15.08C Vancouver 15.08C VancouverDec 15, 2023 7:22 PM - The Canadian Press
ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲਮ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ 2024 ਸਾਲ ਇੱਕ ਤਬਦੀਲੀ ਵਾਲਾ ਸਾਲ ਹੋਵੇਗਾ। ਗਵਰਨਰ ਟਿਫ ਮੈਕਲਮ ਨੇ ਸ਼ੁੱਕਰਵਾਰ ਨੂੰ ਸਾਲ ਦੇ ਆਖਰੀ ਭਾਸ਼ਣ ਵਿੱਚ ਕਿਹਾ ਕਿ ਵਿਆਜ ਦਰ ਵਿੱਚ ਕਟੌਤੀ ਬਾਰੇ ਵਿਚਾਰ ਕਰਨਾ ਅਜੇ ਬਹੁਤ ਜਲਦਬਾਜ਼ੀ ਹੋਵੇਗਾ।
ਮੈਕਲਮ ਦੀ ਇਹ ਟਿੱਪਣੀ ਉਨ੍ਹਾਂ ਉਮੀਦਾਂ ਦੇ ਵਿਰੁੱਧ ਆਈ ਹੈ ਜਦੋਂ ਅਮਰੀਕਾ ਦੇ ਸੈਂਟਰਲ ਬੈਂਕ ਵੱਲੋਂ ਨਵੇਂ ਸਾਲ ਵਿੱਚ ਸਖ਼ਤ ਨੀਤੀ ਨੂੰ ਨਰਮ ਕਰਨ ਦੇ ਸੰਕੇਤ ਦਿੱਤੇ ਗਏ ਹਨ। ਟੋਰਾਂਟੋ ਵਿੱਚ ਕੈਨੇਡੀਅਨ ਕਲੱਬ ਨੂੰ ਸੰਬੋਧਨ ਵਿੱਚ ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਨੇ ਕਿਹਾ ਕਿ ਕੈਨੇਡੀਅਨ ਆਰਥਿਕਤਾ ਵਿੱਚ ਹੁਣ ਮਹਿੰਗਾਈ ਦਾ ਦਬਾਅ ਘੱਟ ਹੋ ਰਿਹਾ ਹੈ ਪਰ ਇਸ ਦੇ ਬਾਵਜੂਦ ਕੁੱਝ ਰਿਸਕ ਹਨ ਜਿਨ੍ਹਾਂ ਬਾਰੇ ਸੈਂਟਰਲ ਬੈਂਕ ਨੂੰ ਵਿਚਾਰ ਕਰਨਾ ਪਵੇਗਾ।
ਮੈਕਲਮ ਨੇ ਕਿਹਾ ਕਿ ਜਦੋਂ ਇਹ ਸਪੱਸ਼ਟ ਹੋ ਜਾਵੇਗਾ ਕਿ ਮਹਿੰਗਾਈ ਹੁਣ ਲਗਾਤਾਰ ਘੱਟ ਹੋ ਰਹੀ ਹੈ ਤਾਂ ਹੀ ਬੈਂਕ ਨੀਤੀ ਵਿਆਜ ਦਰ ਨੂੰ ਘਟਾਉਣ ਬਾਰੇ ਚਰਚਾ ਸ਼ੁਰੂ ਕਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਵਿਆਜ ਦਰ ਵਿੱਚ ਹੁਣ ਤੱਕ ਜਿੰਨਾ ਵਾਧਾ ਹੋਇਆ ਹੈ ਉਸ ਦਾ ਅਸਰ 2024 ਵਿੱਚ ਵੀ ਜਾਰੀ ਰਹੇਗਾ, ਲਿਹਾਜਾ ਇਸ ਨਾਲ ਆਰਥਿਕ ਵਿਕਾਸ ਅਤੇ ਰੁਜ਼ਗਾਰ ਦੀ ਰਫ਼ਤਾਰ ਸੀਮਤ ਹੋ ਜਾਵੇਗੀ।
ਉੱਧਰ ਅਮਰੀਕਾ ਦੇ ਸੈਂਟਰਲ ਬੈਂਕ ਨੇ ਇਸ ਹਫ਼ਤੇ ਆਪਣੇ ਨੀਤੀ ਦਰ ਨੂੰ ਹੋਲਡ ਰੱਖਦਿਆਂ ਅਗਲੇ ਸਾਲ ਤਿੰਨ ਵਿਆਜ ਦਰਾਂ ਵਿੱਚ ਕਟੌਤੀ ਦੀ ਉਮੀਦ ਜਤਾਈ ਹੈ।
