ਫੌਜੀ ਖਰੀਦਦਾਰੀ ਨੂੰ ਤੇਜ਼ ਕਰਨ ਲਈ ਲਿਬਰਲਜ਼ ਨੇ ਰੱਖਿਆ ਨਿਵੇਸ਼ ਏਜੰਸੀ ਦੀ ਕੀਤੀ ਸ਼ੁਰੂਆਤ

ਕੈਨੇਡਾ ਸਰਕਾਰ ਨੇ ਵੀਰਵਾਰ ਨੂੰ ਨਵੀਂ ਡਿਫੈਂਸ ਇਨਵੈਸਟਮੈਂਟ ਏਜੰਸੀ ਲੌਂਚ ਕੀਤੀ ਹੈ,ਜਿਸ ਨੂੰ ਕੈਨੇਡੀਅਨ ਆਰਮਡ ਫੋਰਸਿਜ਼ ਦੀਆਂ ਜ਼ਰੂਰਤਾਂ ਨੂੰ ਬਿਹਤਰ ਢੰਗ ਨਾਲ ਪੂਰਾ ਕਰਨ ਲਈ ਮਿਲਟਰੀ ਸਾਜ਼ੋ-ਸਾਮਾਨ ਦੀ ਤੇਜ਼ੀ ਨਾਲ ਖਰੀਦ ਅਤੇ ਡਿਲਿਵਰੀ ਕਰਨ ਦਾ ਕੰਮ ਸੌਂਪਿਆ ਗਿਆ ਹੈ। ਇਹ ਨਵੀਂ ਏਜੰਸੀ ਕੈਨੇਡਾ ਦੀ ਰੱਖਿਆ ਸਮਰੱਥਾ ਨੂੰ ਵਧਾਉਣ ਅਤੇ ਨੈਟੋ ਸਪੈਂਡਿੰਗ ਟਾਰਗੇਟ ਨੂੰ ਪੂਰਾ ਕਰਨ ਦੇ ਯਤਨ ਦਾ ਹਿੱਸਾ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਇਸ ਦਾ ਐਲਾਨ ਕਰਦੇ ਕਿਹਾ ਕਿ ਨਵੀਂ ਏਜੰਸੀ ਕੋਲ ਯੂ.ਕੇ.,ਆਸਟ੍ਰੇਲੀਆ ਅਤੇ ਫਰਾਂਸ ਵਰਗੇ ਨਜ਼ਦੀਕੀ ਭਾਈਵਾਲ ਨਾਲ ਵਧੇਰੇ ਨੇੜਿਓਂ ਮਿਲ ਕੇ ਕੰਮ ਕਰਨ ਦਾ ਹੁਕਮ ਹੋਵੇਗਾ,ਜਿਸ ਨਾਲ ਸਾਂਝੀ ਡਿਫੈਂਸ ਖਰੀਦ ਅਤੇ ਭਾਈਵਾਲੀ ਵਧੇਰੇ ਆਸਾਨ ਹੋ ਜਾਵੇਗੀ। ਇਸ ਸਮੇਂ ਕੈਨੇਡਾ ਆਪਣੇ ਜ਼ਿਆਦਾਤਰ ਫੌਜੀ ਸਾਜ਼ੋ-ਸਾਮਾਨ ਅਮਰੀਕਾ ਤੋਂ ਖਰੀਦਦਾ ਹੈ।

ਰਾਇਲ ਬੈਂਕ ਆਫ਼ ਕੈਨੇਡਾ ਦੇ ਸਾਬਕਾ ਕਾਰਜਕਾਰੀ ਡੱਗ ਗਜ਼ਮੈਨ ਨੂੰ ਨਵੀਂ ਏਜੰਸੀ ਦਾ ਪ੍ਰਬੰਧਨ ਕਰਨ ਲਈ ਨਿਯੁਕਤ ਕੀਤਾ ਗਿਆ ਹੈ ਅਤੇ ਇਹ ਏਜੰਸੀ ਰੱਖਿਆ ਖਰੀਦ ਲਈ ਸੈਕਟਰੀ ਔਫ ਸਟੇਟ ਸਟੀਫਨ ਫੁਹਰ ਦੇ ਅਧੀਨ ਹੋਵੇਗੀ। ਪੀ.ਐੱਮ.ਕਾਰਨੀ ਨੇ ਚੋਣਾਂ ਦੌਰਾਨ ਡਿਫੈਂਸ ਖਰੀਦ ਵਿਚ ਸੁਧਾਰ ਕਰਨ ਅਤੇ ਲੰਮੀ ਦੇਰੀ ਨੂੰ ਘਟਾਉਣ ਦਾ ਵਾਅਦਾ ਕੀਤਾ ਸੀ।