19.92C Vancouver 19.92C VancouverMay 17, 2024 5:56 PM - The Associated Press
ਇਜ਼ਰਾਈਲੀ ਫੌਜ ਨੇ ਹਮਾਸ ਵਲੋਂ 7 ਅਕਤੂਬਰ ਨੂੰ ਹਮਲੇ ਦੌਰਾਨ ਬੰਧਕ ਬਣਾਏ ਗਏ ਤਿੰਨ ਲੋਕਾਂ ਦੀਆਂ ਲਾਸ਼ਾਂ ਗਾਜ਼ਾ ਦੇ ਦੱਖਣੀ ਸ਼ਹਿਰ ਰਫਾਹ ਵਿਚ ਬਰਾਮਦ ਕੀਤੇ ਜਾਣ ਦੀ ਪੁਸ਼ਟੀ ਕੀਤੀ ਹੈ। ਜਿਨ੍ਹਾਂ ਲੋਕਾਂ ਦੀਆਂ ਲਾਸ਼ ਮਿਲੀਆਂ ਉਨ੍ਹਾਂ ਦੀ ਪਛਾਣ 22 ਸਾਲਾ ਸਨੀ ਲੋਕ, 28 ਸਾਲਾ ਅਮਿਤ ਬਸਕੀਲਾ ਅਤੇ 56 ਸਾਲਾ ਇਤਸ਼ਾਕ ਗੈਲਰਨਟਰ ਦੇ ਰੂਪ ਵਿਚ ਹੋਈ ਹੈ।
ਇਜ਼ਰਾਇਲੀ ਫੌਜ ਦਾ ਮੰਨਣਾ ਹੈ ਕਿ ਹਮਾਸ ਵਲੋਂ ਇਹ ਤਿੰਨੋਂ ਮਾਰ ਦਿੱਤੇ ਗਏ ਸਨ। ਲੋਕਲ ਰਿਪੋਰਟਸ ਮੁਤਾਬਕ, ਇਹ ਲਾਸ਼ਾਂ ਹਮਾਸ ਦੀ ਸੁਰੰਗ ਵਿਚੋਂ ਮਿਲੀਆਂ। ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਇਸ ਖ਼ਬਰ ਨੂੰ ਦਿਲ ਦਹਿਲਾਉਣ ਵਾਲੀ ਕਿਹਾ ਹੈ।
ਇਜ਼ਰਾਈਲੀ ਫੌਜ ਨੇ ਕਿਹਾ ਕਿ ਗਾਜ਼ਾ ਵਿਚ ਨਜ਼ਰਬੰਦ ਕੀਤੇ ਗਏ ਅੱਤਵਾਦੀਆਂ ਤੋਂ ਪੁੱਛਗਿੱਛ ਦੇ ਆਧਾਰ ’ਤੇ ਬੀਤੀ ਰਾਤ ਇੱਕ ਓਪਰੇਸ਼ਨ ਦੌਰਾਨ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ, ਇਨ੍ਹਾਂ ਵਿਚੋਂ ਸਨੀ ਲੋਕ ਜਰਮਨੀ ਦੀ ਟੂਰਸਿਟ ਸੀ, ਜੋ ਹਮਾਸ ਵਲੋਂ ਕੀਤੇ ਹਮਲੇ ਵਾਲੇ ਦਿਨ ਇਜ਼ਰਾਇਲ ਵਿਚ ਗਾਜ਼ਾ ਸਰੱਹਦ ਕੋਲ ਆਯੋਜਿਤ ਇੱਕ ਮਿਊਜ਼ਿਕ ਫੈਸਟੀਵਲ ਵਿਚ ਸ਼ਾਮਲ ਸੀ। ਇਜ਼ਰਾਈਲ ਦਾ ਕਹਿਣਾ ਹੈ ਕਿ ਗਾਜ਼ਾ ਵਿਚ 100 ਦੇ ਕਰੀਬ ਲੋਕ ਅਜੇ ਵੀ ਬੰਧਕ ਹਨ ਅਤੇ ਨਾਲ ਹੀ ਲਗਭਗ 30 ਹੋਰਾਂ ਦੀਆਂ ਲਾਸ਼ਾਂ ਵੀ ਹਨ।
