ਕੈਨੇਡਾ ਹਾਕੀ ਖਿਡਾਰੀ ਸ਼ੋਸ਼ਣ ਮਾਮਲੇ 'ਚ ਜੱਜ ਨੇ ਮੈਸਜ ਨੂੰ ਨਹੀਂ ਮੰਨਿਆ ਸਬੂਤ

ਕੈਨੇਡਾ ਦੀ ਵਰਲਡ ਜੂਨੀਅਰ ਹਾਕੀ ਟੀਮ ਦੇ ਚੱਲ ਰਹੇ ਜਿਨਸੀ ਹਮਲੇ ਦੀ ਸੁਣਵਾਈ ਵਿਚ ਸੁਰਖੀਆਂ ਬਟੋਰਨ ਵਾਲੇ ਬ੍ਰੈਟ ਹਾਉਡੇਨ ਦੇ ਟੈਕਸਟ ਮੈਸੇਜ ਨੂੰ ਜੱਜ ਨੇ ਸਬੂਤ ਦੇ ਤੌਰ 'ਤੇ ਮੰਨਣ ਤੋਂ ਅੱਜ ਸਪੱਸ਼ਟ ਇਨਕਾਰ ਕਰ ਦਿੱਤਾ। ਜਸਟਿਸ ਮਾਰੀਆ ਕੈਰੋਕੀਆ ਨੇ ਇਸ ਮਾਮਲੇ ਵਿਚ ਅੰਤਿਮ ਫੈਸਲਾ ਸੁਣਾਇਆ ਕਿ 19 ਜੂਨ 2018 ਨੂੰ ਹਾਉਡਨ ਵਲੋਂ ਟੀਮ ਦੇ ਸਾਥੀ ਟੇਲਰ ਰੈਡੀਸ਼ ਨੂੰ ਭੇਜੇ ਗਏ ਸੁਨੇਹੇ ਸਵੀਕਾਰਯੋਗ ਨਹੀਂ ਹਨ।

ਜੱਜ ਨੇ ਕਿਹਾ ਕਿ ਇਹ ਟੈਕਸਟ ਸੁਣੀਆਂ-ਸੁਣਾਈਆਂ ਗੱਲਾਂ 'ਤੇ ਆਧਾਰਿਤ ਹਨ ਅਤੇ ਉਨ੍ਹਾਂ ਦੀ ਸੱਚਾਈ ਅਤੇ ਭਰੋਸੇਯੋਗਤਾ ਦੀ ਗਰੰਟੀ ਨਹੀਂ ਦਿੱਤੀ ਜਾ ਸਕਦੀ। ਗੌਰਤਲਬ ਹੈ ਕਿ ਮੌਜੂਦਾ ਸਮੇਂ ਲਾਸ ਵੇਗਾਸ ਵਲੋਂ ਖੇਡ ਰਹੇ ਹਾਉਡਨ ਕੈਨੇਡਾ ਦੀ 2018 ਦੀ ਵਰਲਡ ਜੂਨੀਅਰ ਹਾਕੀ ਟੀਮ ਦਾ ਮੈਂਬਰ ਸੀ।

ਕ੍ਰਾਊਨ ਵਲੋਂ ਅਦਾਲਤ ਨੂੰ ਵਾਰ-ਵਾਰ ਇਹ ਅਪੀਲ ਕੀਤੀ ਗਈ ਸੀ ਕਿ ਹਾਉਡਨ ਦੇ ਉਸ ਮੈਸੇਜ ਨੂੰ ਸਬੂਤ ਦੇ ਤੌਰ 'ਤੇ ਮੰਨਿਆ ਜਾਵੇ, ਜਿਸ ਵਿਚ ਹਾਉਡਨ ਨੇ ਰੈਡੀਸ਼ ਨੂੰ ਭੇਜੇ ਟੈਕਸਟ ਵਿਚ ਕਿਹਾ ਸੀ ਕਿ ਉਸ ਨੇ ਓਨਟਾਰੀਓ ਦੇ ਲੰਡਨ ਦੇ ਹੋਟਲ ਰੂਮ ਵਿਚ ਡਿਲਨ ਡੂਬੇ ਨੂੰ ਲੜਕੀ ਦੇ ਪਿੱਛੇ ਅਸ਼ਲੀਲ ਢੰਗ ਨਾਲ ਮਾਰਦੇ ਹੋਏ ਸੁਣਿਆ ਸੀ। ਦੱਸ ਦੇਈਏ ਕਿ ਇਸ ਕੇਸ ਵਿਚ ਡੂਬੇ ਸਮੇਤ ਮਾਈਕਲ ਮੈਕਲਿਓਡ, ਕਾਰਟਰ ਹਾਰਟ, ਐਲੇਕਸ ਫੋਰਮੈਂਟਨ ਅਤੇ ਕੈਲਨ ਫੁੱਟ ਨਾਮਜ਼ਦ ਹਨ ਅਤੇ ਕਿਸੇ ਨੇ ਵੀ ਹੁਣ ਤੱਕ ਦੋਸ਼ ਸਵੀਕਾਰ ਨਹੀਂ ਕੀਤਾ ਹੈ।