ਟਰੰਪ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨ ਲਈ ਵਾਸ਼ਿੰਗਟਨ ਡੀ.ਸੀ.ਪਹੰਚੇ ਡੋਮਿਨਿਕ ਲੇਬਲੈਂਕ

ਕੈਨੇਡਾ ਦੇ ਅਮਰੀਕਾ ਨਾਲ ਵਪਾਰਕ ਸਬੰਧਾਂ ਦੇ ਮੰਤਰੀ ਡੋਮਿਨਿਕ ਲੇਬਲੈਂਕ ਸ਼ੁੱਕਰਵਾਰ ਨੂੰ ਟਰੰਪ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਨਾਲ ਅਹਿਮ ਮੁਲਾਕਾਤ ਕਰਨ ਲਈ ਵਾਸ਼ਿੰਗਟਨ ਡੀ.ਸੀ. ਪਹੁੰਚ ਗਏ ਹਨ। ਪਿਛਲੇ ਸਾਲ ਦੇ ਅਖੀਰ ਵਿਚ ਦੋਵਾਂ ਦੇਸ਼ਾਂ ਵਿਚਾਲੇ ਗੱਲਬਾਤ ਟੁੱਟਣ ਤੋਂ ਬਾਅਦ ਇਹ ਪਹਿਲੀ ਉੱਚ-ਪੱਧਰੀ ਮੀਟਿੰਗ ਹੈ। ਉਹ ਟਰੰਪ ਦੇ ਵਪਾਰ ਪ੍ਰਤੀਨਿਧ ਜੈਮੀਸਨ ਗ੍ਰੀਰ ਨਾਲ ਬੈਠਕ ਕਰਨਗੇ।

ਇਸ ਦਾ ਮੁੱਖ ਏਜੰਡਾ ਨੌਰਥ ਅਮਰੀਕਾ ਫ੍ਰੀ ਟਰੇਡ ਐਗਰੀਮੈਂਟ ਦਾ ਇਸ ਸਾਲ ਹੋਣ ਵਾਲਾ ਲਾਜ਼ਮੀ ਰਿਵਿਊ ਹੈ। ਇਹ ਚਿੰਤਾ ਜਤਾਈ ਜਾ ਰਹੀ ਕਿ ਜੇ ਸੀ.ਯੂ.ਐਸ.ਐਮ.ਏ. ਖ਼ਤਮ ਹੁੰਦਾ ਹੈ ਜਾਂ ਇਸ ਨੂੰ ਟਰੰਪ ਪ੍ਰਸ਼ਾਸਨ ਵਲੋਂ ਮਨਮਰਜ਼ੀ ਦੀਆਂ ਸ਼ਰਤਾਂ ਦਾ ਦਬਾਅ ਪਾ ਕੇ ਅੱਗੇ ਵਧਾਇਆ ਜਾਂਦਾ ਹੈ ਤਾਂ ਇਸ ਦੇ ਕੈਨੇਡਾ ਲਈ ਗੰਭੀਰ ਸਿੱਟੇ ਨਿਕਲ ਸਕਦੇ ਹਨ। ਹੁਣ ਤੱਕ ਸੀ.ਯੂ.ਐਸ.ਐਮ.ਏ. ਨੇ ਕੈਨੇਡਾ ਦੇ ਜ਼ਿਆਦਾਤਰ ਵਪਾਰ ਨੂੰ ਬਚਾਇਆ ਹੋਇਆ ਹੈ ਪਰ ਸਟੀਲ ਅਤੇ ਆਟੋ ਮੋਬਾਇਲ ਵਰਗੇ ਸੈਕਟਰ-ਵਿਸ਼ੇਸ਼ ਟੈਰਿਫ ਲਾਗੂ ਹਨ।

ਪਿਛਲੇ ਸਾਲ ਅਕਤੂਬਰ ਵਿਚ ਗੱਲਬਾਤ ਟੁੱਟਣ ਤੋਂ ਪਹਿਲਾਂ ਕੈਨੇਡਾ ਇਸ ਮੋਰਚੇ 'ਤੇ ਕੁਝ ਰਾਹਤ ਪ੍ਰਾਪਤ ਕਰਨ ਲਈ ਕੰਮ ਕਰ ਰਿਹਾ ਸੀ, ਜਦੋਂ ਓਨਟਾਰੀਓ ਵੱਲੋਂ ਟੈਰਿਫ ਵਿਰੋਧੀ ਇਸ਼ਤਿਹਾਰ ਚਲਾਉਣ ਕਾਰਨ ਰਾਸ਼ਟਰਪਤੀ ਟਰੰਪ ਨੇ ਕੈਨੇਡਾ ਨਾਲ ਰਸਮੀ ਵਪਾਰਕ ਗੱਲਬਾਤ ਸਸਪੈਂਡ ਕਰ ਦਿੱਤੀ ਸੀ। ਕੈਨੇਡਾ-ਮੈਕਸੀਕੋ ਦੋਵੇਂ ਚਾਹੁੰਦੇ ਹਨ ਕਿ ਇਹ ਤਿਕੋਣੀ ਵਪਾਰਕ ਸੰਧੀ ਬਣੀ ਰਹੇ, ਜਦੋਂ ਕਿ ਅਮਰੀਕਾ ਵਲੋਂ ਅਨਿਸ਼ਚਿਤਤਾ ਬਣੀ ਹੋਈ ਹੈ।