ਬੀ.ਸੀ. ਤੋਂ ਲਿਬਰਲ ਪਾਰਟੀ ਦੇ ਸੰਸਦ ਮੈਂਬਰ ਨੇ ਮਾਰਕ ਕਾਰਨੀ ਨੂੰ ਸਮਰਥਨ ਦੇਣ ਦੀ ਕੀਤੀ ਘੋਸ਼ਣਾ

ਬੀ.ਸੀ. ਤੋਂ ਲਿਬਰਲ ਪਾਰਟੀ ਦੇ ਸੰਸਦ ਮੈਂਬਰ ਪੈਟ੍ਰਿਕ ਵਾਇਲਰ ਨੇ ਕੈਨੇਡਾ ਦੇ ਅਗਲੇ ਪੀਐੱਮ ਵਜੋਂ ਮਾਰਕ ਕਾਰਨੀ ਨੂੰ ਸਮਰਥਨ ਦੇਣ ਦੀ ਘੋਸ਼ਣਾ ਕੀਤੀ ਹੈ। ਉਨ੍ਹਾਂ ਅੱਜ ਜਾਰੀ ਕੀਤੇ ਬਿਆਨ ਵਿਚ ਕਿਹਾ ਕਿ ਸਾਨੂੰ ਅਜਿਹੇ ਲੀਡਰ ਦੀ ਲੋੜ ਹੈ ਜੋ ਦੇਸ਼ ਦੀ ਆਰਥਿਕਤਾ, ਬਜਟ ਘਾਟੇ ਅਤੇ ਲੋਕਾਂ ਦੇ ਅਧਿਕਾਰਾਂ ’ਤੇ ਫੋਕਸ ਕਰਨ ਵਾਲਾ ਹੋਵੇ।

ਵਾਇਲਰ ਨੇ ਕਿਹਾ ਕਿ ਉਨ੍ਹਾਂ ਹਲਕੇ ਵਿਚ ਸੈਂਕੜੇ ਲੋਕਾਂ ਨਾਲ ਗੱਲਬਾਤ ਕੀਤੀ, ਜਿਸ ਵਿਚ ਸਿਰਫ ਇੱਕ ਹੀ ਨਾਮ ਨਿਕਲ ਕੇ ਉਭਰਿਆ ਅਤੇ ਉਹ ਮਾਰਕ ਕਾਰਨੀ ਹਨ। ਪੱਛਮੀ ਵੈਨਕੂਵਰ-ਸਨਸ਼ਾਈਨ ਕੋਸਟ ਅਤੇ ਸੀ-ਟੂ-ਸਕਾਈ ਇਲਾਕੇ ਦੀ ਨੁਮਿੰਦਗੀ ਕਰਨ ਵਾਲੇ ਲਿਬਰਲ ਐਮ.ਪੀ. ਨੇ ਕਿਹਾ ਕਿ ਮਾਰਕ ਕਾਰਨੀ ਕੋਲ ਲੀਡਰਸ਼ਿਪ ਕੁਆਲਿਟੀ ਅਤੇ ਤਜ਼ਰਬਾ ਹੈ ਜਿਸ ਦੀ ਕੈਨੇਡਾ ਨੂੰ ਇਸ ਸਮੇਂ ਲੋੜ ਹੈ।

ਉਨ੍ਹਾਂ ਕਿਹਾ ਕਿ 2008-09 ਦੇ ਵਿੱਤੀ ਸੰਕਟ ਸਮੇਂ ਕਾਰਨੀ ਨੇ ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਵਜੋਂ ਕੈਨੇਡਾ ਨੂੰ ਸਫਲਤਾਪੂਰਵਕ ਬਾਹਰ ਕੱਢਿਆ ਸੀ ਅਤੇ ਬੈਂਕ ਆਫ ਇੰਗਲੈਂਡ ਦੇ ਤੌਰ ’ਤੇ ਉਨ੍ਹਾਂ ਨੇ ਯੂਕੇ ਦੀ ਬ੍ਰੈਗਜ਼ਿਟ ਵਿਚ ਮਦਦ ਕੀਤੀ। ਵਾਇਲਰ ਨੇ ਕਿਹਾ ਕਿ ਕਾਰਨੀ ਦੀ ਕਾਬਲਿਅਤ ਨੂੰ ਦੇਖਦੇ ਹੋਏ ਉਨ੍ਹਾਂ ਨੇ ਉਨ੍ਹਾਂ ਸਮਰਥਨ ਦੇਣ ਦਾ ਫੈਸਲਾ ਕੀਤਾ ਹੈ।