10.17C Vancouver 10.17C VancouverMay 16, 2023 9:03 PM - The Canadian Press
ਕੈਨੇਡਾ ਦੇ ਬੇਲ ਸਿਸਟਮ ਵਿਚ ਤਬਦੀਲੀ ਲਈ ਨਿਆਂ ਮੰਤਰੀ ਡੇਵਿਡ ਲੈਮੇਟੀ ਨੇ ਅੱਜ ਹਾਊਸ ਆਫ਼ ਕਾਮਨਜ਼ ਵਿਚ ਬਿੱਲ ਪੇਸ਼ ਕੀਤਾ।
ਬਿੱਲ ਨੂੰ ਸੀ-48 ਨਾਮ ਦਿੱਤਾ ਗਿਆ ਹੈ, ਅਤੇ ਇਸ ਜ਼ਰੀਏ ਕ੍ਰਿਮੀਨਲ ਕੋਡ ਦੇ ਬੇਲ ਸਿਸਟਮ ਵਿਚ ਤਬਦੀਲੀ ਕੀਤੀ ਜਾਏਗੀ।
ਬਿੱਲ ਵਿਚ ਫਾਇਰ ਆਰਮਜ਼, ਚਾਕੂ, ਬੀਅਰ ਸਪਰੇਅ ਅਤੇ ਹਥਿਆਰ ਨਾਲ ਸਬੰਧਤ ਰਿਪੀਟ ਹਿੰਸਕ ਅਪਰਾਧੀਆਂ ਲਈ ਜ਼ਮਾਨਤ ਸਖ਼ਤੀ ਕੀਤੀ ਜਾ ਰਹੀ ਹੈ।
ਬਿੱਲ ਰਾਹੀਂ ਕ੍ਰਿਮੀਨਲ ਕੋਡ ਵਿਚ 5 ਵਿਸ਼ੇਸ਼ ਬਦਲਾਅ ਪ੍ਰਸਤਾਵਿਤ ਕੀਤੇ ਗਏ ਹਨ।
ਬਿੱਲ ਵਿਚ ਕਿਹਾ ਗਿਆ ਹੈ ਕਿ ਹਥਿਆਰਾਂ ਨਾਲ ਜੁੜੇ ਗੰਭੀਰ ਹਿੰਸਕ ਅਪਰਾਧਾਂ ਦੇ ਦੋਸ਼ਾਂ ਵਿਚ ਸ਼ਾਮਲ ਉਨ੍ਹਾਂ ਲੋਕਾਂ ਲਈ ਜ਼ਮਾਨਤ ਦੀਆਂ ਸ਼ਰਤਾਂ ਸਖ਼ਤ ਕੀਤੀ ਜਾਣਗੀਆਂ ਜੋ ਪਿਛਲੇ ਪੰਜ ਸਾਲਾਂ ਵਿਚ ਇਸੇ ਤਰ੍ਹਾਂ ਦੇ ਅਪਰਾਧ ਲਈ ਦੋਸ਼ੀ ਠਹਿਰਾਏ ਗਏ ਸਨ।
ਕੋਰਟ ਨੂੰ ਜ਼ਮਾਨਤ ਦਾ ਫੈਸਲਾ ਦੇਣ ਤੋਂ ਪਹਿਲਾਂ ਦੋਸ਼ੀ ਦਾ ਹਿੰਸਾ ਦਾ ਰਿਕਾਰਡ ਅਤੇ ਕਮਿਊਨਿਟੀ ਦੀ ਸੁਰੱਖਿਆ ਨੂੰ ਮੱਦੇਨਜ਼ਰ ਰੱਖਣ ਦੀ ਲੋੜ ਹੋਵੇਗੀ।
ਗੌਰਤਲਬ ਹੈ ਕਿ ਕਈ ਹਾਈ ਪ੍ਰੋਫਾਈਲ ਕੇਸਾਂ ਵਿਚ ਜ਼ਮਾਨਤ ਤੋਂ ਬਾਹਰ ਆਏ ਮੁਲਜ਼ਮਾਂ ਵਲੋਂ ਵਾਰਦਾਤਾਂ ਕੀਤੇ ਜਾਣ ਦੇ ਮਾਮਲੇ ਸਾਹਮਣੇ ਆਏ ਹਨ ਜਿਸ ਤੋਂ ਬਾਅਦ ਰਿਪੀਟ ਓਫੇਨਡਰਸ ਲਈ ਜ਼ਮਾਨਤ ਸ਼ਰਤਾਂ ਸਖ਼ਤ ਕਰਨ ਦੀ ਮੰਗ ਉੱਠੀ ਸੀ।
ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੌਈਲੀਐਵ ਨੇ ਕਿਹਾ ਕਿ ਟਰੂਡੋ ਦੇ ਕੈਚ ਐਂਡ ਰੀਲੀਜ਼ ਸਿਸਟਮ ਕਾਰਨ 8 ਸਾਲਾਂ ਦੌਰਾਨ ਕੈਨੇਡਾ ਵਿਚ ਹਿੰਸਕ ਘਟਨਾਵਾਂ ਵਿਚ 32 ਫੀਸਦੀ ਵਾਧਾ ਹੋਇਆ ਅਤੇ ਹੁਣ ਸਰਕਾਰ ਜਾਗੀ ਹੈ।
