ਜੇਸਨ ਕੈਨੀ ਦਾ ਵੱਡਾ ਬਿਆਨ, ਕਿਹਾ- 'ਨਵੇਂ ਨੇਤਾ ਦੀ ਚੋਣ ਤੱਕ ਬਣਿਆ ਰਹਾਂਗਾ ਐਲਬਰਟਾ ਦਾ ਪ੍ਰੀਮੀਅਰ'

ਹਾਲ ਦੀ ਘੜੀ ਐਲਬਰਟਾ ਵਿਚ ਸਿਆਸੀ ਹਲਚਲ ਬਰਕਰਾਰ ਹੈ। ਐਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੈਨੀ ਦਾ ਕਹਿਣਾ ਹੈ ਕਿ ਉਹ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੇ ਨਵੇਂ ਨੇਤਾ ਦੀ ਚੋਣ ਹੋਣ ਤੱਕ ਅਹੁਦੇ 'ਤੇ ਬਣੇ ਰਹਿਣਗੇ।

ਜੇਸਨ ਕੈਨੀ ਦਾ ਇਹ ਫੈਸਲਾ ਉਸ ਐਲਾਨ ਤੋਂ ਇਕ ਦਿਨ ਬਾਅਦ ਆਇਆ ਹੈ, ਜਿਸ ਵਿਚ ਉਨ੍ਹਾਂ ਕਿਹਾ ਸੀ ਕਿ ਉਹ ਆਪਣੀ ਪਾਰਟੀ ਦੇ ਭਲੇ ਲਈ ਅਸਤੀਫਾ ਦੇ ਰਹੇ ਹਨ।

ਇਸ ਤੋਂ ਪਹਿਲਾਂ ਕੱਲ੍ਹ ਕੈਨੀ ਦੇ ਕੁਝ ਕਾਕਸ ਆਲੋਚਕਾਂ ਨੇ ਉਨ੍ਹਾਂ ਨੂੰ ਤੁਰੰਤ ਅਹੁਦਾ ਛੱਡਣ ਲਈ ਕਿਹਾ ਸੀ। ਗੌਰਤਲਬ ਹੈ ਕਿ ਕੈਨੀ ਨੇ ਪਾਰਟੀ ਦੇ ਮੈਂਬਰਾਂ ਦੀ ਮੇਲ-ਇਨ ਬੈਲਟ ਵਿਚ 51 ਫ਼ੀਸਦ ਸਮਰਥਨ ਪ੍ਰਾਪਤ ਕਰਨ ਤੋਂ ਬਾਅਦ ਬੁੱਧਵਾਰ ਰਾਤ ਨੂੰ ਆਪਣੇ ਅਸਤੀਫੇ ਦਾ ਐਲਾਨ ਕੀਤਾ ਸੀ।

ਉੱਥੇ ਹੀ, ਜੇਸਨ ਕੈਨੀ ਦੇ ਨਵੇਂ ਫੈਸਲੇ ਨੂੰ ਲੈ ਕੇ ਵਿਰੋਧੀ ਧਿਰ ਐੱਨ. ਡੀ. ਪੀ. ਲੀਡਰ ਰੇਸ਼ਲ ਨੌਟਲੇ ਨੇ ਤਿੱਖਾ ਨਿਸ਼ਾਨਾ ਵਿੰਨ੍ਹਿਆ ਹੈ। ਰੇਸ਼ਲ ਨੌਟਲੇ ਨੇ ਕਿਹਾ ਕਿ ਕੈਨੀ ਹੁਣ ਸਿਰਫ ਕੇਅਰ-ਟੇਕਰ ਲੀਡਰ ਹਨ, ਜਿਸ ਵਜ੍ਹਾ ਨਾਲ ਅਲਬਰਟਾ ਦੇ ਲੋਕਾਂ ਨੂੰ ਸਿਹਤ ਦੇਖਭਾਲ ਅਤੇ ਹਸਪਤਾਲਾਂ ਵਿਚ ਲੰਮੀ ਵੇਟਿੰਗ ਲਿਸਟ ਵਿਚ ਸੁਧਾਰ ਦੀ ਲੋੜ ਵਰਗੇ ਅਹਿਮ ਮੁੱਦਿਆਂ ਨੂੰ ਲੈ ਕੇ ਹੋਰ ਦੇਰੀ ਝੱਲਣੀ ਪਵੇਗੀ।