ਕੈਨੇਡਾ ਯੂਰਪੀ ਭਾਈਵਾਲਾਂ ਨਾਲ ਵਧੇਰੇ ਖੁਫੀਆ ਸਹਿਯੋਗ ਵਧਾਉਣ ’ਤੇ ਵਿਚਾਰ ਕਰ ਰਿਹਾ ਹੈ: ਮੇਲਾਨੀ ਜੋਲੀ

ਕੈਨੇਡਾ-ਅਮਰੀਕਾ ਦੇ ਤਾਜ਼ਾ ਰੁਖ਼ ਨੂੰ ਦੇਖਦੇ ਹੋਏ ਯੂਰਪ ਨਾਲ ਆਪਣੇ ਖੁਫੀਆ ਰਿਸ਼ਤੇ ਮਜਬੂਤ ਕਰਨ ਦੀ ਕੋਸ਼ਿਸ਼ ਵਿਚ ਹੈ। ਵਿਦੇਸ਼ ਮੰਤਰੀ ਮੇਲਾਨੀ ਜੋਲੀ ਨੇ ਕਿਹਾ ਕਿ ਯੂਕਰੇਨ ਵਰਗੇ ਮੁੱਦਿਆਂ ’ਤੇ ਵਾਸ਼ਿੰਗਟਨ ਨੇ ਵੱਖਰਾ ਸਟੈਂਡ ਲਿਆ ਹੈ, ਲਿਹਾਜਾ ਕੈਨੇਡਾ ਯੂਰਪੀ ਭਾਈਵਾਲਾਂ ਨਾਲ ਵਧੇਰੇ ਖੁਫੀਆ ਸਹਿਯੋਗ ਵਧਾਉਣ ’ਤੇ ਵਿਚਾਰ ਕਰ ਰਿਹਾ ਹੈ।

ਜੋਲੀ ਨੇ ਕਿਹਾ ਕਿ ਇਹ ਚਿੰਤਾ ਦਾ ਵਿਸ਼ਾ ਹੈ ਕਿ ਅਮਰੀਕਾ ਨੇ ਸੋਮਵਾਰ ਨੂੰ ਸੰਯੁਕਤ ਰਾਸ਼ਟਰ ਵਿਚ ਕੈਨੇਡਾ ਅਤੇ ਆਪਣੇ ਹੋਰ ਸਹਿਯੋਗੀਆਂ ਦੇ ਇੱਕ ਮਤੇ ਖਿਲਾਫ ਮਤਦਾਨ ਕੀਤਾ, ਜਿਸ ਵਿਚ ਰੂਸ ਨੂੰ ਯੂਕਰੇਨ ’ਤੇ ਹਮਲੇ ਲਈ ਜ਼ਿੰਮੇਵਾਰ ਠਹਿਰਾਇਆ ਗਿਆ ਸੀ ਅਤੇ ਯੂਕਰੇਨ ਦੀ ਪ੍ਰਭੂਸੱਤਾ ਲਈ ਚਿੰਤਾ ਪ੍ਰਗਟ ਕੀਤੀ ਗਈ ਸੀ।

ਜੋਲੀ ਨੇ ਕਿਹਾ ਕਿ ਖੁਫੀਆ ਸਹਿਯੋਗ ਵਧਾਉਣ ਦੇ ਸਬੰਧ ਵਿਚ ਉਹ ਆਸਟ੍ਰੇਲੀਆ ਅਤੇ ਬ੍ਰਿਟੇਨ ਨਾਲ ਵੀ ਸੰਪਰਕ ਵਿਚ ਹਨ। ਉਨ੍ਹਾਂ ਕਿਹਾ ਕਿ ਵਿਸ਼ਵ ਇਸ ਸਮੇਂ ਤੇਜ਼ੀ ਨਾਲ ਖ਼ਤਰਨਾਕ ਹਾਲਾਤ ਵੱਲ ਵਧ ਰਿਹਾ ਹੈ, ਜਿਸ ਨਾਲ ਨਜਿੱਠਣ ਲਈ ਨਵੇਂ ਗਠਜੋੜ ਬਣ ਰਹੇ ਹਨ। ਜੋਲੀ ਨੇ ਕਿਹਾ ਕਿ ਇਸੇ ਲਈ ਕੈਨੇਡਾ ਨੂੰ ਵੀ ਦੱਖਣੀ ਅਫਰੀਕਾ, ਭਾਰਤ ਅਤੇ ਸਾਊਦੀ ਅਰਬ ਵਰਗੇ ਦੇਸ਼ਾਂ ਨਾਲ ਕਾਰਜਸ਼ੀਲ ਸਬੰਧ ਰੱਖਣ ਦੀ ਲੋੜ ਹੈ, ਜਿਨ੍ਹਾਂ ਨਾਲ ਸਾਡੇ ਮਤਭੇਦ ਹਨ।