ਫੈਡਰਲ ਚੋਣਾਂ ਦੌਰਾਨ ਵੈਨਕੂਵਰ ਵਿੱਚ ਪੋਲਿੰਗ ਸਟੇਸ਼ਨਾਂ 'ਤੇ ਲੋਕਾਂ ਨੂੰ ਕਰਨੀ ਪਈ ਲੰਬੇ ਸਮੇਂ ਤੱਕ ਉਡੀਕ

ਵੈਨਕੂਵਰ ਵਿਚ ਫੈਡਰਲ ਚੋਣਾਂ ਸਬੰਧੀ ਅੱਜ ਅਗਾਊਂ ਮਤਦਾਨ ਲਈ ਲੋਕਾਂ ਨੂੰ ਕੁਝ ਵੋਟਿੰਗ ਸਟੇਸ਼ਨ 'ਤੇ ਘੰਟੇ ਲੰਮੀਆਂ ਕਤਾਰਾਂ ਵਿਚ ਖੜ੍ਹੇ ਹੋਣਾ ਪਿਆ। ਅਗਾਊਂ ਪੋਲਿੰਗ ਸਟੇਸ਼ਨ ਸਵੇਰੇ 9 ਵਜੇ ਖੁੱਲ੍ਹੇ ਅਤੇ ਲਗਭਗ ਅੱਧੇ ਘੰਟੇ ਬਾਅਦ ਡਾਊਨਟਾਊਨ ਵੈਨਕੂਵਰ ਵਿਚ ਯੇਲਟਾਊਨ ਦੇ ਰਾਉਂਡਹਾਊਸ ਕਮਿਊਨਿਟੀ ਸੈਂਟਰ ਦੇ ਬਾਹਰ ਲਾਈਨ ਲੱਗ ਗਈ, ਜਿੱਥੇ ਲੋਕਾਂ ਨੂੰ ਅੰਦਾਜ਼ਨ ਦੋ ਘੰਟੇ ਉਡੀਕ ਕਰਨੀ ਪਈ।

ਸਟਾਫ਼ ਨੇ ਕਿਹਾ ਕਿ ਜਦੋਂ ਕਮਿਊਨਿਟੀ ਸੈਂਟਰ ਦੇ ਦਰਵਾਜ਼ੇ ਸਵੇਰੇ 9 ਵਜੇ ਖੁੱਲ੍ਹੇ ਤਾਂ ਪਹਿਲਾਂ ਹੀ ਲਗਭਗ 100 ਲੋਕਾਂ ਦੀ ਲਾਈਨ ਲੱਗੀ ਹੋਈ ਸੀ। ਇਸ ਵਜ੍ਹਾ ਨਾਲ ਕੁਝ ਲੋਕ ਵਾਪਸ ਮੁੜ ਗਏ। ਇਸ ਦੌਰਾਨ ਸਟਾਫ ਨੂੰ ਮਾਫੀ ਮੰਗਦੇ ਸੁਣਿਆ ਜਾ ਸਕਦਾ ਸੀ।

ਉਹਨਾਂ ਦਾ ਕਹਿਣਾ ਸੀ ਕਿ ਸਾਡੇ ਕੋਲ ਸਿਰਫ 4 ਬੈਲਟ ਟੇਬਲ ਹਨ। ਲਾਈਨ ਵਿਚ ਉਡੀਕ ਕਰਦੇ ਲੋਕਾਂ ਨੂੰ ਸਲਾਹ ਦਿੱਤੀ ਗਈ ਉਹ ਸ਼ਾਮ ਨੂੰ ਖਾਣੇ ਮਗਰੋਂ ਵਾਪਸ ਆਉਣ 'ਤੇ ਵਿਚਾਰ ਕਰ ਸਕਦੇ ਹਨ ਕਿਉਂਕਿ ਉਦੋਂ ਤੱਕ ਲਾਈਨਾਂ ਛੋਟੀਆਂ ਹੋਣ ਦੀ ਉਮੀਦ ਹੈ। ਗੌਰਤਲਬ ਵੈਨਕੂਵਰ ਅਤੇ ਸਰੀ ਸਮੇਤ ਕੈਨੇਡਾ ਭਰ ਦੇ ਹਲਕਿਆਂ ਵਿਚ ਅੱਜ ਤੋਂ ਸੋਮਵਾਰ ਤੱਕ ਲਈ ਐਡਵਾਂਸ ਵੋਟਿੰਗ ਓਪਨ ਹੋਈ ਹੈ।