ਗਿਆ ਸੀ ਅਤੇ ਐਂਟੀਗੁਆ ਪੁਲਿਸ ਵੱਲੋਂ ਬੀਤੇ ਮਹੀਨੇ ਕੀਤੀ ਗਈ ਭਾਲ ਵਿੱਚ ਮੇਹੁਲ ਚੋਕਸੀ ਛੇਤੀ ਹੀ ਡੋਮਿਨਿਕਾ ਤੋਂ ਫੜਿਆ ਗਿਆ ਸੀ।
ਡੋਮੀਨੀਕਾ ਪੁਲਿਸ ਨੇ ਉਸ ਦੇ ਮੁਲਕ ਵਿੱਚ ਅਵੈਧ ਤਰੀਕੇ ਨਾਲ ਦਾਖ਼ਲ ਹੋਣ ਦਾ ਇਲਜ਼ਾਮ ਲਾਇਆ ਸੀ, ਜਦੋਂ ਚੋਕਸੀ ਭਾਰਤ ਨੂੰ ਆਪਣੀ ਹਵਾਲਗੀ ਤੋਂ ਬਚਣ ਦੀ ਕੋਸ਼ਿਸ਼ ਦੇ ਤਹਿਤ ਐਂਟੀਗੁਆ ਅਤੇ ਬਾਰਬੁਡਾ ਭੱਜਿਆ ਸੀ।
ਵੀਰਵਾਰ ਨੂੰ ਇੱਕ ਡੋਮਨਿਕਨ ਅਦਾਲਤ ਵੱਲੋਂ ਮੇਹੁਲ ਚੋਕਸੀ ਦੀ ਜ਼ਮਾਨਤ ਦੀ ਅਰਜ਼ੀ ਨਾਮੰਜ਼ੂਰ ਕਰ ਦਿੱਤੀ ਗਈ।
ਸੁਣਵਾਈ ਦੌਰਾਨ ਜੱਜ ਬਰਨੀ ਸਟੀਫੈਨਸ ਨੇ ਆਖਿਆ ਕਿ ਭਗੌੜੇ ਵਪਾਰੀ ਨੂੰ ਮੈਜਿਸਟ੍ਰੇਟ ਅਦਾਲਤ ਵਿੱਚ ਆਪਣੇ ਡੋਮੀਨੀਕਾ 'ਚ ਗ਼ੈਰ-ਕਾਨੂੰਨੀ ਦਾਖ਼ਲੇ ਲਈ ਜਵਾਬਦੇਹ ਹੋਣਾ ਚਾਹੀਦਾ ਹੈ।
ਜ਼ਿਕਰਯੋਗ ਹੈ ਕਿ ਚੋਕਸੀ ਅਤੇ ਉਸਦਾ ਭਤੀਜਾ ਨੀਰਵ ਮੋਦੀ ਪੰਜਾਬ ਨੈਸ਼ਨਲ ਬੈਂਕ ਦੇ 13 ,500 ਕਰੋੜ ਰੁਪਏ ਦੇ ਘਪਲੇ ਵਿੱਚ ਦੋਸ਼ੀ ਹਨ।
ਚੋਕਸੀ ਮੁਲਕ ਛੱਡ ਕੇ ਭੱਜ ਗਿਆ ਸੀ। ਜਨਵਰੀ 2018 ਵਿੱਚ ਉਸਨੇ ਐਂਟੀਗੁਆ ਅਤੇ ਬਾਰਬੁਡਾ ਦੀ ਨਾਗਰਿਕਤਾ ਲੈ ਲਈ ਸੀ।
ਇਸ ਵੇਲੇ ਉਹ ਭਾਰਤ ਨੂੰ ਹਵਾਲਗੀ ਤੋਂ ਬਚਣ ਲਈ ਕਾਨੂੰਨੀ ਲੜਾਈ ਲੜ ਰਿਹਾ ਹੈ।
ਇਸ ਦਰਮਿਆਨ, ਇਸ ਭਗੌੜੇ ਹੀਰਾ ਵਪਾਰੀ ਦੇ ਵਕੀਲ ਵਿਜੈ ਅੱਗਰਵਾਲ ਨੇ ਬੁੱਧਵਾਰ ਨੂੰ ਆਖਿਆ ਸੀ ਕਿ ਚੋਕਸੀ ਦਾ ਅਪਹਰਣ ਕੀਤਾ ਗਿਆ ਸੀ, ਉਹ ਆਪਣੀ ਮਰਜ਼ੀ ਨਾਲ ਡੋਮੀਨੀਕਾ ਨਹੀਂ ਗਿਆ ਸੀ|
ਉਸਨੇ ਅੱਗੇ ਆਖਿਆ ਕਿ ਡੋਮੀਨਿਕਨ ਅਦਾਲਤ ਸਾਹਮਣੇ ਇਹੀ ਮੁੱਦਾ ਹੈ ਕਿ ਉਹ ਡੋਮੀਨੀਕਾ ਵੈਧ ਤਰੀਕੇ ਗਿਆ ਸੀ ਜਾਂ ਨਹੀਂ, ਅਤੇ ਕਿ ਸਥਾਨਕ ਪੁਲਿਸ ਕੋਲ ਉਸਨੂੰ ਹਿਰਾਸਤ ਵਿੱਚ ਰੱਖਣ ਦਾ ਹੱਕ ਹੈ ਜਾਂ ਨਹੀਂ?
