ਜੱਜ ਨੇ ਕੈਂਪਮੈਂਟ ਨੂੰ ਖਤਮ ਕਰਨ ਦੇ ਹੁਕਮ ਲਈ ਮੈਕਗਿਲ ਦੀ ਬੋਲੀ ਤੋਂ ਕੀਤਾ ਇਨਕਾਰ

ਕਿਊਬੈਕ ਦੀ ਅਦਾਲਤ ਨੇ ਮੈਕਗਿਲ ਯੂਨੀਵਰਸਿਟੀ ਦੇ ਕੈਂਪਸ ਵਿਚ ਫਲਸਤੀਨੀ ਸਮਰਥਕਾਂ ਵਲੋਂ ਲਗਾਏ ਗਏ ਕੈਂਪ ਹਟਾਏ ਜਾਣ ਦਾ ਹੁਕਮ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਹ ਦੂਜੀ ਵਾਰ ਹੈ ਜਦੋਂ ਕੋਰਟ ਨੇ ਇਨਕਾਰ ਕੀਤਾ। ਫਲਸਤੀਨੀ ਸਮਰਥਕ 27 ਅਪ੍ਰੈਲ ਤੋਂ ਤੰਬੂ ਲਗਾ ਕੇ ਬੈਠੇ ਹੋਏ ਹਨ। ਯੂਨੀਵਰਸਿਟੀ ਦੇ ਵਕੀਲ ਨੇ ਸੋਮਵਾਰ ਅਦਾਲਤ ਵਿਚ ਬੇਨਤੀ ਦਾਇਰ ਕੀਤੀ ਸੀ ਕਿ ਪ੍ਰਦਰਸ਼ਨਕਾਰੀਆਂ ਦੇ ਡੇਰੇ ਨੂੰ ਖਤਮ ਕਰਨ ਵਿਚ ਮਦਦ ਲਈ ਮਾਂਟਰੀਅਲ ਪੁਲਿਸ ਨੂੰ ਆਦੇਸ਼ ਦਿੱਤੇ ਜਾਣ।

ਜੱਜ ਨੇ ਅੱਜ ਕਿਹਾ ਕਿ ਮਾਮਲਾ ਗੁੰਝਲਦਾਰ ਹੈ ਜਿਸ ਦਾ ਜਲਦ ਫੈਸਲਾ ਨਹੀਂ ਕੀਤਾ ਜਾ ਸਕਦਾ, ਇਸ ਲਈ ਡੂੰਘਾਈ ਨਾਲ ਵਿਸ਼ਲੇਸ਼ਣ ਦੀ ਲੋੜ ਹੈ। ਮੈਕਗਿਲ ਯੂਨੀਵਰਸਿਟੀ ਦੇ ਵਕੀਲ ਨੇ ਇਹ ਵੀ ਦਲੀਲ ਦਿੱਤੀ ਸੀ ਕਿ ਕੈਂਪ ਹੈਲਥ ਅਤੇ ਸੇਫਟੀ ਲਈ ਖਤਰਾ ਹਨ ਅਤੇ ਇਸ ਵਜ੍ਹਾ ਨਾਲ ਯੂਨੀਵਰਸਿਟੀ ਆਪਣੀ ਪ੍ਰਾਪਰਟੀ ’ਤੇ ਕਨਵੋਕੇਸ਼ਨ ਸਮਾਰੋਹ ਆਯੋਜਿਤ ਕਰਨ ਤੋਂ ਅਸਮਰਥ ਹੋ ਰਹੀ ਹੈ ਪਰ ਜੱਜ ਨੇ ਕਿਹਾ ਕਿ ਹੁਣ ਤੱਕ ਕੋਈ ਗੰਭੀਰ ਜਾਂ ਹਿੰਸਕ ਘਟਨਾਵਾਂ ਨਹੀਂ ਹੋਈਆਂ ਹਨ ਅਤੇ ਗ੍ਰੈਜੂਏਸ਼ਨ ਸਮਾਗਮ ਲਈ ਸਕੂਲ ਪਹਿਲਾਂ ਹੀ ਵੱਖਰਾ ਸਥਾਨ ਲੱਭ ਚੁੱਕਾ ਹੈ। ਜੱਜ ਨੇ ਕਿਹਾ ਕਿ 2 ਮਈ ਨੂੰ ਫਲਸਤੀਨੀ ਸਮਰਥਕਾਂ ਅਤੇ ਇਜ਼ਰਾਈਲ ਪੱਖੀ ਪ੍ਰਦਸ਼ਨਕਾਰੀਆਂ ਵਿਚ ਟਕਰਾਅ ਵੀ ਸ਼ਾਂਤੀਪੂਰਵਕ ਹੋਇਆ ਸੀ।