ਲਿਬਰਲ ਪਾਰਟੀ ਨੇ ਰੂਬੀ ਡੈਲਾ ਨੂੰ ਟ੍ਰਾਂਸਲੇਟਰ ਦੇਣ ਤੋਂ ਕੀਤਾ ਇਨਕਾਰ

ਕੈਨੇਡਾ ਦੇ ਅਗਲੇ ਪ੍ਰਧਾਨ ਮੰਤਰੀ ਬਣਨ ਲਈ ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਦੌੜ ਵਿਚ ਸ਼ਾਮਲ ਰੂਬੀ ਡੈਲਾ ਨੂੰ ਵੱਡਾ ਝਟਕਾ ਲੱਗਾ ਹੈ। ਲਿਬਰਲ ਪਾਰਟੀ ਨੇ ਮਾਂਟਰੀਅਲ ਵਿਚ ਉਮੀਦਵਾਰਾਂ ਦੀ ਹੋਣ ਵਾਲੀ ਫ੍ਰੈਂਚ ਬਹਿਸ ਲਈ ਰੂਬੀ ਡੈਲਾ ਵਲੋਂ ਟ੍ਰਾਂਸਲੇਟਰ ਦੀ ਕੀਤੀ ਗਈ ਮੰਗ ਨੂੰ ਰੱਦ ਕਰ ਦਿੱਤਾ ਹੈ।

ਪਾਰਟੀ ਦੇ ਬੁਲਾਰੇ ਪਾਰਕਰ ਨੇ ਕਿਹਾ ਕਿ ਸਿਰਫ ਉਮੀਦਵਾਰਾਂ ਅਤੇ ਸੰਚਾਲਕ ਨੂੰ ਹੀ ਬਹਿਸ ਮੰਚ 'ਤੇ ਜਾਣ ਦੀ ਇਜਾਜ਼ਤ ਹੋਵੇਗੀ ਅਤੇ ਕੋਈ ਟ੍ਰਾਂਸਲੇਟਰ ਪ੍ਰਦਾਨ ਨਹੀਂ ਕੀਤਾ ਜਾਵੇਗਾ। ਲਿਬਰਲ ਲੀਡਰਸ਼ਿਪ ਉਮੀਦਵਾਰ ਡੈਲਾ ਨੇ ਹਾਲ ਹੀ ਵਿਚ ਕਿਹਾ ਸੀ ਕਿ ਉਹ ਆਪਣੇ ਫ੍ਰੈਂਚ ਸਕਿੱਲਸ 'ਤੇ ਕੰਮ ਕਰ ਰਹੀ ਹੈ ਪਰ ਪਾਰਟੀ ਦੀ ਆਉਣ ਵਾਲੀ ਫ੍ਰੈਂਚ ਬਹਿਸ ਵਿਚ ਮਦਦ ਲਈ ਉਨ੍ਹਾਂ ਵਲੋਂ ਟ੍ਰਾਂਸਲੇਟਰ ਦੀ ਮੰਗ ਕੀਤੀ ਜਾਵੇਗੀ ਕਿਉਂਕਿ ਫ੍ਰੈਂਚ ਭਾਸ਼ਾ ਵਿਚ ਉਨ੍ਹਾਂ ਦੀ ਮੁਹਾਰਤ ਨਹੀਂ ਹੈ। ਹਾਲਾਂਕਿ, ਪਾਰਟੀ ਵਲੋਂ ਬੇਨਤੀ ਰੱਦ ਹੋਣ ਦੇ ਬਾਅਦ ਵੀ ਡੈਲਾ ਡਿਬੇਟ ਵਿਚ ਸ਼ਾਮਲ ਹੋਵੇਗੀ ਅਤੇ ਉਨ੍ਹਾਂ ਵਲੋਂ ਓਪਨਿੰਗ ਤੇ ਕਲੋਸਿੰਗ ਸਟੇਮੈਂਟ ਫ੍ਰੈਂਚ ਵਿਚ ਦਿੱਤੀ ਜਾਵੇਗੀ।

ਗੌਰਤਲਬ ਹੈ ਕਿ ਲਿਬਰਲ ਪਾਰਟੀ ਵਲੋਂ 24 ਫਰਵਰੀ ਨੂੰ ਫ੍ਰੈਂਚ ਬਹਿਸ ਅਤੇ 25 ਫਰਵਰੀ ਨੂੰ ਅੰਗਰੇਜ਼ੀ ਬਹਿਸ ਤਹਿ ਕੀਤੀ ਗਈ ਹੈ। ਇਹ ਦੋਵੇਂ ਪ੍ਰੋਗਰਾਮ ਮਾਂਟਰੀਅਲ ਵਿਚ ਹੋਣਗੇ ਅਤੇ 9 ਮਾਰਚ ਨੂੰ ਪਾਰਟੀ ਔਟਵਾ ਵਿਚ ਆਪਣੇ ਅਗਲੇ ਲੀਡਰ ਦੀ ਘੋਸ਼ਣਾ ਕਰੇਗੀ।