ਮੋਂਟਰੀਅਲ ਦੇ ਇਤਿਹਾਸਕ ਇਲਾਕੇ ਵਿਚ ਪੁਰਾਣੀ ਇਮਾਰਤ ’ਚ ਸ਼ੱਕੀ ਅੱਗ, ਇਕ ਵਿਅਕਤੀ ਹਸਪਤਾਲ ਦਾਖ਼ਲ

ਮੋਂਟਰੀਅਲ ਪੁਲਿਸ ਵੱਲੋਂ ਓਲਡ ਮੋਂਟਰੀਅਲ ਦੇ ਇਤਿਹਾਸਕ ਇਲਾਕੇ ਵਿਚ ਅੱਜ ਸਵੇਰੇ ਲੱਗੀ ਭਾਰੀ ਅੱਗ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਹ ਅੱਗ ਇਕ ਸੌ ਸਾਲ ਪੁਰਾਣੀ ਇਮਾਰਤ ਵਿਚ ਲੱਗੀ, ਜਿਸ ਵਿਚ ਇਕ ਵਿਅਕਤੀ ਨੂੰ ਜਲਣਾਂ ਕਾਰਨ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ ਅਤੇ ਇਕ ਹੋਰ ਵਿਅਕਤੀ ਨੂੰ ਸ਼ਾਕ ਕਾਰਨ ਇਲਾਜ ਮਿਲਿਆ।

ਇਹ ਅੱਗ ਸਵੇਰੇ 2:40 ਵਜੇ ਦੇ ਕਰੀਬ ਨੋਤਰ-ਦਾਮ ਸਟਰੀਟ ਈਸਟ ’ਤੇ ਮੌਜੂਦ ਇਕ ਇਮਾਰਤ ਦੇ ਜ਼ਮੀਨੀ ਤਲ ’ਤੇ ਲੱਗੀ, ਜਿੱਥੇ ਇਕ ਰੈਸਟੋਰੈਂਟ ਚੱਲਦਾ ਸੀ। ਉੱਪਰੀ ਮੰਜ਼ਿਲਾਂ ਨੂੰ ਛੋਟੇ ਸਮੇਂ ਦੇ ਕਿਰਾਏ ਲਈ ਵਰਤਿਆ ਜਾ ਰਿਹਾ ਸੀ। ਅੱਗ ਦਾ ਕਾਰਨ ਹਜੇ ਤੱਕ ਪਤਾ ਨਹੀਂ ਲੱਗ ਸਕਿਆ, ਪਰ ਪੁਲਿਸ ਨੇ ਮਾਮਲੇ ਨੂੰ ਸ਼ੱਕੀ ਮੰਨਦਿਆਂ ਜਾਂਚ ਆਪਣੇ ਹੱਥ ਵਿਚ ਲੈ ਲਈ ਹੈ।

ਲਗਭਗ 125 ਅੱਗ ਬੁਝਾਉਣ ਵਾਲੇ ਕਰਮਚਾਰੀ ਮੌਕੇ ’ਤੇ ਤਾਇਨਾਤ ਕੀਤੇ ਗਏ, ਜਿਨ੍ਹਾਂ ਨੇ ਘੰਟਿਆਂ ਦੀ ਮਿਹਨਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ। ਧੂੰਆ ਕਈ ਬਲਾਕਾਂ ਤੱਕ ਫੈਲ ਗਿਆ, ਜਿਸ ਨਾਲ ਇਲਾਕੇ ਦੀ ਹਵਾ ਗਾੜ੍ਹੀ ਹੋ ਗਈ।

ਸ਼ਹਿਰ ਦੇ ਰਿਕਾਰਡ ਅਨੁਸਾਰ, ਇਹ ਇਮਾਰਤ 1923 ਵਿਚ ਬਣੀ ਸੀ ਅਤੇ ਇਸਦੇ ਮਾਲਕ ਇਮੀਲ ਬੈਨਾਮੋਰ ਹਨ। ਬੈਨਾਮੋਰ ਉਸ ਵਿਰਾਸਤੀ ਇਮਾਰਤ ਦੇ ਮਾਲਕ ਵੀ ਹਨ ਜੋ ਮਾਰਚ 2023 ਵਿਚ ਅੱਗ ਕਾਰਨ ਨਸ਼ਟ ਹੋ ਗਈ ਸੀ, ਜਿਸ ਵਿਚ ਸੱਤ ਲੋਕਾਂ ਦੀ ਮੌਤ ਹੋਈ ਸੀ।

ਪੁਲਿਸ ਅਤੇ ਅੱਗ ਵਿਭਾਗ ਦੇ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਜਾਂਚ ਦੌਰਾਨ ਇਹ ਵੀ ਦੇਖਿਆ ਜਾਵੇਗਾ ਕਿ ਦੋਵੇਂ ਅੱਗਾਂ ਵਿਚ ਕੋਈ ਸਬੰਧ ਹੈ ਜਾਂ ਨਹੀਂ।