ਪ੍ਰਦਰਸ਼ਨਕਾਰੀਆਂ ਵਲੋਂ ਗਲਤ ਕੁਮੈਂਟਸ ਕੀਤੇ ਜਾਣ ਤੇ ਭੜਕੇ ਜਗਮੀਤ ਸਿੰਘ

ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੂੰ ਬੀਤੇ ਕੱਲ੍ਹ ਸੰਸਦ ਦੇ ਬਾਹਰ ਦੋ ਪ੍ਰਦਰਸ਼ਨਕਾਰੀਆਂ ਵਲੋਂ ਗਲਤ ਕੁਮੈਂਟਸ ਕੀਤੇ ਜਾਣ ਦੇ ਮਾਮਲੇ ਨੇ ਐਮਪੀ ਅਤੇ ਫੈਡਰਲ ਪਾਰਟੀ ਦੇ ਆਗੂਆਂ ਦੀ ਸਕਿਓਰਿਟੀ ਵਧਾਏ ਜਾਣ ਦੀ ਬਹਿਸ ਛੇੜ ਦਿੱਤੀ ਹੈ।

ਮੰਗਲਵਾਰ ਜਦੋਂ ਜਗਮੀਤ ਸਿੰਘ ਸੰਸਦ ਦੇ ਬਾਹਰ ਜਾ ਰਹੇ ਸਨ ਤਾਂ ਇੱਕ ਪ੍ਰਦਰਸ਼ਨਕਾਰੀ ਨੇ ਭੱਦੀ ਸ਼ਬਦਾਵਲੀ ਦੀ ਵਰਤੋਂ ਕਰਦਿਆਂ ਉਨ੍ਹਾਂ ਨੂੰ ਭ੍ਰਿਸ਼ਟ,ਕਮੀਨੇ ਕਿਹਾ। ਹਾਲਾਂਕਿ , ਜਿਵੇਂ ਹੀ ਜਗਮੀਤ ਸਿੰਘ ਪਿੱਛੇ ਮੁੜੇ ਤਾਂ ਉਨ੍ਹਾਂ ਨੇ ਦੋਵੇਂ ਪ੍ਰਦਰਸ਼ਨਕਾਰੀਆਂ ਨੂੰ ਘੇਰਦੇ ਹੋਏ ਪੁੱਛਿਆ ਕਿ ਅਜਿਹਾ ਕਿਸ ਨੇ ਕਿਹਾ ਤਾਂ ਉਹ ਮੁਕਰ ਗਏ।

ਇਸ 'ਤੇ ਐਨ.ਡੀ.ਪੀ. ਲੀਡਰ ਨੇ ਉਨ੍ਹਾਂ ਦੀ ਝਾੜ ਕਰਦੇ ਕਿਹਾ ਕਿ ਤੁਹਾਡੇ ਵਿਚ ਸਾਹਮਣੇ ਆਲੋਚਨਾ ਕਰਨ ਦੀ ਹਿੰਮਤ ਨਹੀਂ। ਇਹ ਪ੍ਰਦਰਸ਼ਨਕਾਰੀ ਜਗਮੀਤ ਸਿੰਘ ਨੂੰ ਇਹ ਵੀ ਕਹਿ ਰਹੇ ਸਨ ਕਿ ਉਹ ਟਰੂਡੋ ਖਿਲਾਫ ਅਵਿਸ਼ਵਾਸ ਮੋਸ਼ਨ ਦਾ ਸਮਰਥਨ ਕਰਨਗੇ ਜਾਂ ਨਹੀਂ?

ਜਗਮੀਤ ਸਿੰਘ ਨੇ ਦੇਰ ਸ਼ਾਮ ਸੋਸ਼ਲ ਮੀਡੀਆ ਪੋਸਟ ਵਿਚ ਬਿਆਨ ਜਾਰੀ ਕਰਦੇ ਕਿਹਾ ਕਿ ਪਿਛਲੇ ਕਈ ਦਿਨਾਂ ਤੋਂ ਓਟਾਵਾ ਵਿਚ ਗੁੰਡੇ ਨਫਰਤ ਫੈਲਾ ਰਹੇ ਹਨ ਅਤੇ ਉਨ੍ਹਾਂ ਕੈਨੇਡੀਅਨ ਨੂੰ ਪਰੇਸ਼ਾਨ ਕਰ ਰਹੇ ਹਨ ਜੋ ਉਨ੍ਹਾਂ ਦੇ ਵਿਚਾਰਾਂ ਨਾਲ ਸਹਿਮਤ ਨਹੀਂ।

ਜਗਮੀਤ ਨੇ ਇਸ ਦੇ ਨਾਲ ਹੀ ਪੀਅਰੇ ਪੋਲੀਵਰੇ 'ਤੇ ਵੀ ਹਮਲਾ ਬੋਲਿਆ, ਉਨ੍ਹਾਂ ਕਿਹਾ ਕਿ ਪੋਲੀਵਰੇ ਇਸੇ ਤਰ੍ਹਾਂ ਦਾ ਹੀ ਦੇਸ਼ ਚਾਹੁੰਦੇ ਹਨ।