19.11C Vancouver 19.11C VancouverMay 20, 2025 6:38 PM - Connect Newsroom
ਕੈਨੇਡਾ ਦੇ ਦੌਰੇ 'ਤੇ ਅਗਲੇ ਹਫ਼ਤੇ ਆਉਣ ਤੋਂ ਪਹਿਲਾਂ ਅੱਜ ਕਿੰਗ ਚਾਰਲਸ ਅਤੇ ਕਵੀਨ ਕੈਮਿਲਾ ਨੇ ਲੰਡਨ ਸਥਿਤ ਕੈਨੇਡੀਅਨ ਹਾਈ ਕਮਿਸ਼ਨ ਦੇ 100 ਸਾਲ ਪੂਰੇ ਹੋਣ 'ਤੇ ਕੈਨੇਡਾ ਹਾਊਸ ਦਾ ਦੌਰਾ ਕੀਤਾ। ਉਨ੍ਹਾਂ ਦੇ ਇਸ ਦੌਰੇ ਨੂੰ ਟਰੰਪ ਵਲੋਂ ਜਾਰੀ ਧਮਕੀਆਂ ਵਿਚਕਾਰ ਕੈਨੇਡਾ ਦੇ ਸਮਰਥਨ ਵਜੋਂ ਦੇਖਿਆ ਜਾ ਰਿਹਾ ਹੈ।
ਚਾਰਲਸ ਅਤੇ ਕੈਮਿਲਾ ਨੇ ਲੰਡਨ ਸਥਿਤ ਕੈਨੇਡਾ ਹਾਊਸ ਵਿਚ ਕੈਨੇਡੀਅਨ ਅਧਿਕਾਰੀਆਂ ਨਾਲ ਮੁਲਾਕਾਤ ਕੀਤੀ, ਜਿਨ੍ਹਾਂ ਵਿਚ ਕੈਨੇਡੀਅਨ ਹਾਈ ਕਮਿਸ਼ਨਰ ਰਾਲਫ਼ ਗੁਡੇਲ ਵੀ ਸ਼ਾਮਲ ਸਨ। ਕਿੰਗ ਚਾਰਲਸ ਵਲੋਂ ਸਤੰਬਰ ਵਿਚ ਟਰੰਪ ਨਾਲ ਵੀ ਇੱਕ ਮੀਟਿੰਗ ਕਰਨ ਦੀ ਉਮੀਦ ਹੈ। ਇਸ ਤੋਂ ਪਹਿਲਾਂ ਉਹ ਕੈਨੇਡਾ ਦੇ ਨਵੇਂ ਸੰਸਦੀ ਸੈਸ਼ਨ ਦੇ ਉਦਘਾਟਨ ਵਿਚ ਸ਼ਾਮਲ ਹੋਣ ਲਈ 26 ਅਤੇ 27 ਮਈ ਨੂੰ ਔਟਵਾ ਵਿਚ ਹੋਣਗੇ।
27 ਮਈ ਨੂੰ ਕਿੰਗ ਸੰਸਦ ਨੂੰ ਸੰਬੋਧਨ ਵਿਚ ਨਵੀਂ ਮਾਰਕ ਕਾਰਨੀ ਸਰਕਾਰ ਦੀਆਂ ਤਰਜੀਹਾਂ ਨੂੰ ਪੇਸ਼ ਕਰਨਗੇ, ਆਮ ਤੌਰ 'ਤੇ ਥ੍ਰੋਨ ਸਪੀਚ ਗਵਰਨਰ ਜਨਰਲ ਵਲੋਂ ਦਿੱਤੀ ਜਾਂਦੀ ਹੈ ਜੋ ਕੈਨੇਡਾ ਵਿਚ ਰਾਜਾ ਜਾਂ ਰਾਣੀ ਦਾ ਪ੍ਰਤੀਨਿਧੀ ਹੁੰਦਾ ਹੈ। ਗੌਰਤਲਬ ਹੈ ਕਿ ਕਿੰਗ ਚਾਰਲਸ ਤੋਂ ਪਹਿਲਾਂ ਕੈਨੇਡਾ ਦੀ ਸੰਸਦ ਵਿਚ ਆਖਰੀ ਥ੍ਰੋਨ ਸਪੀਚ -ਕਵੀਨ ਐਲਿਜ਼ਾਬੈਥ ਨੇ 1977 ਵਿਚ ਦਿੱਤੀ ਸੀ।
