ਕੈਨੇਡਾ ਦੇ ਜੌਬ ਮੰਤਰੀ ਨੇ ਕੈਨੇਡਾ ਪੋਸਟ ਵਿਵਾਦ ਖਤਮ ਕਰਨ ਲਈ ਮੁੜ ਗੱਲਬਾਤ ਕਰਨ ਦਾ ਦਿੱਤਾ ਹੁਕਮ

ਕੈਨੇਡਾ ਦੀ ਜੌਬਸ ਅਤੇ ਫੈਮਿਲੀ ਮਿਨਿਸਟਰ ਪੈਟੀ ਹਾਜਦੂ ਨੇ ਕੈਨੇਡਾ ਪੋਸਟ ਅਤੇ ਡਾਕ ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਦੀ ਯੂਨੀਅਨ ਨੂੰ ਫੈਡਰਲ ਵਿਚੋਲਗੀ ਦੀ ਮਦਦ ਨਾਲ ਸੌਦੇਬਾਜ਼ੀ ਦੀ ਮੇਜ਼ 'ਤੇ ਵਾਪਸ ਜਾਣ ਦੇ ਹੁਕਮ ਦਿੱਤੇ ਹਨ। ਮਿਨਿਸਟਰ ਨੇ ਕਿਹਾ ਕਿ ਕਿਸੇ ਵੀ ਧਿਰ ਲਈ ਸਮਝੌਤੇ 'ਤੇ ਪਹੁੰਚਣ ਵਾਸਤੇ ਆਰਬਿਟਰੇਸ਼ਨ ਪਸੰਦੀਦਾ ਰਸਤਾ ਨਹੀਂ ਹੈ, ਇਸ ਲਈ ਗੱਲਬਾਤ ਦੇ ਯਤਨ ਜਾਰੀ ਰਹਿਣੇ ਚਾਹੀਦੇ ਹਨ।

ਹਾਜਦੂ ਨੇ ਕਿਹਾ ਕਿ ਕਿਸੇ ਹੱਲ 'ਤੇ ਪਹੁੰਚਣ ਲਈ ਤਤਕਾਲ ਕਦਮ ਚੁੱਕਣ ਦੀ ਲੋੜ ਹੈ ਅਤੇ ਫੈਡਰਲ ਵਿਚੋਲਗੀ ਦੋਵੇਂ ਧਿਰਾਂ ਨਾਲ ਗੱਲਬਾਤ ਲਈ ਇੰਤਜ਼ਾਰ ਵਿਚ ਹਨ। ਗੌਰਤਲਬ ਹੈ ਕਿ 55,000 ਪੋਸਟਲ ਵਰਕਰ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਅਤੇ ਕੈਨੇਡਾ ਪੋਸਟ 18 ਮਹੀਨਿਆਂ ਤੋਂ ਵੀ ਵੱਧ ਸਮੇਂ ਤੋਂ ਨਵੇਂ ਕੰਟਰੈਕਟ 'ਤੇ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ।

ਪਿਛਲੇ ਸਾਲ ਇਸ ਮੁੱਦੇ 'ਤੇ ਇੱਕ ਮਹੀਨਾ ਲੰਬੀ ਹੜਤਾਲ ਚੱਲੀ ਸੀ, ਜੋ ਸਰਕਾਰ ਦੇ ਦਖ਼ਲ ਨਾਲ ਸਮਾਪਤ ਹੋਈ ਸੀ। ਦੋਵੇਂ ਧਿਰਾਂ ਵਿਚਕਾਰ ਤਨਖਾਹਾਂ ਵਿਚ ਵਾਧੇ ਸਬੰਧੀ ਅਤੇ ਵੀਕੈਂਡ ਡਿਲੀਵਰੀ ਨੂੰ ਲੈ ਕੇ ਮਤਭੇਦ ਹਨ।