17.97C Vancouver 17.97C VancouverMay 22, 2024 2:49 PM - The Canadian Press
ਕੈਨੇਡਾ ਸਰਕਾਰ ਨੇ ਇੰਟਰਪੋਲ ਦੀ ਮਦਦ ਨਾਲ ਦੁਨੀਆ ਭਰ ਵਿਚ ਚੋਰੀ ਹੋਏ ਵਾਹਨਾਂ ਦਾ ਪਤਾ ਲਗਾਇਆ ਹੈ। ਵਰਲਡ ਵਾਈਡ ਪੁਲਿਸ ਦੇ ਸੰਗਠਨ ਇੰਟਰਪੋਲ ਦਾ ਕਹਿਣਾ ਹੈ ਕਿ ਫਰਵਰੀ ਤੋਂ ਲੈ ਕੇ ਹੁਣ ਤੱਕ ਦੁਨੀਆ ਭਰ ਵਿਚ ਹਰ ਹਫ਼ਤੇ 200 ਤੋਂ ਵੱਧ ਕੈਨੇਡਾ ਤੋਂ ਚੋਰੀ ਹੋਏ ਵਾਹਨ ਲੱਭੇ ਗਏ ਹਨ। ਅੰਤਰਰਾਸ਼ਟਰੀ ਕਾਨੂੰਨ ਲਾਗੂ ਕਰਨ ਵਾਲੀ ਏਜੰਸੀ ਨੇ ਖੁਲਾਸਾ ਕੀਤਾ ਕਿ ਫਰਵਰੀ ਤੋਂ ਹੁਣ ਤੱਕ ਅਜਿਹੇ ਕੁੱਲ 1,500 ਤੋਂ ਵੱਧ ਕੈਨੇਡੀਅਨ ਵਾਹਨਾਂ ਦੀ ਪਛਾਣ ਕੀਤੀ ਗਈ ਹੈ।
ਏਜੰਸੀ ਨੇ ਕਿਹਾ ਕਿ ਆਰ.ਸੀ. ਐੱਮ.ਪੀ. ਵਲੋਂ ਚੋਰੀ ਹੋਏ ਵਾਹਨਾਂ ਲਈ ਕੈਨੇਡਾ ਦੇ ਡੇਟਾਬੇਸ ਨੂੰ ਇੰਟਰਪੋਲ ਨਾਲ ਜੋੜਨ ਨਾਲ ਇਨ੍ਹਾਂ ਵਾਹਨਾਂ ਦਾ ਪਤਾ ਲਗਾਉਣ ਵਿਚ ਕਾਮਯਾਬੀ ਮਿਲੀ। ਇੰਟਰਪੋਲ 137 ਦੇਸ਼ਾਂ ਤੋਂ ਇਸ ਤਰ੍ਹਾਂ ਦੇ ਮਾਮਲਿਆਂ ਦੀ ਜਾਣਕਾਰੀ ਇਕੱਠੀ ਕਰਦਾ ਹੈ ਅਤੇ ਇਸ ਦੇ ਡਾਟਾਬੇਸ ਮੁਤਾਬਕ, ਇਸ ਸਾਲ ਹੁਣ ਤੱਕ ਚੋਰੀ ਹੋਏ ਵਾਹਨਾਂ ਦੇ ਮਾਮਲੇ ਵਿਚ ਕੈਨੇਡਾ ਦੁਨੀਆ ਦੇ ਪਹਿਲੇ 10 ਦੇਸ਼ਾਂ ਵਿਚ ਸ਼ਾਮਲ ਹੈ। ਰਿਪੋਰਟ ਮੁਤਾਬਕ, ਕੈਨੇਡਾ ਵਿਚ ਪ੍ਰਮੁੱਖ ਤੌਰ ’ਤੇ ਐੱਸ.ਯੂ.ਵੀ. ਅਤੇ ਕਰਾਸਓਵਰ ਵਰਗੇ ਉੱਚ ਕੀਮਤੀ ਮਾਡਲ ਟਾਰਗੇਟ ਹੁੰਦੇ ਹਨ, ਜੋ ਖਾਸ ਤੌਰ ’ਤੇ ਮਿਡਲ ਈਸਟ ਅਤੇ ਵੈਸਟ ਅਫ਼ਰੀਕਾ ਦੇ ਦੇਸ਼ਾਂ ਵਿਚ ਭੇਜੇ ਜਾਂਦੇ ਹਨ, ਜਿੱਥੇ ਉਨ੍ਹਾਂ ਨੂੰ ਮੁੜ ਵੇਚਿਆ ਜਾਂਦਾ ਹੈ।
ਇੰਟਰਪੋਲ ਦੇ ਸਕੱਤਰ ਜਨਰਲ ਜੁਰਗਨ ਸਟਾਕ ਨੇ ਅੱਜ ਇੱਕ ਨਿਊਜ਼ ਰੀਲੀਜ਼ ਵਿਚ ਕਿਹਾ ਕਿ ਚੋਰੀ ਹੋਏ ਵਾਹਨ ਅੰਤਰ-ਰਾਸ਼ਟਰੀ ਸੰਗਠਿਤ ਅਪਰਾਧਿਕ ਸਮੂਹ ਲਈ ਆਮਦਨ ਦਾ ਇੱਕ ਮਹੱਤਵਪੂਰਨ ਸਰੋਤ ਬਣ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਚੋਰੀ ਹੋਏ ਵਾਹਨਾਂ ਦੀ ਵਰਤੋਂ ਨਾ ਸਿਰਫ ਡਰੱਗਜ਼ ਦੀ ਸਪਲਾਈ ਲਈ ਕੀਤੀ ਜਾਂਦੀ ਹੈ ਸਗੋਂ ਹੋਰ ਅਪਰਾਧਿਕ ਨੈੱਟਵਰਕ ਲਈ ਭੁਗਤਾਨ ਵਜੋਂ ਵੀ ਕੀਤੀ ਜਾਂਦੀ ਹੈ।
