ਲੰਡਨ ਡਰੱਗ ਦੇ ਮੁਖੀ ਨੇ ਸਾਈਬਰ ਸੁਰੱਖਿਆ ਦੇ ਮੱਦੇਨਜ਼ਰ ਕੈਨੇਡਾ ’ਚ ਸਾਰੇ ਸਟੋਰ ਬੰਦ ਹੋਣ ਤੋਂ ਬਾਅਦ ਗਾਹਕਾਂ ਤੋਂ ਮੰਗੀ ਮੁਆਫ਼ੀ

ਵੈਨਕੂਵਰ ਦੇ ਰਿਟੇਲਰ ਲੰਡਨ ਡਰੱਗ ਦੇ ਮੁਖੀ ਨੇ ਪਿਛਲੇ ਮਹੀਨੇ ਸਾਈਬਰ ਸੁਰੱਖਿਆ ਦੇ ਮੱਦੇਨਜ਼ਰ ਪੱਛਮੀ ਕੈਨੇਡਾ ਵਿਚ ਸਾਰੇ ਸਟੋਰ ਬੰਦ ਹੋਣ ਤੋਂ ਬਾਅਦ ਗਾਹਕਾਂ ਤੋਂ ਮੁਆਫ਼ੀ ਮੰਗੀ ਹੈ। ਕੰਪਨੀ ਦੇ ਪ੍ਰਧਾਨ ਅਤੇ ਮੁੱਖ ਸੰਚਾਲਨ ਅਧਿਕਾਰੀ ਕਲਿੰਟ ਮਹਲਮੈਨ ਨੇ ਬੁੱਧਵਾਰ ਨੂੰ ਇਕ ਪੱਤਰ ਜਾਰੀ ਕਰਕੇ ਬਿ੍ਰਟਿਸ਼ ਕੋਲੰਬੀਆ, ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਵਿਚ ਕੰਪਨੀ ਦੇ 79 ਸਟੋਰਾਂ ਦੇ ਹਫਤੇ ਭਰ ਬੰਦ ਰਹਿਣ ਕਾਰਨ ਪੈਦਾ ਹੋਈ ਅਸੁਵਿਧਾ ਅਤੇ ਕਿਸੇ ਵੀ ਚਿੰਤਾ ਲਈ ਦਿਲੋਂ ਮੁਆਫੀ ਮੰਗੀ ਹੈ।

ਲੰਡਨ ਡਰੱਗ ਦੇ ਸਾਰੇ ਸਥਾਨ ਜੋ 28 ਅਪ੍ਰੈਲ ਨੂੰ ਅਚਾਨਕ ਬੰਦ ਕਰ ਦਿੱਤੇ ਗਏ ਸਨ, ਉਹ ਇਸ ਹਫਤੇ ਦੀ ਸ਼ੁਰੂਆਤ ਤੱਕ ਦੁਬਾਰਾ ਖੋਲ੍ਹ ਦਿੱਤੇ ਗਏ ਸਨ। ਕੰਪਨੀ ਦਾ ਕਹਿਣਾ ਸੀ ਕਿ ਫਾਰਮੇਸੀ ਦੇ ਮਰੀਜ਼ਾਂ ਸਮੇਤ ਹੁਣ ਤਕ ਕਿਸੇ ਵੀ ਗਾਹਕ ਦਾ ਡਾਟਾ ਬੇਸ ਚੋਰੀ ਹੋਣ ਦਾ ਕੋਈ ਸਬੂਤ ਨਹੀਂ ਮਿਲਿਆ।

ਜ਼ਿਕਰਯੋਗ ਹੈ ਕਿ ਲੰਡਨ ਡਰੱਗ ਨੇ ਸਾਈਬਰ ਸੁਰੱਖਿਆ ਦੇ ਮੱਦੇਨਜ਼ਰ 28 ਅਪ੍ਰੈਲ ਨੂੰ ਬੀ.ਸੀ., ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਵਿੱਚ ਆਪਣੀਆਂ ਸਾਰੀਆਂ ਲੋਕੇਸ਼ਨਾਂ ਨੂੰ ਬੰਦ ਕਰ ਦਿੱਤਾ ਸੀ। ਕੰਪਨੀ ਦਾ ਕਹਿਣਾ ਸੀ ਕਿ ਉਹ ਇਕ ਸਾਈਬਰ ਸੁਰੱਖਿਆ ਦੀ ਘਟਨਾ ਦਾ ਸ਼ਿਕਾਰ ਹੋ ਗਈ ਸੀ ਜਿਸ ਕਾਰਨ ਪੱਛਣੀ ਕੈਨੇਡਾ ਦੀਆਂ ਸਾਰੀਆਂ ਲੋਕੇਸ਼ਨਾਂ ਨੂੰ ਬੰਦ ਕਰਨਾ ਪਿਆ ਸੀ।