10.53C Vancouver 10.53C VancouverMay 26, 2025 12:47 PM - The Canadian Press
ਕੈਨੇਡਾ ਦੇ ਦੋ ਦਿਨਾ ਇਤਿਹਾਸਕ ਦੌਰੇ ਲਈ ਅੱਜ ਕਿੰਗ ਚਾਰਲਸ ਅਤੇ ਰਾਣੀ ਕੈਮਿਲਾ ਔਟਵਾ ਪਹੁੰਚ ਰਹੇ ਹਨ, ਚਾਰਲਸ ਦੀ ਦੋ ਸਾਲ ਪਹਿਲਾਂ ਹੋਈ ਤਾਜਪੋਸ਼ੀ ਤੋਂ ਬਾਅਦ ਇਹ ਉਹਨਾਂ ਦਾ ਪਹਿਲਾ ਕੈਨੇਡਾ ਦੌਰਾ ਹੈ।
ਉਹ ਦੁਪਹਿਰ ਸਮੇਂ ਓਟਾਵਾ ਦੇ ਮੈਕਡੋਨਲਡ-ਕਾਰਟੀਅਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੇ ਪਹੁੰਚਣਗੇ, ਜਿੱਥੇ ਉਹਨਾਂ ਦਾ ਸਵਾਗਤ ਗਵਰਨਰ ਜਨਰਲ ਮੈਰੀ ਸਾਈਮਨ, ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਤੇ ਉਹਨਾਂ ਦੀ ਪਤਨੀ ਡਾਇਨਾ ਫੌਕਸ ਕਾਰਨੀ ਵਲੋਂ ਕੀਤਾ ਜਾਵੇਗਾ। ਹਵਾਈ ਅੱਡੇ ਤੋਂ ਚਾਰਲਸ ਅਤੇ ਉਹਨਾਂ ਦੀ ਪਤਨੀ ਓਟਾਵਾ ਦੀ ਲੈਂਸਡਾਊਨ ਪਾਰਕ ਜਾਣਗੇ, ਜਿਥੇ ਉਹ ਇੱਕ ਸਮਾਰੋਹ ਵਿਚ ਲੋਕਾਂ ਅਤੇ ਸਥਾਨਕ ਕਾਰੀਗਰ ਨਾਲ ਮੁਲਾਕਾਤ ਕਰਨਗੇ। ਇਸ ਤੋਂ ਬਾਅਦ ਸ਼ਾਹੀ ਜੋੜਾ ਰਿਡੋ ਹਾਲ ਵਿਚ ਪ੍ਰਧਾਨ ਮੰਤਰੀ ਕਾਰਨੀ ਅਤੇ ਗਵਰਨਰ ਜਨਰਲ ਮੈਰੀ ਸਾਈਮਨ ਨਾਲ ਮੁਲਾਕਾਤ ਕਰੇਗਾ।
ਉਥੇ ਹੀ, ਮੰਗਲਵਾਰ ਨੂੰ ਕਿੰਗ ਚਾਰਲਸ ਕੈਨੇਡੀਅਨ ਸੰਸਦ ਵਿਚ ਭਾਸ਼ਣ ਪੜ੍ਹਨਗੇ। 1977 ਵਿਚ ਮਹਾਰਾਣੀ ਐਲਿਜ਼ਾਬੈਥ ਦੀ ਸਪੀਚ ਤੋਂ ਬਾਅਦ ਉਹ ਕੈਨੇਡਾ ਦੀ ਸੰਸਦ ਨੂੰ ਸੰਬੋਧਨ ਕਰਨ ਵਾਲੇ ਪਹਿਲੇ ਰਾਜਾ ਹੋਣਗੇ।
