ਟੈਰਿਫ ਦੇ ਖ਼ਤਰੇ ਦੇ ਮੱਦੇਨਜ਼ਰ ਜੋਲੀ ਅੱਜ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨਾਲ ਕਰੇਗੀ ਮੁਲਾਕਾਤ

ਕੈਨੇਡਾ 'ਤੇ ਸ਼ਨੀਵਾਰ ਨੂੰ ਟੈਰਿਫ ਲੱਗਣ ਦੇ ਖ਼ਦਸ਼ੇ ਵਿਚਕਾਰ ਵਿਦੇਸ਼ ਮੰਤਰੀ ਮੇਲਾਨੀ ਜੋਲੀ ਅੱਜ ਵਾਸ਼ਿੰਗਟਨ ਡੀ.ਸੀ. ਵਿਚ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨਾਲ ਮੁਲਾਕਾਤ ਕਰਨ ਲਈ ਪਹੁੰਚੇ ਹਨ।

ਜੋਲੀ ਨੇ ਸੋਮਵਾਰ ਬਿਆਨ ਵਿਚ ਕਿਹਾ ਸੀ ਕਿ ਉਨ੍ਹਾਂ ਦਾ ਅਜੇ ਵੀ ਮੰਨਣਾ ਹੈ ਕਿ ਡਿਪਲੋਮੇਸੀ ਕੋਸ਼ਿਸ਼ ਰਾਸ਼ਟਰਪਤੀ ਡੋਨਲਡ ਟਰੰਪ ਨੂੰ ਕੈਨੇਡਾ 'ਤੇ 25 ਫੀਸਦੀ ਟੈਰਿਫ ਲਗਾਉਣ ਤੋਂ ਰੋਕ ਸਕਦੀ ਹੈ। ਜੋਲੀ ਨੇ ਪਿਛਲੇ ਹਫ਼ਤੇ ਰੂਬੀਓ ਨਾਲ ਫ਼ੋਨ 'ਤੇ ਵੀ ਗੱਲ ਕੀਤੀ ਸੀ ਅਤੇ ਉਹਨਾਂ ਨੂੰ ਇੱਕ ਚੰਗਾ ਵਾਰਤਾਕਾਰ ਦੱਸਿਆ ਸੀ। ਅਮਰੀਕਾ ਵਿਚ ਪਿਛਲੇ ਸਾਲ ਨਵੰਬਰ ਵਿਚ ਹੋਈਆਂ ਰਾਸ਼ਟਰਪਤੀ ਚੋਣਾਂ ਤੋਂ ਬਾਅਦ ਜੋਲੀ ਦਾ ਇਹ ਪੰਜਵਾਂ ਦੌਰਾ ਹੈ।

ਗੌਰਤਲਬ ਹੈ ਕਿ ਕੈਨੇਡਾ ਵਲੋਂ ਟੈਰਿਫ ਨੂੰ ਟਾਲਣ ਲਈ ਲਗਾਤਾਰ ਕੋਸ਼ਿਸ਼ਾਂ ਕੀਤੀਆਂ ਗਈਆਂ ਹਨ, ਇਸ ਕਦਮ ਤਹਿਤ ਫੈਡਰਲ ਸਰਕਾਰ ਨੇ $1.3 ਅਰਬ ਦੀ ਸਰਹੱਦੀ ਯੋਜਨਾ ਵੀ ਸਾਂਝੀ ਕੀਤੀ ਹੈ। ਹਾਲਾਂਕਿ, ਇਸ ਦੇ ਬਾਵਜੂਦ ਜੇ ਟਰੰਪ ਟੈਰਿਫ 'ਤੇ ਅੱਗੇ ਵਧਦੇ ਹਨ ਤਾਂ ਓਟਾਵਾ ਨੇ ਜਵਾਬੀ ਕਾਰਵਾਈ ਲਈ ਕਈ ਵਿਕਲਪ ਤਿਆਰ ਕੀਤੇ ਹਨ।