ਜੇਸਨ ਕੈਨੀ ਅਸਤੀਫਾ ਦੇਣ ਵਾਲੇ ਐਲਬਰਟਾ ਦੇ ਸਾਬਕਾ ਪ੍ਰੀਮੀਅਰਾਂ ਦੀ ਸੂਚੀ 'ਚ ਹੋਏ ਸ਼ਾਮਲ

ਪ੍ਰੀਮੀਅਰ ਜੇਸਨ ਕੈਨੀ ਐਲਬਰਟਾ ਦੇ ਉਨ੍ਹਾਂ ਸਾਬਕਾ ਪ੍ਰੀਮੀਅਰਾਂ ਦੀ ਸੂਚੀ ਵਿਚ ਸ਼ਾਮਲ ਹੋ ਗਏ ਹਨ, ਜਿਨ੍ਹਾਂ ਪਾਰਟੀ ਵਿਚ ਵਿਵਾਦ ਦੌਰਾਨ ਅਸਤੀਫਾ ਦੇ ਦਿੱਤਾ ਸੀ।

ਜੇਸਨ ਕੈਨੀ ਨੇ ਪਾਰਟੀ ਦੀ ਲੀਡਰਸ਼ਿਪ ਰਿਵਿਊ ਵਿਚ 51.4 ਫ਼ੀਸਦ ਸਮਰਥਨ ਜਿੱਤਣ ਦੇ ਬਾਵਜੂਦ ਯੂਨਾਈਟਿਡ ਕੰਜ਼ਰਵੇਟਿਵ ਲੀਡਰ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਪਾਰਟੀ ਦੇ ਨਿਯਮਾਂ ਤਹਿਤ ਇਹ ਸਾਧਾਰਨ ਬਹੁਮਤ ਉਨ੍ਹਾਂ ਦੇ ਲੀਡਰ ਬਣੇ ਰਹਿਣ ਲਈ ਕਾਫੀ ਸੀ ਪਰ ਕੈਨੀ ਨੇ ਨਤੀਜਿਆਂ ਤੋਂ ਨਾਖੁਸ਼ੀ ਪ੍ਰਗਟਾਈ।

ਦੱਸ ਦੇਈਏ ਕਿ 1992 ਤੋਂ ਪ੍ਰੋਗ੍ਰੈਸਿਵ ਕੰਜ਼ਰਵੇਟਿਵ ਦੇ ਲੀਡਰ ਵਜੋਂ ਲਗਾਤਾਰ ਚਾਰ ਵਾਰ ਸਰਕਾਰ ਚਲਾਉਣ ਵਾਲੇ ਰਾਲਫ਼ ਕਲੇਨ ਨੇ ਮਾਰਚ 2006 ਵਿਚ ਅਸਤੀਫ਼ਾ ਦੇ ਦਿੱਤਾ ਸੀ, ਜਦੋਂ ਕਿ ਉਨ੍ਹਾਂ ਨੂੰ ਲੀਡਰਸ਼ਿਪ ਰਿਵਿਊ ਵਿਚ 55 ਫ਼ੀਸਦੀ ਸਮਰਥਨ ਮਿਲਿਆ ਸੀ।

ਉੱਥੇ ਹੀ, 2006 ਤੋਂ 2011 ਵਿਚਕਾਰ ਲੀਡਰ ਵਜੋਂ ਰਹੇ ਐਡ ਸਟੈਲਮੇਕ ਨੇ ਇਕਨੋਮੀ ਨੂੰ ਲੈ ਕੇ ਸੂਬੇ ਵਿਚ ਭੜਕੇ ਗੁੱਸੇ ਤੇ ਪਾਰਟੀ ਅੰਦਰੋਂ ਉੱਠੇ ਵਿਰੋਧੀ ਸੁਰਾਂ ਦੇ ਮੱਦੇਨਜ਼ਰ ਐਲਾਨ ਕਰ ਦਿੱਤਾ ਕਿ ਉਹ 2011 ਵਿਚ ਮੁੜ ਚੋਣ ਨਹੀਂ ਲੜਨਗੇ।

ਇਸੇ ਤਰ੍ਹਾਂ ਦੱਖਣੀ ਅਫਰੀਕਾ ਵਿਚ ਨੈਲਸਨ ਮੰਡੇਲਾ ਦੇ ਅੰਤਿਮ ਸੰਸਕਾਰ ਵਿਚ ਸ਼ਾਮਲ ਹੋਣ ਲਈ 45,000 ਡਾਲਰ ਦੇ ਖਰਚ ਨੂੰ ਲੈ ਕੇ ਘਿਰਨ ਮਗਰੋਂ ਐਲੀਸਨ ਰੈੱਡਫੋਰਡ ਨੇ ਮਾਰਚ 2014 ਵਿਚ ਅਸਤੀਫਾ ਦੇ ਦਿੱਤਾ ਸੀ।

ਜਿਮ ਪ੍ਰੈਂਟਿਸ ਨੂੰ 2015 ਦੀਆਂ ਚੋਣਾਂ ਵਿਚ ਉਨ੍ਹਾਂ ਦੀ ਪਾਰਟੀ ਨੂੰ ਨਿਊ ਡੈਮੋਕ੍ਰਿਟਸ ਤੋਂ ਮਿਲੀ ਹਾਰ ਮਗਰੋਂ ਅਸਤੀਫਾ ਦੇਣਾ ਪਿਆ। ਪ੍ਰੈਂਟਿਸ ਨੇ ਪਾਰਟੀ ਦੇ ਤੀਜੇ ਸਥਾਨ 'ਤੇ ਰਹਿਣ ਤੋਂ ਬਾਅਦ ਚੋਣ ਰਾਤ ਨੂੰ ਹੀ ਪਾਰਟੀ ਨੇਤਾ ਅਤੇ ਵਿਧਾਇਕ ਵਜੋਂ ਅਸਤੀਫਾ ਦੇ ਦਿੱਤਾ ਸੀ।