ਪੀ. ਐੱਮ. ਵਜੋਂ ਚੋਣ ਲੜਨਗੇ ਜਗਮੀਤ ਸਿੰਘ, ਕਿਹਾ-'ਜਲਦ ਹੋ ਸਕਦੇ ਨੇ ਇਲੈਕਸ਼ਨ'

ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਆਉਣ ਵਾਲੀਆਂ ਫੈਡਰਲ ਇਲੈਕਸ਼ਨ ਵਿਚ ਪ੍ਰਧਾਨ ਮੰਤਰੀ ਉਮੀਦਵਾਰ ਵਜੋਂ ਚੋਣ ਲੜਨਗੇ। ਉਨ੍ਹਾਂ ਅੱਜ ਟੋਰੌਂਟੋ ਵਿਚ ਨਿਊਜ਼ ਕਾਨਫਰੰਸ ਦੌਰਾਨ ਇਸ ਦੀ ਘੋਸ਼ਣਾ ਕੀਤੀ। ਕੰਜ਼ਰਵੇਟਿਵ 'ਤੇ ਹਮਲਾ ਬੋਲਦੇ ਉਨ੍ਹਾਂ ਕਿਹਾ ਕਿ ਪੀਅਰੇ ਪੋਲੀਵਰੇ ਨੂੰ ਸਿਰਫ ਉਹੀ ਰੋਕ ਸਕਦੇ ਹਨ।

ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਉਹ ਜਾਣਦੇ ਹਨ ਕਿ ਟਰੂਡੋ ਨਾਲ ਸਮਝੌਤਾ ਖ਼ਤਮ ਕਰਨ ਦਾ ਮਤਲਬ ਹੈ ਕਿ ਇਲੈਕਸ਼ਨ ਕਦੇ ਵੀ ਹੋ ਸਕਦੇ ਹਨ ਅਤੇ ਉਹ ਇਸ ਲਈ ਤਿਆਰ ਹਨ, ਜਦੋਂ ਵੀ ਇਹ ਹੋਣਗੇ।

ਨਿਊਜ਼ ਕਾਨਫਰੰਸ ਵਿਚ ਜਗਮੀਤ ਸਿੰਘ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਪੀਅਰੇ ਪੋਲੀਵਰੇ 'ਤੇ ਜਮ ਕੇ ਵਰ੍ਹੇ। ਉਨ੍ਹਾਂ ਕਿਹਾ ਕਿ ਟਰੂਡੋ ਅਤੇ ਉਨ੍ਹਾਂ ਦੀ ਲਿਬਰਲ ਪਾਰਟੀ ਪੋਲੀਵਰੇ ਤੇ ਕੰਜ਼ਰਵੇਟਿਵ ਨੂੰ ਰੋਕਣ ਵਿਚ ਅਸਫਲ ਹੈ ਅਤੇ ਸਿਰਫ਼ ਐੱਨ. ਡੀ. ਪੀ. ਹੀ ਉਸ ਦਾ ਮੁਕਾਬਲਾ ਕਰ ਸਕਦੀ ਹੈ। ਜਗਮੀਤ ਸਿੰਘ ਨੇ ਕਿਹਾ ਕਿ ਇਹ ਇਲੈਕਸ਼ਨ ਚੋਇਸ 'ਤੇ ਹੋਣਗੇ, ਕੈਨੇਡੀਅਨ ਇਹ ਫੈਸਲਾ ਕਰਨਗੇ ਕਿ ਉਨ੍ਹਾਂ ਨੇ ਕਾਰਪੋਰੇਟ ਘਰਾਣਿਆਂ ਤੇ ਅਮੀਰ ਸੀ. ਈ. ਓਜ਼. ਦਾ ਸਮਰਥਨ ਕਰਨ ਵਾਲੇ ਕੰਜ਼ਰਵੇਟਿਵ ਅਤੇ ਡੈਂਟਲ ਕੇਅਰ ਤੇ ਫਾਰਮਾਕੇਅਰ ਲਿਆਉਣ ਵਰਗੇ ਕਦਮ ਚੁੱਕਣ ਵਾਲੀ ਐੱਨ. ਡੀ. ਪੀ. ਦੋਹਾਂ ਵਿਚੋਂ ਕਿਸ ਨੂੰ ਚੁਣਨਾ ਹੈ।