ਲੈਂਗਲੀ ਵਿਚ ਵਾਪਰਿਆ ਹਾਦਸਾ, ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਲੈਂਗਲੀ ਵਿਚ ਐਤਵਾਰ ਤੜਕੇ ਇੱਕ ਪਿਕਅੱਪ ਟਰੱਕ ਬੇਕਾਬੂ ਹੋ ਕੇ ਇੱਕ ਘਰ ਦੇ ਵਿਹੜੇ ਵਿਚ ਬਣੇ ਸ਼ੈੱਡ ਅਤੇ ਦਰੱਖਤ ਨਾਲ ਜਾ ਟਕਰਾਇਆ। ਇਸ ਟੱਕਰ ਕਾਰਨ ਡਰਾਈਵਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਲੈਂਗਲੀ ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ ਕੱਲ੍ਹ ਸਵੇਰੇ ਲਗਭਗ ਦੋ ਵਜੇ ਵਾਪਰੀ, ਜਦੋਂ ਪੁਲਿਸ ਨੂੰ 48th ਐਵੇਨਿਊ ਦੇ 20200 ਬਲੌਕ ਵਿੱਚ ਇੱਕ ਵਾਹਨ ਦੇ ਦੁਰਘਟਨਾਗ੍ਰਸਤ ਹੋਣ ਦੀ ਇਤਲਾਹ ਮਿਲੀ।

ਸਾਰਜੈਂਟ ਜ਼ਾਈਨਲ ਸ਼ਾਰੂਮ ਨੇ ਦੱਸਿਆ ਕਿ ਫਸਟ ਰਿਸਪਾਂਡਰ ਨੇ ਮੌਕੇ 'ਤੇ ਪਹੁੰਚ ਕੇ ਡਰਾਈਵਰ ਨੂੰ ਬਚਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਪਰ ਉਸ ਦੀ ਜਾਨ ਨਹੀਂ ਬਚਾਈ ਜਾ ਸਕੀ। ਜਿਸ ਘਰ ਦੇ ਵਿਹੜੇ ਵਿਚ ਇਹ ਹਾਦਸਾ ਹੋਇਆ, ਉਸ ਦੇ ਮਾਲਕ ਨੇ ਸੋਸ਼ਲ ਮੀਡੀਆ 'ਤੇ ਇਸ ਖੌਫਨਾਕ ਹਾਦਸੇ ਦਾ ਜ਼ਿਕਰ ਕਰਦਿਆਂ ਲਿਖਿਆ ਕਿ ਟਰੱਕ 203 ਸਟ੍ਰੀਟ ਤੋਂ ਤੇਜ਼ ਰਫ਼ਤਾਰ ਨਾਲ ਆਇਆ, ਉਸ ਨੇ ਰੈੱਡ ਲਾਈਟ ਸਿਗਨਲ ਤੋੜਿਆ ਅਤੇ ਫਿਰ ਡਰਾਈਵ-ਵੇਅ ਤੇ ਗਾਰਡਨ ਵਿਚੋਂ ਹੁੰਦਾ ਹੋਇਆ ਹਵਾ ਵਿਚ ਉਛਲਿਆ, ਜਿਸ ਤੋਂ ਬਾਅਦ ਸਿੱਧਾ ਸ਼ੈੱਡ ਨੂੰ ਤੋੜ ਕੇ ਇੱਕ ਦਰੱਖਤ ਨਾਲ ਜਾ ਚਿਪਕਿਆ।

ਫਿਲਹਾਲ ਮ੍ਰਿਤਕ ਡਰਾਈਵਰ ਦੀ ਪਛਾਣ ਜਨਤਕ ਨਹੀਂ ਕੀਤੀ ਗਈ ਅਤੇ ਨਾ ਹੀ ਇਹ ਸਾਹਮਣੇ ਆਇਆ ਹੈ ਕਿ ਉਹ ਕਿਸ ਹਾਲਤ ਵਿਚ ਗੱਡੀ ਚਲਾ ਰਿਹਾ ਸੀ।