14.42C Vancouver 14.42C VancouverSep 29, 2021 4:47 PM -
ਬ੍ਰਿਟਸ਼ ਕੋਲੰਬੀਆ ਦੇ ਕੋਰੋਨਰ ਵੱਲੋਂ ਜੁਲਾਈ ਦੇ ਮਹੀਨੇ ਲਈ ਜਾਰੀ ਕੀਤੀ ਗਈ ਰੀਪੋਰਟ ਦੇ ਮੁਤਾਬਿਕ ਸੂਬੇ ਦੇ ਇਤਿਹਾਸ ਵਿੱਚ ਅਜਿਹਾ ਦੂਸਰੀ ਵਾਰ ਹੋਇਆ ਹੈ ਕਿ ਇੱਕ ਹੀ ਮਹੀਨੇ ਵਿੱਚ ਓਵਰਡੋਸ ਕਾਰਣ ਹੋਈਆਂ ਮੌਤਾਂ ਦੀ ਇਨੀ ਵੱਡੀ ਗਿਣਤੀ ਰਿਕਾਰਡ ਕੀਤੀ ਗਈ ਹੋਵੇ।
ਜੁਲਾਈ ਵਿੱਚ ਓਵਰਡੋਸ ਕਾਰਣ 184 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ, ਜੋ ਕਿ ਜਨਵਰੀ 2020 ਵਿੱਚ ਦਰਜ ਕੀਤੀਆਂ ਗਈਆਂ ਮੌਤਾਂ ਦੇ ਬਰਾਬਰ ਹਨ ਅਤੇ ਜੂਨ 2020 ਵਿੱਚ ਰੀਪੋਰਟ ਕੀਤੀਆਂ ਗਈਆਂ 186 ਮੌਤਾਂ ਤੋਂ ਥੋੜੀਆਂ ਘੱਟ ਹਨ।
ਜ਼ਿਕਰਯੋਗ ਹੈ ਕਿ ਬੀ ਸੀ ਵਿੱਚ ਜਨਵਰੀ ਤੋਂ ਜੂਨ ਤਕ ਵਾਲਾ ਸਮਾਂ ਓਵਰਡੋਸ ਕਾਰਣ ਹੋਈਆਂ ਮੌਤਾਂ ਦੇ ਲਿਹਾਜ਼ ਨਾਲ ਸਭ ਤੋਂ ਵੱਧ ਘਾਤਕ ਸਮਾਂ ਸੀ।
ਜਦ ਇਸ ਵਿੱਚ ਜੁਲਾਈ ਦਾ ਅੰਕੜਾ ਵੀ ਜੋੜ ਦਿੱਤਾ ਜਾਂਦਾ ਹੈ ਤਾਂ ਪਹਿਲੇ 7 ਮਹੀਨਿਆਂ ਵਿੱਚ ਰੀਪੋਰਟ ਕੀਤੀਆਂ ਗਈਆਂ ਕੁੱਲ ਮੌਤਾਂ ਦੀ ਗਿਣਤੀ 1204 ਹੋ ਜਾਂਦੀ ਹੈ ਜੋ ਕਿ ਪਿਛਲੇ ਸਾਲ ਇਸ ਸਮੇਂ ਦੇ ਮੁਕਾਬਲੇ 28% ਜ਼ਿਆਦਾ ਹੈ।
ਜੁਲਾਈ ਵਿੱਚ ਰੋਜ਼ਾਨਾ ਔਸਤਨ 6 ਮੌਤਾਂ ਹੋਈਆਂ ਹਨ, ਇਹਨਾਂ ਵਿੱਚੋਂ 72% ਦੀ ਉਮਰ 30 ਤੋਂ 59 ਸਾਲ ਦੇ ਦਰਮਿਆਨ ਸੀ ਜਦ ਕਿ ਮਰਨ ਵਾਲਿਆਂ ਵਿੱਚੋਂ 80% ਮਰਦ ਸਨ।
ਫੈਂਟਨਲ ਕਾਰਣ ਹੋਈਆਂ ਮੌਤਾਂ ਦੀ ਦਰ 86% ਰਹੀ ਜਦ ਕਿ ਇਕਸਟ੍ਰੀਮ ਫੈਂਟਨਲ ਦੀ ਦਰ 8% ਤੋਂ ਵੱਧ ਕਏ 13% ਤੇ ਪਹੁੰਚ ਗਈ ਹੈ।
