ਜੌਨ ਰਸਟੈਡ ਨੇ ਸਟੱਡੀ ਪਰਮਿਟ ਦੀ ਉਲੰਘਣਾ ਕਰਨ ਵਾਲੇ ਜ਼ੈਨ ਹੱਕ ਨੂੰ ਪਾਕਿਸਤਾਨ ਭੇਜਣ ਦਾ ਕੀਤਾ ਸਮਰਥਨ

ਬੀ.ਸੀ. ਦੀ ਮੁੱਖ ਵਿਰੋਧੀ ਧਿਰ ਦੇ ਪ੍ਰਧਾਨ ਜੌਨ ਰਸਟੈਡ ਨੇ ਸਟੱਡੀ ਪਰਮਿਟ ਦੀ ਉਲੰਘਣਾ ਕਰਨ ਵਾਲੇ ਜ਼ੈਨ ਹੱਕ ਨੂੰ ਪਾਕਿਸਤਾਨ ਵਾਪਸ ਭੇਜੇ ਜਾਣ ਦਾ ਸਮਰਥਨ ਕੀਤਾ ਹੈ। ਹੱਕ ਵਲੋਂ ਸਟੱਡੀ ਦੀ ਬਜਾਏ ਪ੍ਰਦਰਸ਼ਨਾਂ ਵਿਚ ਹਿੱਸਾ ਲੈਣ ਦਾ ਦੋਸ਼ ਹੈ।

2021 ਵਿਚ ਉਸ ਨੂੰ 17 ਪ੍ਰਦਰਸ਼ਨਕਾਰੀਆਂ ਦੇ ਨਾਲ ਬੁਰਾਰਡ ਬ੍ਰਿਜ ’ਤੇ ਵਿਰੋਧ ਪ੍ਰਦਰਸ਼ਨ ਦੇ ਮਾਮਲੇ ਵਿਚ ਗ੍ਰਿਫਤਾਰ ਕੀਤਾ ਗਿਆ ਸੀ, ਜਿਸ ਨੇ ਸੇਂਟ ਪੌਲ ਹਸਪਤਾਲ ਨੂੰ ਜਾਣ ਵਾਲੇ ਰਸਤੇ ਬੰਦ ਕਰ ਦਿੱਤੇ ਸਨ। ਰਸਟੈਡ ਨੇ ਕਿਹਾ ਕਿ ਜੇ ਤੁਸੀਂ ਬੀ.ਸੀ. ਵਿਚ ਪੜ੍ਹਨ ਲਈ ਆਉਂਦੇ ਹੋ ਤਾਂ ਤੁਹਾਨੂੰ ਇੱਥੇ ਕਾਨੂੰਨ ਤੋੜਨ ਦਾ ਕੋਈ ਹੱਕ ਨਹੀਂ।

ਬੀ. ਸੀ. ਵਿਚ ਜਲਵਾਯੂ ਕਾਰਕੁੰਨ ਵਜੋਂ ਉਭਰੇ ਜ਼ੈਨ ਹੱਕ ਨੂੰ 25 ਜਨਵਰੀ ਨੂੰ ਦੇਸ਼ ਨਿਕਾਲਾ ਦੇ ਹੁਕਮ ਦਿੱਤੇ ਗਏ ਹਨ। ਹੱਕ ਅਤੇ ਉਸ ਦੀ ਪਤਨੀ ਸੋਫੀ ਵਲੋਂ ਸੀ.ਬੀ.ਐਸ.ਏ. ਦੇ ਇਸ ਫੈਸਲੇ ਵਿਚ ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਨੂੰ ਦਖ਼ਲ ਦੇਣ ਦੀ ਅਪੀਲ ਕੀਤੀ ਜਾ ਰਹੀ ਹੈ।