ਕੈਨੀ ਨੇ ਬੀ. ਸੀ. 'ਚ ਕੁਝ ਡਰੱਗਜ਼ ਨੂੰ ਅਪਰਾਧ ਮੁਕਤ ਕਰਾਰ ਦੇਣ ਦੇ ਓਟਾਵਾ ਦੇ ਫੈਸਲੇ ਦੀ ਕੀਤੀ ਨਿੰਦਾ

ਬ੍ਰਿਟਿਸ਼ ਕੋਲੰਬੀਆ ਵਿਚ ਕੁਝ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥਾਂ ਨੂੰ ਅਪਰਾਧ ਤੋਂ ਮੁਕਤ ਕਰਨ ਦੇ ਓਟਾਵਾ ਦੇ ਫੈਸਲੇ ਦੀ ਜੇਸਨ ਕੈਨੀ ਨੇ ਨਿੰਦਾ ਕੀਤੀ ਹੈ।

ਐਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੈਨੀ ਨੇ ਕਿਹਾ ਕਿ ਓਟਾਵਾ ਵੱਲੋਂ ਬ੍ਰਿਟਿਸ਼ ਕੋਲੰਬੀਆ ਵਿਚ ਗੈਰ-ਕਾਨੂੰਨੀ ਡਰੱਗ ਦੇ ਸਮਾਲ ਅਮਾਊਂਟਸ ਨੂੰ ਅਪਰਾਧ ਦੀ ਸ਼੍ਰੇਣੀ ਤੋਂ ਮੁਕਤ ਕਰਨ ਨਾਲ ਨਸ਼ਿਆਂ ਦੀ ਵਰਤੋਂ, ਹਿੰਸਾ, ਤਸਕਰੀ ਅਤੇ ਨਸ਼ਾਖੋਰੀ ਵਿਚ ਨਾਟਕੀ ਵਾਧਾ ਹੋਵੇਗਾ।

ਨਵੇਂ ਪ੍ਰੋਗਰਾਮ ਤਹਿਤ ਅਗਲੇ ਸਾਲ ਤੋਂ ਬ੍ਰਿਟਿਸ਼ ਕੋਲੰਬੀਆ ਦੇ 18 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਕੋਲੋਂ ਪਰਸਨਲ ਯੂਜ਼ ਲਈ 2.5 ਗ੍ਰਾਮ ਤੱਕ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ ਮਿਲਣ 'ਤੇ ਉਨ੍ਹਾਂ ਨੂੰ ਗ੍ਰਿਫਤਾਰ ਅਤੇ ਚਾਰਜਡ ਨਹੀਂ ਕੀਤਾ ਜਾਵੇਗਾ।

ਓਵਰਡੋਜ਼ ਨਾਲ ਰਿਕਾਰਡ ਮੌਤਾਂ ਹੋਣ ਦੇ ਮੱਦੇਨਜ਼ਰ ਬੀ. ਸੀ. ਨੇ ਕੈਨੇਡਾ ਦੇ ਡਰੱਗ ਕਾਨੂੰਨ ਵਿਚ ਢਿੱਲ ਦੇਣ ਦੀ ਬੇਨਤੀ ਕੀਤੀ ਸੀ। ਕੈਨੀ ਨੇ ਕਿਹਾ ਕਿ ਇਹ ਫ਼ੈਸਲਾ ਲੈਣ ਤੋਂ ਪਹਿਲਾਂ ਦੂਜੇ ਸੂਬਿਆਂ ਨਾਲ ਸਲਾਹ-ਮਸ਼ਵਰਾ ਕੀਤਾ ਜਾਣਾ ਚਾਹੀਦਾ ਸੀ, ਖਾਸ ਤੌਰ 'ਤੇ ਨਾਲ ਲੱਗਦੇ ਅਲਬਰਟਾ ਨਾਲ। ਜੇਸਨ ਕੈਨੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਸਮਾਜ ਦੀ ਸੁਰੱਖਿਆ ਨੂੰ ਮੁੱਖ ਰੱਖਦੇ ਹੋਏ ਸਿਹਤ-ਸੰਭਾਲ ਦੇ ਮੁੱਦੇ ਵਜੋਂ ਨਸ਼ਾਖੋਰੀ ਨਾਲ ਨਜਿਠੱਣ ਦਾ ਸਮਰਥਨ ਕਰਦੀ ਹੈ।