27.77C Vancouver 27.77C VancouverMay 29, 2020 10:44 PM -
ਅਮਰੀਕਾ 'ਚ ਡੈਮੋਕਰੈਟਿਕ ਪ੍ਰੈਜ਼ੀਡੈਸ਼ੀਅਲ ਦਾਵੇਦਾਰੀ ਲਈ ਪੱਕੇ ਮੰਨੇ ਜਾ ਰਹੇ ਜੋ ਬਾਈਡਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਜਾਰਜ ਫਲਾਇਡ ਦੇ ਪਰਿਵਾਰ ਨਾਲ ਗੱਲ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਉਹ ਮਾਮਲੇ 'ਚ ਇਨਸਾਫ਼ ਦੀ ਮੰਗ ਕਰ ਰਹੇ ਹਨ।
ਬਾਈਡਨ ਦੀਆਂ ਟਿੱਪਣੀਆਂ ਉਸ ਵੇਲੇ ਆਈਆਂ ਹਨ, ਜਦ ਮਿਨੇਸੋਟਾ ਪ੍ਰਾਸੀਕਿਊਟਰ ਨੇ ਇਸ ਮਾਮਲੇ 'ਚ ਇੱਕ ਪੁਲਿਸ ਅਫ਼ਸਰ 'ਤੇ ਆਰੋਪਾਂ ਦੀ ਪੁਸ਼ਟੀ ਕੀਤੀ ਹੈ।
ਉਸ ਅਫ਼ਸਰ 'ਤੇ ਇਲਜ਼ਾਮ ਤੈਅ ਕੀਤੇ ਗਏ ਹਨ, ਜਿਸ ਨੂੰ ਜਾਰਜ ਫਲਾਇਡ ਦੀ ਗਰਦਨ 'ਤੇ ਗੋਡੇ ਨਾਲ ਦਬਾਅ ਬਣਾਉਂਦੇ ਵੇਖਿਆ ਗਿਆ ਸੀ।
ਅਫ਼ਸਰ ਦੀ ਗ੍ਰਿਫਤਾਰੀ ਵੀ ਹੋ ਗਈ ਹੈ।
ਹੈਨੇਪੀਨ ਕਾਉਂਟੀ ਅਟੌਰਨੀ ਮਾਈਕ ਫ੍ਰੀਮੈਨ ਨੇ ਦੱਸਿਆ ਕਿ ਡੈਰੇਕ ਚੌਵਿਨ 'ਤੇ ਥਰਡ-ਡਿਗਰੀ ਕਤਲ ਅਤੇ ਮੈਨਸਲਾਟਰ ਦੇ ਇਲਜ਼ਾਮ ਲਗਾਏ ਗਏ ਹਨ।
ਇੱਕ ਛੋਟੇ ਸਮੇਂ ਦੀ ਔਨਲਾਈਨ ਗੱਲਬਾਤ ਦੌਰਾਨ ਅਮਰੀਕਾ ਦੇ ਸਾਬਕਾ ਉਪ-ਰਾਸ਼ਟਰਪਤੀ ਨੇ ਸਿਸਟਮ 'ਚ ਨਸਲਵਾਦ ਦੀ ਗੱਲ ਆਖੀ ਅਤੇ ਕਿਹਾ ਕਿ ਇਹ ਮੌਤ ਅਮਰੀਕਾ ਦੇ ਸਮਾਜ 'ਤੇ ਇੱਕ ਖੁੱਲ੍ਹਾ ਜ਼ਖ਼ਮ ਹੈ।
ਰਾਸ਼ਟਰਪਤੀ ਟ੍ਰੰਪ ਦਾ ਨਾਮ ਲਏ ਬਿਨਾ, ਬਾਈਡਨ ਨੇ ਕਿਹਾ ਕਿ ਇਹ ਸਹੀ ਸਮਾਂ ਨਹੀਂ ਹੈ ਕਿ ਹਿੰਸਾ ਨੂੰ ਵਧਾਵਾ ਦੇਣ ਵਾਲੇ ਟਵੀਟ ਕੀਤੇ ਜਾਣ।
