ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਦੌੜ ਵਿਚ ਸ਼ਾਮਲ ਉਮੀਦਵਾਰਾਂ ਦੀ ਡਿਬੇਟ ਹੋਵੇਗੀ ਇਸ ਮਹੀਨੇ

ਕੈਨੇਡਾ ਦੇ ਅਗਲੇ ਪ੍ਰਧਾਨ ਮੰਤਰੀ ਬਣਨ ਲਈ ਲਿਬਰਲ ਪਾਰਟੀ ਦੀ ਲੀਡਰਸ਼ਿਪ ਦੌੜ ਵਿਚ ਸ਼ਾਮਲ ਉਮੀਦਵਾਰਾਂ ਦੀ ਡਿਬੇਟ ਇਸ ਮਹੀਨੇ ਦੇ ਅਖੀਰ ਵਿਚ ਹੋਣ ਜਾ ਰਹੀ ਹੈ। ਲਿਬਰਲ ਪਾਰਟੀ ਦਾ ਕਹਿਣਾ ਹੈ ਕਿ 24 ਫਰਵਰੀ ਨੂੰ ਇੱਕ ਫਰੈਂਚ ਡਿਬੇਟ ਅਤੇ 25 ਫਰਵਰੀ ਨੂੰ ਇੱਕ ਇੰਗਲਿਸ਼ ਡਿਬੇਟ ਤਹਿ ਕੀਤੀ ਗਈ ਹੈ। ਇਹ ਦੋਵੇਂ ਪ੍ਰੋਗਰਾਮ ਮਾਂਟਰੀਅਲ ਵਿਚ ਹੋਣਗੇ।

ਹੁਣ ਤੱਕ ਮੁਕਾਬਲੇ ਵਿਚ ਜੋ ਉਮੀਦਵਾਰ ਬਣੇ ਹੋਏ ਹਨ ਉਨ੍ਹਾਂ ਵਿਚ ਸਾਬਕਾ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ, ਸਾਬਕਾ ਕੇਂਦਰੀ ਬੈਂਕਰ ਮਾਰਕ ਕਾਰਨੀ, ਲਿਬਰਲ ਸੰਸਦ ਮੈਂਬਰ ਕਰੀਨਾ ਗੂਲਡ ਅਤੇ ਸਾਬਕਾ ਲਿਬਰਲ ਸੰਸਦ ਮੈਂਬਰ ਫਰੈਂਕ ਬੇਲਿਸ ਅਤੇ ਰੂਬੀ ਢੱਲਾ ਸ਼ਾਮਲ ਹਨ।

ਇਨ੍ਹਾਂ ਉਮੀਦਵਾਰਾਂ ਨੂੰ ਇਸ ਦੌੜ ਵਿਚ ਬਣੇ ਰਹਿਣ ਲਈ ਕੁੱਲ ਦਾਖਲਾ ਫੀਸ $350,000 ਦੀ ਬਚੀ $125,000 ਦੀ ਫਾਈਨਲ ਪੇਮੈਂਟ 17 ਫਰਵਰੀ ਨੂੰ ਕਰਨੀ ਹੋਵੇਗੀ। 9 ਮਾਰਚ ਨੂੰ ਲਿਬਰਲ ਪਾਰਟੀ ਆਪਣਾ ਅਗਲਾ ਲੀਡਰ ਚੁਣੇਗੀ।

ਪਾਰਟੀ ਮੁਤਾਬਕ, ਲਗਭਗ 400,000 ਸਮਰਥਕ ਵੋਟਿੰਗ ਵਿਚ ਹਿੱਸਾ ਲੈਣਗੇ, ਜਿਨ੍ਹਾਂ ਨੇ ਤੈਅ ਸਮੇਂ ਸੀਮਾਂ ਤੋਂ ਪਹਿਲਾਂ ਸਫਲਤਾਪੂਰਵਕ ਲੀਡਰਸ਼ਿਪ ਦੀ ਦੌੜ ਵਿਚ ਵੋਟ ਪਾਉਣ ਲਈ ਪਾਰਟੀ ਮੈਂਬਰ ਵਜੋਂ ਰਜਿਸਟਰ ਕੀਤਾ ਹੈ।