ਲੈਂਗਲੀ ਆਰ.ਸੀ.ਐਮ.ਪੀ. ਨੇ ਬਹੁਤ ਜ਼ਿਆਦਾ ਸਪੀਡ ਮਾਮਲੇ ਵਿਚ ਦੋ ਮੋਟਰਸਾਈਕਲਾਂ ਨੂੰ ਕੀਤਾ ਜ਼ਬਤ

ਲੈਂਗਲੀ ਆਰ.ਸੀ.ਐਮ.ਪੀ. ਨੇ ਬਹੁਤ ਜ਼ਿਆਦਾ ਸਪੀਡ ਮਾਮਲੇ ਵਿਚ ਦੋ ਮੋਟਰਸਾਈਕਲਾਂ ਨੂੰ ਜ਼ਬਤ ਕੀਤਾ ਹੈ। ਇਹ ਕਾਰਵਾਈ ਮੰਗਲਵਾਰ ਸ਼ਾਮ ਕੀਤੀ ਗਈ। 216 ਸਟ੍ਰੀਟ ਅਤੇ 58 ਐਵੇਨਿਊ ਨੇੜੇ ਸ਼ਾਮ ਕਰੀਬ 6.15 ਵਜੇ ਇੱਕ ਚਿੱਟੇ ਰੰਗ ਦੀ ਸਟ੍ਰੀਟ ਬਾਈਕ 7 ਦਿਨਾਂ ਲਈ ਜ਼ਬਤ ਕਰ ਲਈ ਗਈ ਜੋ 60 ਕਿਲੋਮੀਟਰ ਪ੍ਰਤੀ ਘੰਟਾ ਦੇ ਜ਼ੋਨ ਵਿਚ 124 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸਪੀਡ ਨਾਲ ਜਾ ਰਹੀ ਸੀ ਅਤੇ ਸਬੰਧਤ ਵਿਅਕਤੀ ਨੂੰ ਉਲੰਘਣਾ ਟਿਕਟਾਂ ਵੀ ਜਾਰੀ ਕੀਤੀ ਗਈਆਂ, ਜਿਸ ਵਿਚ ਲਾਇਸੈਂਸ ਪਲੇਟ ਦੇ ਸਬੰਧ ਵਿਚ ਵੀ ਟਿਕਟ ਸ਼ਾਮਲ ਸੀ।

ਪੁਲਿਸ ਨੇ ਕਿਹਾ ਕਿ ਬਾਈਕ ਦੀ ਪਿਛਲੀ ਲਾਈਸੈਂਸ ਪਲੇਟ ਉੱਪਰ ਨੂੰ ਮੋੜੀ ਹੋਈ ਸੀ। ਉਸੇ ਸ਼ਾਮ 7.15 ਵਜੇ 88 ਐਵੇਨਿਊ ਨੇੜੇ 200 ਸਟ੍ਰੀਟ 'ਤੇ 130 ਕਿਲੋਮੀਟਰ ਦੇ ਸਪੀਡ ਜ਼ੋਨ ਵਿਚ 143 ਦੀ ਸਪੀਡ ਵਿਚ ਜਾ ਰਹੇ ਦੂਜੇ ਮੋਟਰਸਾਈਕਲ ਸਵਾਰ ਨੂੰ ਬਹੁਤ ਜ਼ਿਆਦਾ ਸਪੀਡ ਅਤੇ ਅਸੁਰੱਖਿਅਤ ਲੇਨ ਤਬਦੀਲੀ ਦੇ ਮਾਮਲੇ ਵਿਚ ਉਲੰਘਣਾ ਦੀਆਂ ਟਿਕਟਾਂ ਜਾਰੀ ਕੀਤੀਆਂ ਗਈਆਂ ਅਤੇ ਉਸ ਦਾ ਮੋਟਰਸਾਈਕਲ ਵੀ ਸੱਤ ਦਿਨਾਂ ਲਈ ਜ਼ਬਤ ਕਰ ਲਿਆ ਗਿਆ।

ਸਾਰਜੈਂਟ ਜ਼ਾਈਨਲ ਸ਼ਾਰੂਮ ਨੇ ਕਿਹਾ ਕਿ ਲੈਂਗਲੀ ਆਰ.ਸੀ.ਐਮ.ਪੀ. ਸੜਕਾਂ ਉਤੇ ਖਤਰਨਾਕ ਡਰਾਈਵਿੰਗ ਕਰਨ ਵਾਲਿਆਂ ਉਤੇ ਕਾਰਵਾਈ ਲਈ ਪੂਰੀ ਤਰ੍ਹਾਂ ਸਰਗਰਮੀ ਨਾਲ ਕੰਮ ਕਰ ਰਹੀ ਹੈ।