ਵੈਨਕੂਵਰ ਦੇ ਲੰਡਨ ਡਰੱਗ ਸਟੋਰ ਤੀਜੇ ਦਿਨ ਵੀ ਰਹੇ ਬੰਦ

ਵੈਨਕੂਵਰ ਦੇ ਲੰਡਨ ਡਰੱਗ ਸਟੋਰ ਅੱਜ ਲਗਾਤਾਰ ਤੀਸਰੇ ਦਿਨ ਵੀ ਬੰਦ ਰਹੇ। ਕੰਪਨੀ ਵਲੋਂ ਬੀਤੇ ਐਤਵਾਰ ਸਾਈਬਰ ਸੁਰੱਖਿਆ ਦੇ ਮੁੱਦੇ ਕਾਰਨ ਆਪਣੇ ਕਾਰੋਬਾਰ ਬੰਦ ਕਰ ਦਿੱਤੇ ਗਏ ਸਨ। ਕੰਪਨੀ ਦਾ ਕਹਿਣਾ ਹੈ ਕਿ ਉਹ ਇਕ ਸਾਈਬਰ ਸੁਰੱਖਿਆ ਦੀ ਘਟਨਾ ਦਾ ਸ਼ਿਕਾਰ ਹੋ ਗਈ ਸੀ ਜਿਸ ਕਾਰਨ ਪੱਛਮੀ ਕੈਨੇਡਾ ਦੀਆਂ ਲੋਕੇਸ਼ਨਾਂ ਨੂੰ ਬੰਦ ਕਰਨਾ ਪਿਆ।

ਕੰਪਨੀ ਨੇ ਅੱਜ ਇਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਜਾਂਚਕਰਤਾ ਫਿਲਹਾਲ ਇਸ ਗੱਲ ਦਾ ਮੁਲਾਂਕਣ ਕਰ ਰਹੇ ਹਨ ਕਿ ਇਸ ਘਟਨਾ ਵਿਚ ਕਿਸੇ ਵੀ ਡਾਟਾ ਨਾਲ ਕਿਸ ਹੱਦ ਤੱਕ ਸਮਝੌਤਾ ਕੀਤਾ ਗਿਆ ਹੈ, ਜਿਸ ਕਾਰਨ ਬਿ੍ਰਟਿਸ਼ ਕੋਲੰਬੀਆ, ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਵਿਚ ਸਾਰੇ ਸਟੋਰ ਲੋਕੇਸ਼ਨਾਂ ਨੂੰ ਵੀਕਐਂਡ ਦੌਰਾਨ ਬੰਦ ਕਰਨਾ ਪਿਆ। ਲੰਡਨ ਡਰੱਗ ਵਲੋਂ ਆਪਣੀਆਂ ਪੱਛਮੀ ਕੈਨੇਡਾ ਦੀਆਂ ਸਾਰੀਆਂ ਲੋਕੇਸ਼ਨਾਂ ਨੂੰ ਦੁਬਾਰਾ ਖੋਲ੍ਹਣ ਦਾ ਕੋਈ ਅਨੁਮਾਨਿਤ ਸਮਾਂ ਨਹੀਂ ਦਿੱਤਾ ਗਿਆ।

ਇਸ ਤੋਂ ਇਲਾਵਾ ਕੰਪਨੀ ਨੇ ਫਾਰਮੇਸੀ ਦੀ ਤੁਰੰਤ ਲੋੜ ਵਾਲੇ ਲੋਕਾਂ ਨੂੰ ਆਪਣੇ ਸਥਾਨਕ ਫਾਰਮੇਸੀ ਸਟੋਰ ਨੂੰ ਫੋਨ ਕਰਨ ਦੀ ਸਲਾਹ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਕੰਪਨੀ ਦੇ ਬੀ.ਸੀ. ਵਿੱਚ 52, ਐਲਬਰਟਾ ਵਿੱਚ 21, ਸਸਕੈਚਵਨ ਵਿੱਚ 5 ਅਤੇ ਮੈਨੀਟੋਬਾ ਵਿੱਚ 1 ਸਟੋਰ ਹਨ।