16.37C Vancouver 16.37C VancouverJul 17, 2020 7:29 PM -
ਵਿੱਤ ਮੰਤਰੀ ਬਿਲ ਮੌਰਨਿਊ ਦਾ ਕਹਿਣਾ ਹੈ ਕਿ ਲਿਬਰਲ ਸਰਕਾਰ ਦੇ ਐਮਰਜੈਂਸੀ ਵੇਜ ਸਬਸਿਡੀ ਪ੍ਰੋਗਰਾਮ ਨਾਲ ਸੰਬੰਧਤ ਨਿਯਮਾਂ 'ਚ ਢਿੱਲ ਦਿੱਤੀ ਜਾ ਰਹੀ ਹੈ।
ਇਸ ਦੇ ਨਾਲ ਹੀ ਵਪਾਰਾਂ ਨੂੰ ਮਿਲਣ ਵਾਲੀ ਰਾਸ਼ੀ 'ਚ ਵੀ ਕੁਝ ਤਬਦੀਲੀ ਕੀਤੀ ਗਈ ਹੈ।
ਕੈਨੇਡਾ ਵੇਜ ਸਬਸਿਡੀ ਪ੍ਰੋਗਰਾਮ ਨੂੰ ਸਰਕਾਰ ਵੱਲੋਂ 19 ਦਿਸੰਬਰ ਤੱਕ ਵਧਾਇਆ ਜਾ ਰਿਹਾ ਹੈ।
ਵਿੱਤ ਮੰਤਰੀ ਨੇ ਇਸ ਪ੍ਰੋਗਰਾਮ ਦੀਆਂ ਸ਼ਰਤਾਂ 'ਚ ਇੱਕ ਅਹਿਮ ਬਦਲਾਅ ਦਾ ਐਲਾਨ ਕਰਦੇ ਹੋਏ ਕਿਹਾ ਕਿ ਹੁਣ ਜੇਕਰ ਕਿਸੇ ਵਪਾਰ ਦੇ ਰੈਵੀਨਿਊ 'ਚ ਥੋੜਾ ਜਿਹਾ ਘਾਟਾ ਵੀ ਦਰਜ ਕੀਤਾ ਗਿਆ ਹੈ, ਤਾਂ ਇਸ ਪ੍ਰੋਗਰਾਮ ਲਈ ਅਪਲਾਈ ਕੀਤਾ ਜਾ ਸਕੇਗਾ।
ਇਸ ਤੋਂ ਪਹਿਲਾਂ ਵੇਜ ਸਬਸਿਡੀ ਪ੍ਰੋਗਰਾਮ ਲਈ ਉਸੇ ਵੇਲੇ ਅਪਲਾਈ ਕੀਤਾ ਜਾ ਸਕਦਾ ਸੀ, ਜੇਕਰ ਕਿਸੇ ਵਪਾਰ ਨੂੰ ਘਟੋ-ਘੱਟ 30% ਦਾ ਘਾਟਾ ਹੋਇਆ ਹੋਵੇ, ਪਰ ਹੁਣ ਇਹ ਸ਼ਰਤ ਹਟਾ ਦਿੱਤੀ ਗਈ ਹੈ।
ਟੋਰੌਂਟੋ 'ਚ ਗੱਲਬਾਤ ਕਰਦੇ ਹੋਏ ਮੌਰਨਿਊ ਨੇ ਕਿਹਾ ਕਿ ਹੁਣ ਰੈਵੀਨਿਊ 'ਚ ਹੋਏ ਕਿਸੇ ਵੀ ਘਾਟੇ 'ਤੇ ਵੇਜ ਸਬਸਿਡੀ ਪ੍ਰੋਗਰਾਮ ਦਾ ਫਾਇਦਾ ਲਿਆ ਜਾ ਸਕੇਗਾ, ਹਾਲਾਂਕਿ ਮਿਲਣ ਵਾਲੀ ਰਾਸ਼ੀ ਵੀ ਘਾਟੇ ਦੇ ਮੁਤਾਬਿਕ ਹੀ ਦਿੱਤੀ ਜਾਵੇਗੀ।
ਜੇਕਰ ਕਿਸੇ ਵਪਾਰ ਦੇ ਰੈਵੀਨਿਊ 'ਚ 50% ਤੱਕ ਦਾ ਘਾਟਾ ਆਇਆ ਹੈ, ਤਾਂ ਉਸ ਲਈ 25% ਤੱਕ ਵਧੇਰੇ ਸਬਸਿਡੀ ਦਾ ਐਲਾਨ ਕੀਤਾ ਗਿਆ ਹੈ।
ਸਰਕਾਰ 'ਤੇ ਇਸ ਸਬਸਿਡੀ ਨੂੰ ਵਧੇਰੇ ਲੋਕਾਂ ਤੱਕ ਪਹੁੰਚਾਉਣ ਲਈ ਵਧੇਰੇ ਆਸਾਨ ਬਣਾਉਣ ਦਾ ਦਬਾਅ ਸੀ, ਖਾਸ ਤੌਰ 'ਤੇ ਰੈਵੀਨਿਊ 'ਚ 30% ਦੇ ਘਾਟੇ ਨੂੰ ਵਿਖਾਉਣ ਦੇ ਨਿਯਮ 'ਚ ਤਬਦੀਲੀ ਦੀ ਮੰਗ ਕੀਤੀ ਜਾ ਰਹੀ ਸੀ।
ਇਸ ਦੇ ਵਿੱਚ ਬਦਲਾਅ ਦੇ ਆਸਰੇ ਵਧੇਰੇ ਕੰਪਨੀਆਂ ਦੀ ਪ੍ਰੋਗਰਾਮ ਦਾ ਫਾਇਦਾ ਲੈਣ ਦੀ ਪਹੁੰਚ ਵੱਧ ਸਕੇਗੀ।
ਇਹ ਪ੍ਰੋਗਰਾਮ ਪੈਂਡੇਮਿਕ ਕਾਰਨ ਨੁਕਸਾਨ ਝੱਲ ਰਹੇ ਵਪਾਰਾਂ ਨੂੰ ਮੁੜ ਤੋਂ ਪਟੜੀ 'ਤੇ ਲਿਆਉਣ ਲਈ ਲਿਬਰਲ ਸਰਕਾਰ ਦੇ ਲੋਕਾਂ ਨੂੰ ਕੀਤੇ ਵਾਅਦੇ ਦਾ ਹਿੱਸਾ ਹੈ।
ਮੌਰਨਿਊ ਦੇ ਬੀਤੇ ਹਫਤੇ ਦੀ ਵਿੱਤੀ ਅਪਡੇਟ 'ਚ ਇਸ ਪ੍ਰੋਗਰਾਮ ਨੂੰ $45 ਬਿਲੀਅਨ ਤੋਂ $82.3 ਬਿਲੀਅਨ ਕਰ ਦਿੱਤਾ ਗਿਆ ਸੀ।
ਬਿਲ ਮੌਰਨਿਊ ਦਾ ਕਹਿਣਾ ਹੈ ਕਿ ਇਹ ਪ੍ਰੋਗਰਾਮ 19 ਦਿਸੰਬਰ ਨੂੰ ਖਤਮ ਹੋਵੇਗਾ।
